MARIKO 9 - BUKUIT NE TILIIL Sireet ne Dutero Kanon

¹ Ak ki leenji icheek, “Amwaiwok iman ale, mi yu alak eng' chu tonondos che ma koi chamcham meet agoi kogeer laitornatetap Kamuktaindet konyonei eng' kamuktaet.”

Waletapkei ne po Jeso

² Kingo pata peetuusyek lo, komut `Jeso Petero, Jakobo ak Johana kotogosta tulweet ne kooi koba uwak icheegei. Kiwalak Jeso eng' tainnywa,

³ ak kolelagitu ngoroikyik miising' ko uu teluji, ne ma mi mwetindet ng'wony ne imuuchi komwet ko uu chooto.

⁴ Ki took eng' tainnywa Elijah ak Musa, kong'alaalndos ak Jeso.

⁵ Koleenji `Petero Jeso “Kaneetindoni, myee ketebi eng' yu. Ngeteech keryosyek somok si ko neng'ung' age, ko po Musa age, ak kobunji Elijah age.”

⁶ Ma nai kiit ne wolu amu kiga koaragenso miising'.

⁷ Ki nyo pooldet kotuch icheek ak komang'une pooldanooto tuugeet koleen, “Ni ko Weeriinnyu, chamanennyu; ogas iit ineendet!”

⁸ Ye kingo kuskong' eng' yooto kogeer komoswek tugul, ko mata kogeer chii komi kobooto icheeget, kobatee Jeso ineegei.

⁹ Kingo ta kochoorugei eng' tulweet, kong'at icheek koleenji amat komwachi chii tuguuk che kagogeer agoi kong'eet Weeriitap chii eng' che ki pek.

¹⁰ Ki riip ng'olyoondonooto ak koteebegei agobo kaguiyetap ng'eetyeet.

¹¹ ki teebee icheek ineendet koleenji, “Amu nee si komwaei siriik koleen nyoonei Elijah korook?”

¹² Koleenji icheek, “Iman, nyoonei Elijah korook si koweech tuguuk tugul ko uu ye kinye. Kitepto ano anyun si kesir agobo Weeriitap chii keele punei nyalilwogik che chaang' ak kiit ineendet koek puch?

¹³ Ago amwaiwok ale, kigonyo Elijah, ak ki yachi agine kiit age tugul ne kimachei icheek ko uu ye ki kisir agobo ineendet.”

Kisoobi weeriit ne tinyei tamirmir

¹⁴ Ye kingo pwa ole mi kasubik, kogeer tuiyet ne oo ko kayiem icheek, ak kiteepseen icheek alak eng' siriik.

¹⁵ Ye kingo keer tuiyet komugul ineendet, kokwong'yo miising', ak korwai ole mi, kogat.

¹⁶ Ak ki teebe icheek kole, “Oteebegei nee ak icheeget?”

¹⁷ Kowolji chiito age eng' tuiyet, koleenji, “Kaneetindoni, kaamutun weeriinnyu, ne tinyei tamirmir ne yaei konamak kuut;

¹⁸ ak oldo tugul ole namjin eng' kimnateet, kowiirchin ng'wony; tabugoni ak konyeei kelek ak kochuchui; ak kaamwachi kasubiguk koon komanda, ago ma imuuch.”

¹⁹ Ki wolji icheek koleenji, “Ee, ibinda ne ma tinyei kayaneet, atebye kobootok kot kotyanit? Amuitoiywok kot kotyanit? Omutwaa ineendet.”

²⁰ Ak ki imut `icheek ineendet komutyi Jeso. Ye kingo keer `tamirmiryet ne ya Jeso, kobirabirto weeroto miising'. Ki ibutyi ng'wony ak komelmelgei, kotabugani.

²¹ Ki teebe kwandanyi koleenji, “Ki namei kobooch au kiito?” Ak ki le, “Kobooch ko lakwa.

²² Ki kowiirchi konyil che chaang' ma ak ole mi peek, komachei kobar ineendet; ngimuuchi iyai kiy age tugul, irirenech ak itoretech.”

²³ Ki leenji Jeso, “Ngimuuchi! Imugaksei tuguuk tugul eng' ineendet ne iyani.”

²⁴ Kowaach anyun kwandap lakwanooto ak kole, “Ayani! Toreto eng' pistoennyu!”

