MARIKO 7 - BUKUIT NE TILIIL Sireet ne Dutero Kanon

Pitonwegap poisyek

¹ Ki iyumjigei ineendet Pharisaik ak alak eng' siriik che kiga pun Jerusalem,

² ak ki keer alak eng' kasubikyik koamei magatiinik eng' eunek che murwonen, nooto ko, eunek che ma kiuun.

³ Amu ngot koma iun eunekwak komyee Pharisaik ak Yahudik tugul koma amisyei, kosubi piteetap poisyek;

⁴ ak ye punu ye mi ole kiyae mung'aaret, ko ngot koma iungei koma amisyei. Ak miitei pitonwek alak che chaang' che kitaach si koriip komyee, ko uu kaunetap kigombok, tereenik ak tuguuk che po sugunwet.

⁵ ki teebee ineendet `Pharisaik ak `siriik kole, “Lyon si ma pendoti kasubiguk kosubi piteetap poisyek, ago amisye eunek ko murwonen?”

⁶ Ki mwachi icheek koleenji, “Kisip komwa Isaiah iman agobo okweek chombilik, ko uu ye siraat kole, ‘Teecha pichu eng' kutusweekwak, ago looen mugulelwekwak eng' anee.

⁷ Ilaswo puch; ng'atuutigap piik kaneetisyosyek che ineetisye.’

⁸ Obagaaktoi ng'atuutyetap Kamuktaindet, ak onamjigei piteetap piik.”

⁹ Ki leenji icheek, “Oeesyoi iman ng'atuutyetap Kamuktaindet si kobiit oriip piteeng'wong'!

¹⁰ Amu ki le Musa, ‘Teech kwandang'ung' ak kamenng'ung',’ ak, ‘Ineendet ne mwaei yaityet agobo kwanda anan kamet komeei iman.’

¹¹ Ago omwae ole ngo leenji chii kwanda anan kamet, ‘Kiit ne kata atoretenen ko Korban’ ye kiweech ko Kagoochinet,

¹² ko mata ochamji anyun ineendet kotoret kwanda anan kamet.

¹³ Oyai anyun ng'olyootap Kamuktaindet koek puch eng' piteeng'wong' ne ki ong'at. Ak oyae tuguuk alak che chaang' che uu chooto.”

Tuguuk che ng'emei chii

¹⁴ Ki kuur tuiyet kogeny kobwa ye mi ineendet ak koleenji, “Ogasa okweek tugul si oguiye:

¹⁵ Ma mi kiy ne mi chii saang' ne ngwo oriitinnyi komuuchi kong'wanit ineendet, ago tuguuk che mang'une chii ko chooto che ing'waniti chii.”

¹⁶ Ngo tinyei chii iitiik che kastoe, kogas.

¹⁷ Ye kingo pagaakta tuiyet kwo ko, koteebe kasubikyik agobo kalewenonooto.

¹⁸ Ki leenji icheek, “Tos motinye kaguiyet ak okweek? Mogeere ole kiy tugul ne mi saang' ak kwo oriit, koma koi imuuch kong'wanit chii,

¹⁹ amu ma chut muguleldanyi ago chutei moet, si komanda koba timiin?” (Uu nooto, kiitiliil amitwogik tugul.)

²⁰ Ak ki le, “Kiit ne mang'une chii ko nooto ne ing'waniti chii.

²¹ Amu mang'une oriit, eng' muguleldap chii, kabwaatutik che yaach: sokseet, choorsosyek, rumisyosyek, ibeetapkei,

²² kasetap myat, yaityet, ng'aalseet, mageet ne ya, kong' ne ya, ng'aleek che yaach, menoteet, ak perberyo.

²³ Mang'une oriit tuguuchuuto tugul yaacheen ak kong'wanit chii.”

Kayaneetap Kwony ne po Surophoenike

²⁴ Ki ng'eet ineendet eng' olooto ak kwo agoi tabanwegap Tyro ak Sidon. Ki wo koot age ak ki ma mach konai chii, nga ki ma imuuch koung'ak.

²⁵ Ak eng' sainooto, kingo kas kobogoryot age ne ki tinyei chepto ne ming'in ne kiga nam tamirmiryet ne murwoon agobo ineendet, konyo ak kobutyi keelyekyik.

²⁶ Ki po Yunanik kobogoryondonooto, ne kisalu pororyetap Surophoenike. Ak ki soom ineendet kole koon oindet eng' cheptonyi.

²⁷ Ak ki leenji ineendet, “Ingebai lagok korook, amu ma nyolu kenam amitwogigap lagok ak kewiirchi sesenik.”

²⁸ Ago ki wolji ineendet koleenji, “Wei, Kiptaiyat; nga amei sesenik ak icheek eng' kurereetap meset amitwogik che po lagok che iroroi.”

²⁹ Ak ki leenji kobogoryondonooto, “Ui anyun amu mwaoni; kagomang'une oindet cheptong'ung'.”

³⁰ Ki wo anyun koonnyi ak konyoor lakweet koruei eng' itook, ko kagomang'une oindet.

Kasoobetap chii ne ming'aat ak ko uui kuut

³¹ Ki manda kogeny eng' tabanwegap Tyro, ak ki iwerta kobun Sidon kot koit araraita ne po Galilaya, eng' tabanwegap Decapolis.

³² Ki kimutyi ineendet chii ne miing'at, ak ko uui kuut; ak kosoom kole kogonoor ineendet eunnyi.

³³ Ki imut chiichooto kwo taban eng' tuiyet, ak ki irooch moriikyik iitiigap chiichooto, yeityo kong'utyi ak kotwa ng'elyeptanyi.

³⁴ Ki inyal kipsengwet, kobus ak koleenji, “Epata!” Nooto ko, “Yaatage!”

³⁵ Eng' niito anyun koyatagis iitiikyik ak kotyagak ng'elyeptanyi, ak kong'alaal komyee.

³⁶ Ak ki ng'at icheek kole mat komwachi chii; ago ye kites kong'at icheek, kotes anyun pichooto komwaitaat.

³⁷ Ak ki kwong'yo miising' ne siirei koleen, “Kagoyai tuguuk tugul komyee; igoochin kogasta agot che ming'otin ak kong'alaal che namotin kuut.”