MARIKO 6 - BUKUIT NE TILIIL Sireet ne Dutero Kanon

Keesyoi Jeso eng' Nazareth

¹ Ki mong' ineendet eng' olooto ak konyo agoi nganaseetap emennyi, kobendoti ak kasubikyik.

² Kingo it sabato kotoi koneetis eng' sinagogit, ak ki kwong'yo che chaang' che ki kas ineendet ak koleen, “Nyoorunee ano chiichi tuguuchu? Nee utaatyoni ki kigoochi chiichi? Nee poisyonichu kiimeen yaaksei eng' eunekyik?

³ Tos ma musogindet niito, weeriitap Maria, ne tupcho ak Jakobo, Joses, Judah, ak Simion? Tos ma mi kobootech eng' olinyo chepkametisyekyik?” Ak kinyoor kanagutyet eng' ineendet.

⁴ Ak ki leenji `Jeso icheek, “Nyooru maotyo teegisto, kobatee eng' emennyi, ak eng' che po ooreennyi ak eng' koonnyi.”

⁵ Ki mata komuuch koyai kwang'utyo age tugul eng' olooto, kobatee piik che ng'ering' che ki myandos che kigonoor eunekyik ak kosaap icheek.

⁶ Ak ki kwong' ineendet amu pistoennywa. Ak kiwendote nganasook koneetisyoti.

Koyooktoi kasubikyik chooto taman ak aeng'

⁷ Ki kuurchigei anyun taman ak aeng', ak kotoi koyookto kobee aeng' aeng', ak ki igoochi icheek kimnateet koterteer tamirmirik che murwonen.

⁸ Ki ng'at icheek koleenji, “Mat oip kiy ne po panda kobatee kirokto kityo; agot magatyat, anan suberet, anan sendeisyek eng' lolet;

⁹ oba olaachi kweonik ago mat olaach sumotik aeng'.

¹⁰ Ye kobe ko age tugul, otebi yooto agoi obe eng' olooto.

¹¹ Ak oldo age tugul ne mataachak, ama cham kogasak, ye omande eng' olooto, olelekte temburyek che mi keelyekwok si kobiit koek paornateet eng' icheek.”

¹² Ki manda ak koamdaat kole kanyool kosik piik.

¹³ Ki oon oik che chaang', ak koilee `mwaita che chaang' che ki myandos ak kosaap icheek.

Meetap Johana kabatisanindet

¹⁴ Ki kas laitoryat Herod agobo nooto; amu kiga konaak kainenetap Jeso ak ki le alak, “Kagong'eet Johana kabatisanindet eng' che ki pek, nooto anyun poisyei kimnatosyechu eng' oriitinnyi.”

¹⁵ Ago ki mwa alak kole, “Elijah ineendet.” Ak ki le alak, “Maotyo ineendet, anan uu age eng' maotigap keny.”

¹⁶ Ago ye kingo kas Herod kole, “Johana niito, ne ki atile metit, kagong'eet.”

¹⁷ Amu kiga koyookto `Herod ineendet piik, koba konam Johana, ak korat eng' korgoreet, amu Herodias osotyotap Philipu ng'eetap kamet, amu kiga kobaigei ineendet ak kwonyooto.

¹⁸ Amu ki mwachi `Johana Herod koleenji, “Etei ng'atuutik otebi ak osotyotap ng'eetap kamenng'ung'.”

¹⁹ Ak kiwech `Herodias ineendet, ak kimach kobar. Ago ma imuuch,

²⁰ amu ki iywei `Herod Johana ak ki riip, kongen kole ineendet ko chii ne po imanda ak ko tiliil. Ye kingo kas Herod ng'aleekyik, koiimgei miising'; nganda ki cham koboiboenjin kogas ineendet.

²¹ Ki it anyun peetuut ne nyolu, ye ki yai Herod igoorto ne po peetuutap sigennyi, koyachi piikyik che eecheen, kiptainik, ak che taagunotiin che po Galilaya.

²² Kingo nyo ko cheptap Herodias ak koureren, kobaibai Herod ak icheek che kitebyei eng' amisyet kobooto ineendet; ak ki leenji `laitoryat chebooto, “Sooma kiy age tugul ne imache si agoonin.”

²³ Ak ki iyasyechi kole, “Kiy age tugul ne isooma agoonin, agot kebebertap laitornatennyu.”

²⁴ Ki manda ak komwachi kamet kole, “Asoom nee?” Ak ki leenji, “Metitap Johana Kabatisanindet.”

²⁵ Ak yeityo konyo kochook agoi ole mi laitoryat ak kosoom kole, “Amache ale igoono nguno metitap Johana Kabatisanindet eng' tageito.”

²⁶ Ki aragen anyun miising' laitoryat; ago amu kayosyautikyik, ak amu icheeget che kitebyei eng' amisyet, ko mata koete ineendet.