²⁵ Kingo keer Jeso tuiyet korwou tugul, koger kong' tamirmiryet ne murwoon, koleenji, “Inyee, tamirmiryet ne iyaei lakwani konamak kuut ak ko miing'ak, kang'atiin ale, mong'u eng' ineendet, ak amatata ichut ineendet kogeny.”

²⁶ Kingo kagowaach tamirmiryet ak kobirto ineendet miising', komanda. Ki igei lakweet ne kagome kot komwa che chaang' kole, “Kagome.”

²⁷ Ago ki nam Jeso euut ak kong'eet; ak ki tonon.

²⁸ Ak ye kingo kakwo ko, koteebe kasubikyik ineendet komi icheegei kole, “Amu nee si ma kimuuch acheek keon?”

²⁹ Ak ki leenji icheek, “Ma imuuchi komanda ne uu ni eng' kiy tugul, kobatee saaet.”

Sip komwau kogeny Jeso agobo meennyi

³⁰ Ki pa anyun eng' olooto ak kobun kwenutap Galilaya; ak ki ma mach konai chii age tugul.

³¹ Amu ki ineeti kasubikyik, koleenjin, “Kindo Weeriitap chii eunegap piik ak kobar ineendet. Ye kagebar, kong'eet kogeny, ko kagobata peetuusyek somogu.”

³² Ago ki ma nai icheek ng'olyoondonooto, ak ki iywei koteebe ineendet.

Ng'oo ne oo?

³³ Ak ki pwa Kapernaum: ak ye ki mi ko koteebe icheek kole, “Ka nee ng'aleek che komwaonu eng' ooreet?”

³⁴ Ago ki siisyo: amu kitiitos icheegei eng' icheegei eng' ooreet koleen ng'oo ne oo.

³⁵ Ki tep ng'wony anyun, ak koguur chooto taman ak aeng'; ak koleenji, “Ngo machei chii koek ne po tai, koegu ne po let eng' tugul, ak koek otwogindetap tugul.”

³⁶ Ki nam lakweet ne ming'in ak konde kwenunnywa. Kiganap eng' eunekyik ak koleenji,

³⁷ “Age tugul ne taachei age eng' lagochu mengech eng' kainennyu, ko kataacha; ak age tugul ne taacha ko mataacha anee, ago ineendet ne ki iyookwo.”

Tebutyetap Johana

³⁸ Ki leenji `Johana ineendet, “Kaneetindoni, kogigeer chii ko oonei oik eng' kaineng'ung' ak kogietee, amu koma kosubwech.”

³⁹ Ago ki le Jeso, “Amoete; amu ma mi chii ne yaei poisyet ne po kimnateet eng' kainennyu, ak komuuch kochepchebit komwaitaena yaityo.

⁴⁰ Amu ineendet ne ma kirindoech ko nenyo.

⁴¹ Amu age tugul ne inagok peegap kigombet oee, amu oo po Kristo, amwaiwok iman ale, ma petyin melektanyi.

Kanagutik

⁴² “Ak age tugul ne inachi age eng' chu mengech che iyana, ko kaigai eng' ineendet kirooch kaatinnyi koitap pai ne oo, ak kewiirchi araraita.

⁴³ Ak ngo nachin eung'ung', itil. Kaigai eng' inyee imong'ji saboondo ii po mugung', kosiir itinye eunek aeng' ak iwe Gehenna, maat ne ma misoksei.

⁴⁴ Ole ma pegu kutikwak, ama misoksei maat.

⁴⁵ Ak ngo nachin keeldong'ung', itil. Kaigai eng' inyee imong'ji saboondo ii po keelok, kosiir kewiirchin Gehenna ii po keelyek aeng'.

⁴⁶ Ole ma pegu kutikwak, ama misoksei maat.

⁴⁷ Ak ngo nachin kondang'ung', ibalu. Kaigai eng' inyee iit laitornatetap Kamuktaindet ii po kong'ak, kosiir kewiirchin Gehenna itinye koonyek aeng';

⁴⁸ ole ma pegu kutikwak, ama misoksei maat.

⁴⁹ “Amu kindoi chii age tugul muunyuk eng' maat.

⁵⁰ Myachen muunyuk: ago ngo pet anyinyindap muunyuk, kota ondoi nee si kochom? Ingotebee muunyuk mugulelwekwok, ak otebi eng' kaalyeet okweegei eng' okweegei.”