MATAYO 12 - BUKUIT NE TILIIL Sireet ne Dutero Kanon

Kiptaiyatap Sabato

¹ Eng' kasarata, kogiwo Jeso kobun mbareenigap peek eng' peetuutap sabato. Ki am rubeet kasubikyik ak ki toi kobut mesiisegap peek ak koam.

² Ago ye kingo keer Pharisaik koleenji ineendet, “Keero, yaei kasubiguk ne ma chamdaat eng' ng'atuutik keyai eng' sabato.”

³ Ago ki leenji icheek, “Tom osoman kiit ne ki yai Daudi ak che ki mi ak ineendet ye ki amei rubeet?

⁴ Ki wo kootap Kamuktaindet ak koam magatiinik che itabaanatiin che ki ma kochamdaat eng' ng'atuutik koam ineendet anan che ki mi kobooto ineendet, kobatee tisiik icheegei.

⁵ Anan tomo osoman eng' ng'atuutik keele eng' peetuutap sabato kong'waniti tisiik sabato eng' Hekaluut, ama kiityin icheek tengek?

⁶ Ago amwaiwok ale, mi yu ne oo kosiir Hekaluut.

⁷ Ago nda ki ongen kaguiyetap ‘amache rireenetapkei ma tiseiywek,’ ta ki ma ogikyini che ma tinyei tengek,

⁸ amu Weeriitap chii ko kiptaiyatap sabato.”

Chii ne ki meat euut

⁹ Kiwechigei eng' olooto ak kwo agoi sinagoginnywa, ole

¹⁰ ki miitei chiito ne ki meat euut. Komachei kong'ach ineendet, ko kiteebe icheek koleenji, “Tos chamdaat eng' ng'atuutik kisoop chii eng' peetuutap sabato?”

¹¹ Kowolji koleenji, “Ngot kotinyei chii eng' okweek keechiiryet ak kororokyi keriinget peetuutap sabato, ko tos masutu komong'?

¹² Po kamanuut anyun ne tya chiito kosiir keechiiryet? Ara anyun, chamdaat keyai ne myee eng' peetuutap sabato.”

¹³ Eng' yooto, komwachi anyun chiichooto koleenji, “Chuul eung'ung'.” Ki chuul, ak kiga kosap koigei euut nin age.

¹⁴ Ki manda anyun Pharisaik ak korwooch agobo ole partoi ineendet.

Otwogindet ne ki kilewen

¹⁵ Ye kingo nai Jeso agobo nooto, kwo koistogei eng' olooto. Ki isup `ineendet piik che chaang' ak ki isoop icheek tugul,

¹⁶ ak kong'at kole mat kobarta ineendet

¹⁷ si kosulda ne ki kamwa maotyot Isaiah kole,

¹⁸ “Ogeero, otwogindennyu ne ki alewen; Chamanennyu ne paibai saboondanyu eng' ineendet: Andoi ineendet Kabuusennyu ne Tiliil, si komwachi pororyosyek kirwooget.

¹⁹ Matiitos, anan kobol; ama kasei chii kutinnyi eng' ortinwegap nganaseet.

²⁰ Ma iriei tegat ne chisot, ama imisi ineendet kitambit ne iyeni, kot koyookto kirwooget ne iterteerisyei.

²¹ Ak imang'u pororyosyek kainennyi.”

Jeso ak chii ne ki tinyei oindet

²² Ki kimutyi anyun chiito ne ki tinyei oindet ak ko koraat ak konamaat kuut. Ki isoop ineendet, kot kong'alaal ak kogeerto.

²³ Ki kwong'yo anyun tuiyosyek tugul koleen, “Tos weeriitap Daudi ni?”

²⁴ Ago kingo kas Pharisaik, kole, “Maonei chiichi oik kobatee eng' Beelsebul ne oo ne po oik.”

²⁵ Ki ingen ineendet kabwaatutikwak ak ki leenji, “Ng'emaksei laitornatet age tugul ne pcheat, ama tononi nganaseet anan koot age tugul ne pcheat.

²⁶ Ngo oon `Setani Setani, ko kapcheigei ineegei; tonondoi ano anyun laitornatennyi?

²⁷ Ngaon oik eng' Beelsebul, koonei eng' ng'oo weeriikwok? Nooto anyun, egu icheek che kirwoogikwok.

²⁸ Ago ngaon oik eng' Kabuusetap Kamuktaindet, ko kagoitwak anyun laitornatetap Kamuktaindet.