²⁷ Ara ki iyookto laitoryat asigarindet age eng' che kiriipsei kong'at kole keip metitap Johana. Ki wo anyun kotil metit eng' korgoreet,

²⁸ ak ki ip metoto eng' tageito, ak kogoochi chebooto; ak kogoochi chebooto kamet.

²⁹ Ye kingo kas kasubikyik agobo ng'olyoondonooto, kobwa ak kosut poortanyi, ak konde kererit.

Kebaei piik eliphuusyek muut

³⁰ Ki iyumjigei Jeso che kiyooktoi ak komwachi ineendet tuguuk tugul che kiga koyai ak tugul che kiga koneet.

³¹ Ki mwachi icheek koleenji, “Obwa okweegei taban ole surkwen, si omuuny kitigin.” Amu ki chaang' che kibwanei ak kobendi, ak ki ma kotinyei agot poroindo ne amisye.

³² Ak ki pa icheegei eng' moingetap peek kolang'ji surkwen.

³³ Ak kigeeroti piik kobendi, ak ki nai che chaang', ak ki rwai koba olooto kibagenge kobunu nganasook tugul, ak kondoe icheeget.

³⁴ Ak kingo lang' Jeso kogeer tuiyet ne oo, ak koriiregei icheek, amu ki uu keechiirek che ma tinyei mestowo; ak ki toi koneet icheek tuguuk che chaang'.

³⁵ Ye kimachei koimen, kobwonji ineendet kasubikyik ak kole, “Surkwen oli, ak machei koimen nguno.

³⁶ Mete piik koba emet ak nganasook che mi komoswek ole neegit, si koaljigei tuguuk che amei.”

³⁷ Ago ki wolji koleenji, “Ogoochi okweek amitwogik.” Ki leenji, “Kibe keal magatiinik che po dinarisyek pogol aeng', si kigoochi koam?”

³⁸ Ki leenji icheek, “Otinye magatiinik ata? Oba ogeer.” Ak kingo kagonai, kole, “Muut, ak njireenik aeng'.”

³⁹ Ki ng'at kole kobuur piik eng' susweek che nyalileen, korurugotkei.

⁴⁰ Ara ki tep ng'wony kotetatkei, kobee pogol ak kobee konom.

⁴¹ Ki nam magatinichooto muut ak njireenik aeng', ak konyal kipsengwet, koberuur, ak kotonaton magatiinik. Ki igoochi kasubikyik si konde tainnywa; ak kipchechi icheeget tugul injirenichooto aeng'.

⁴² Ki amis tugul ak kibiyong'so.

⁴³ Ki iyum katuganik che ki nyi kereboonik taman ak aeng', che po magatiinik ak njireenik.

⁴⁴ Icheeget che ki am magatinichooto ko ki murenik eliphuusyek muut.

Kowendoti Jeso eng' peek parak

⁴⁵ Ki ichiich `Jeso kasubikyik kolaany moinget si kondoe ineendet koba pitoniin agoi Bethsaida, ak ya tugul kotyaachi tuiyet koba.

⁴⁶ Ye kingo kagobagaakta icheek, kwo tulweet kosa.

⁴⁷ Kingo ek koskoleny, komi moinget kwenutap araraita, ak ki mi ineegei emet ne yaamaat.

⁴⁸ Kingo keer icheeget konyalildos eng' poisyetap mugangok che ki kwerye moinget, amu ki kirindoi usoonet icheeget, konyo ole mi icheeget eng' riipseet ne po ang'wan ne po kemoi, kowendote araraita parak. Ki machei kosiirtoe icheeget,

⁴⁹ ago kingo keer icheek ineendet kowendoti eng' araraita parak, koleen icheeget abeere tamirmiryet, ak ki waakyo;

⁵⁰ amu ki keer icheek tugul ineendet, ak ki aragenso. Ak kitwekyi icheek koleenji, “Onyiganitu! Aa ineendet. Amoaragen.”

⁵¹ Ki laany ineendet moinget kwo ole mi icheek ak ki siis usoonet. Ki kwong'yo miising' pichooto,

⁵² amu ki ma nai icheek agobo magatiinik, amu ki uueen mugulelwekwak.

Kisoobi che ki myandos eng' Gennesaret

⁵³ Ye kingo kagolanda, koit emetap Genesaret ak korat moinget eng' ngeguut.

⁵⁴ Ye kingo mong' eng' moinget, konai `piik ineendet eng' sainooto,

⁵⁵ ak korwaat eng' koronooto komugul, ak kotoi komut che myandos eng' itogusyekwak, koba ole kiga kasyi ineendet.

⁵⁶ Ak oldo tugul ole ki mong'ji nganasook che mengeechen, anan che eecheen, anan emet, ki inde che myandos ye mi sirosyek. Ki soom `icheek ineendet kole tamangap kocham kotwa agot tabandap ngoryennyi; ak tugul che kitiiny ineendet ko kisopcho.