MARIKO 8 - BUKUIT NE TILIIL Sireet ne Dutero Kanon

Kobaei `Jeso piik eliphuusyek ang'wan

¹ Eng' peetuusyechooto ko ki piit kogeny tuiyet ne oo ak ki ma kotinyei kiy ne amei, koguur anyun Jeso kasubikyik ak koleenji,

² “Ariiree tuiyet, amu kagotebi kobooto nguno peetuusyek somok ak ma tinyei kiy ne amei.

³ Ngot aunde koba oldanywa koma am kiy, kotanuitos eng' ooreet, amu kagobun alak eng' icheek ole loo.”

⁴ Ki wolji kasubikyik kole, “Imuuchi konyoorunee ano chii magatiinik eng' emoni surkwen kobae pichu kot kobiyong'so?”

⁵ ki teebee icheek koleenji, “Otinye magatiinik ata?” Ak kole, “Tisap.”

⁶ Ki ng'at anyun tuiyet kotep ng'wony. Ki nam magatinichooto tisap ak kingo kagomwa kongoi, kobuutul ak kogoochi kasubikyik si konde tainnywa, ak kogoochinot tuiyet.

⁷ Ki tinyei njireenik che mengeechen che ng'ering'; ak kingo kagoberuur, kong'at konde chooto ak icheek tainnywa.

⁸ Ki amis ak kobiyong'so. Ak ki iyum katuganik, ak kiyam mesendoik tisap.

⁹ Ak icheeget ko ki olo po eliphuusyek ang'wan. Ak kiunda icheek koba.

¹⁰ Ak yeityo anyun kolaany moingetap peek kobooto kasubikyik ak koba komoswegap Dalmanuta.

Tebuutyetap Pharisaik

¹¹ Ki pwa Pharisaik ak kotoi koteepse ineendet. Kotyemei ineendet, ko kiteebe `icheek ineendet kigoochi kaboorunet ne punu kipsengwet.

¹² Ki ibuus ne nyigiis eng' muguleldannyi ak kole, “Amu nee si kocheeng'ei ibini kaboorunet? Amwaiwok iman ale, ma mi kaboorunet ne kigoochi ibini.”

¹³ Ak ki pagaakta icheek, ak kolaany moingetap peek kogeny, kolanda kwo pitet age.

Mermeregap Pharisaik ak che po Herod

¹⁴ Ak kiutye icheek koip magatiinik; ki ma kotinyei kiy eng' moinget kobatee magatyat agenge kityo.

¹⁵ Ki itigon icheek koleenji, “Oriipkei, ak oriibegei mermeregap Pharisaik ak mermereek che po Herod.”

¹⁶ Ki ng'alaaljingei icheegei koleen, “Abeere amu ma ki tinyei magatiinik.”

¹⁷ Ak kingo nai Jeso, koleenji, “Kalya si oteebegei ole motinye magatiinik? Tom onai anan oguiye? Ta ko uueen mugulelwekwok?

¹⁸ Otinye koonyek, amogeere kiy? Ak otinye iitiik, amogastoi? Amobwaati?

¹⁹ Yu kinga puutulji magatiinik muut piik eliphuusyek muut, ko ki tinyei kereboonik ata katuganik che ki koyum?” Koleenji ineendet, “Taman ak aeng'.”

²⁰ “Ak tisap eng' piik eliphuusyek ang'wan, koginyi mesendoik ata katuganik che ki koyum?” Ak koleenji, “Tisap.”

²¹ Koleenji icheek, “Tom oguiye?”

Kisoobi kipkoraatyat eng' Bethsaida

²² Ki it anyun Bethsaida. Ak kimutyi `icheek ineendet chii ne koraat ak kosoom kotwa ineendet.

²³ Ki nam eutap kipkoratyandanooto ak komut komandae nganaseet; ak ye kingo kagong'utyi konyekyik ak kogonoor eunekyik ineendet, koteebe kole, “Igeere kiy?”

²⁴ Ki inyal parak ak kole, “Ageere piik; amu ageere icheek ko uu keetiik, kobendi.”

²⁵ Yeityo kotwa eunekyik kogeny konyekyik; ak ki ichiil koonyek ak kisop, ak kogeer tuguuk tugul komyee.

²⁶ Ki unda kwo kaa, koleenjin, “Amewe nganaseet agot kitigin.”

Mwaetap Petero agobo Jeso

²⁷ Ki pa Jeso ak kasubikyik agoi nganasook che po Caesarea Philippi. Eng' ooreet koteebe `ineendet kasubikyik koleenji, “Mwaei piik kole aa ng'oo?”

²⁸ Komwachi koleenji, “Leen, ii Johana Kabatisanindet; koleen alak, ii Elijah; ak leen alak, ii agenge eng' maotik.”

²⁹ ki teebee icheeget kole, “Ago oleen okweek aa ng'oo?” Kowolji Petero koleenji, “Ii Kristo.”

³⁰ Ak ki ng'at icheek kole amat komwachi chii agobo ineendet.

Komwaei Jeso agobo meennyi ak ng'eetyeennyi

³¹ Ki toi koneet icheek kole, kanyool konyalil Weeriitap chii eng' tuguuk che chaang', ak koeesyo poisyek, tisiik che eecheen ak siriik ak kebar, ak ye igeskei peetuusyek somogu kong'eet kogeny.

³² Ki mwa ng'olyoondonooto kotook. Ak ki nam `Petero ineendet ak kotoi koger kong'.

³³ Ago kiwelelgei ak kogeer kasubikyik, ak koger kong' Petero ak koleenji, “Ui let eng' anee, Setani! Amu mebwaati tuguugap Kamuktaindet, ago tuguugap piik.”

³⁴ Ki kuur anyun tuiyet kobooto kasubikyik ak koleenji icheek, “Ngo machei chii age tugul kosubwo, koeesyogei ak kosut kimurtoiyondennyi ak kosubwo.

³⁵ Amu age tugul ne machei kosar saboondanyi kobeeti; ak age tugul ne ibeeti saboondanyi agobo anee ak logoiywek che myach kosaru.

³⁶ Amu nyooru porot nee chii, ngo nyoor ng'wony komugul, ak kobeet saboondanyi?

³⁷ Amu igoitoi nee chii kowale saboondanyi?

³⁸ Amu age tugul ne ililani agobo anee kobooto ng'aleekyuk eng' ibinita po sokseet ak tengek, ko tuun ililanjin agine Weeriitap chii ineendet, ye tuun nyoonei eng' liilindap Kwandanyi kobooto malaikaisyek che tiliileen.”