²⁹ Anan, tos imuuchi kwo chii kootap chiito ne kiim ak korebe tuguukyik ngot ko marat korook chiichooto kiim yeityo kochoor koonnyi?

³⁰ Ineendet ne ma kimi tuwai kogirindaa, ak ineendet ne ma kiyumi tuwai koiyestoi.

³¹ Nooto anyun amwaiwok ale, kinyochin kaat piik tengek age tugul ak ng'olyoo age tugul ne ya, ago age tugul ne mwaei ng'olyoo ne ya agobo Kabuuset ne Tiliil, koma kinyochin kaat.

³² Age tugul ne mwaitoe yaityo Weeriitap chii kenyochin kaat, ago age tugul ne mwaitoe yaityo Kabuuset ne Tiliil, koma kinyochin kaat, ngo eng' kasari, anan ko eng' kasarta ne nyoonei.

Keetit ak logoekyik

³³ “Oyai keetit komyeeit, ak myagitu logoekyik, anan oyai keetit koyait, ak yagitu logoekyik, amu kinae keetit logoekyik.

³⁴ Lagochu po erenooi, omuktoi ano okweek che oo yaach omwa tuguuk che myach? Ng'alaali kutit che nyiitaat muguleldo.

³⁵ Ibune chii ne myee tuguuk che myach konorwennyi ne myee, ak ibune chii ne ya tuguuk che yaach konorwennyi ne ya.

³⁶ “Amwaiwok ale, ng'olyoo age tugul ne mwaei piich eng' tangoi, ko tuun tetu chooto tugul eng' peetuutap kirwooget.

³⁷ Ki ityinin imanda eng' ng'aleeguk, ak kirwoogun eng' ng'aleeguk.”

Mageetap Kabarunet

³⁸ Ki wol alage `eng' siriik ak eng' Pharisaik kowolji ineendet koleenji, “Kaneetindoni, kimache kegeer kabooruno kobunun.”

³⁹ Ki wolji kole, “Ibinda ne ya ak ne po ibeetapkei kocheeng'ei kabooruno! Ago ma kigoochin kabooruno kobatee kaboorunetap maotyot Jona.

⁴⁰ Ko uu ye ki mi Jona peetuusyek somok ak kemousyek somok moetap njiryot ne oo miising', ko uu nooto tuun tebee Weeriitap chii peetuusyek somok ak kemousyek somok ng'wony oriit.

⁴¹ Tuun tonondos piigap Nineveh ak ibini eng' kapkirwook ak korwookyi, amu kisik icheek eng' amdaetap Jona ak ogeero, mi yu ne oo kosiir Jona.

⁴² Ng'eetei tuun laitoryat kobogoryot koyoop murot komostap tai ak ibini eng' kapkirwook ak korwookyi, amu ki nyo kobun ole poochin ng'wony si kogas utaatyetap Solomon ak ogeero, mi yu ne oo kosiir Solomon.

Koweegugei tamirmiryet ne murwon

⁴³ “Ye kagomang'une chii `tamirmiryet ne murwoon, kwo kobunoot oldinwek che yamyotiin kocheeng'oti ole imuung'ee, amanyoor

⁴⁴ komwa kole, ‘Kaweekyigei koonnyu ole ki amang'une.’ Ye kingo nyo, konyoor koma mi kiy, kobugot ak ko choboot.

⁴⁵ Yeityo kwo anyun komut oik alak tisap che yaach kosiir ineendet ak kochut ak komeny olooto; ak eng' let koyaitu atebeetap chiichooto kosiir ne ki po tai. Egu ko uu nooto agine eng' ibini ya.”

Tilyanutigap Jeso

⁴⁶ Kingo ta kong'alaaljin tuiyosyek, ko kitonondos eng' saang' kamet ak che tupcho, kocheeng'ei kong'alaalji ineendet.

⁴⁷ Ki mwachi chii age koleenji, “Keero, mi saang' kamenng'ung' ak che otupche, cheeng'ei kong'alaalun.”

⁴⁸ Ago ki wolji ineendet koleenji, “Ng'oo kamennyu ak che kitupche?”

⁴⁹ Kotokyin eunnyi kasubikyik, koleenji, “Ang'chu, kamennyu ak che kitupche!

⁵⁰ Amu age tugul ne yaei mageetap Abba ne mi kipsengwet, ko nooto weeriit ne kitupche ak chepto ne kitupche, ak kamennyu.”