MATAYO 14 - BUKUIT NE TILIIL Sireet ne Dutero Kanon

Pareetap Johana kabatisanindet

¹ Ki kas eng' peetuusyechooto pounindet Herod logoiywek agobo Jeso,

² ak ki leenji otwogikyik, “Ineni ko Johana kabatisanindet, kagong'eet eng' che ki kobek! Eng' niito anyun ko poisyei kimnatosyechu eng' ineendet.”

³ Kiga konam `Herod Johana, korat ak konde korgoreet agobo Herodias, osotyotap Philipu ng'eetap kam.

⁴ Amu ki leenji Johana ineendet, “Etaat eng' ng'atuutik obaigei ak kwonyito.”

⁵ Nganda kimachei Herod kobar ineendet, ko ki iywei tuiyet, amu ki kiit keele ineendet ko maotyo.

⁶ Ago ye kingo it peetuut ne po kabwaatetap sigeetap Herod, koureren cheptap Herodias eng' kween, ak ki ibaibai Herod.

⁷ Ak ki iyasyechi Herod kogoochi kiy age tugul ne kasoom.

⁸ Ak ye kingo kagong'ulang'ul kamet, komwa kole, “Koono metitap Johana Kabatisanindet eng' tageito.”

⁹ Ki aragenji laitoryat ng'olyoondoni; ak amu konyit ne kiting'e icheek che kitebyei ak ineendet eng' amisyet, kong'at kigoochi;

¹⁰ ki iyookto anyun keetil metitap Johana eng' korgoreet.

¹¹ Ak ki kiip metinnyi eng' tageito, kigoochi chebooto; ak ki ipchi chebooto kamet.

¹² Ki pwa anyun kasubikyik, koip muusto ipkotup; ak ki pa komwachi Jeso.

Kobaei `Jeso piik

¹³ Ye kingo kas Jeso, kwo kolaany moingetap peek, ak kwo agoi surkwen kotabaangei. Kingo kas tuiyosyek koosup ineendet kobun keelyek kong'eetyee nganasook che eecheen.

¹⁴ Ak kingo mong' kogeer tuiyet ne oo, ak ki riiree icheek, ak kosaap piikwak che ki myandos.

¹⁵ Eng' koskoleng'unooto, kobwonji kasubikyik koleenji, “Surkwen koroni, ak kagoimen; mete tuiyet koba nganasook, si koaljigei amitwogik.”

¹⁶ Ago ki leenji Jeso, “Ma nyooljin koba, ogoochi icheek kiy ne amei.”

¹⁷ Ak ki leenji, “Ki tinyei eng' yu magatiinik muut ak njireenik aeng' kityo.”

¹⁸ Koleenji, “Oibwa.”

¹⁹ Ki ng'at tuiyosyek kotep ng'wony eng' susweek. Ki inam magatinichooto muut ak injirenichooto aeng' ak konyal kipsengwet ak koberuur. Kibuutul ak kogoochi kasubikyik magatiinichooto, yeityo kogoochi kasubik tuiyosyek.

²⁰ Ki amis tugul kot kobiyong'so, ak ki iyum katuganik che ki nyi kereboonik taman ak aeng'.

²¹ Icheek che ki amis ko ki neegit murenik eliphuusyek muut ama kiit kobogorisyek ak lagok.

Kobunei Jeso araraita parak

²² Ak ki ichirchir eng' yooto kasubikyik kolaany moingetap peek, ak koba pitoniin kondoe ineendet, ye kita koyomisi tuiyosyek koba.

²³ Ak kingo kagoyomis tuiyosyek koba, kotogosta ineendet tulweet kwo kosa: ak koimenji olooto komi ineegei.

²⁴ Ago kigaiit moinget peek kween, kolungulgei eng' mildaetapkei ne po peek; amu ki kirindoi icheeget usoonet.

²⁵ Ak eng' riipseet ne po ang'wan ne po kemoi kwo ole mi icheeget, kobunei araraita parak.

²⁶ Ak ye kingo keer kasubikyik ineendet kobunei araraita parak, koiyweis, ak kole, “Tamirmir ni!” Ak kowaach amu kaiyweisyet.

²⁷ Ago ki ng'alaalji Jeso icheek eng' yooto koleenji, “Onyiganitu; anee; amoiyweisye.”

²⁸ Ak ki wolji Petero koleenji, “Kiptaiyat, ngo inyee, ing'ata anyoonjin abun peek parak.”

²⁹ Ak ki le, “Nyoo.” Ak kichoortagei Petero eng' moingetap peek, kobun peek parak kwo ole mi Jeso.

³⁰ Ago ye kingo keer usoonet, koywei; ak ki neegit kolis peek kowaach kole, “Kiptaiyat, sarwo!”

³¹ Ak eng' yooto koito Jeso eunnyi konam ineendet ak koleenji, “Ee inyee ne tinyei kayaneet ne ming'in, kalya si isage?”

³² Ak ye kingo kagolaany icheek moinget, kosiis usoonet.

³³ Ak ki ilas ineendet icheek che ki mi moinget, kole, “Iman ii Weeriitap Kamuktaindet.”

Kosoobi `Jeso che ki myandos eng' Genesaret

³⁴ Ak ye kingo kagolanda, koit emetap Genesaret.

³⁵ Ak ye kingo nai piigap koronooto ineendet, koyookto emonooto komugul komutyi ineendet tugul che ki myandos;

³⁶ ak ki igaigai ineendet kole kotwa agot tabandap ngoryennyi: ak kisopchi tugul che kitwa.