MARIKO 5 - BUKUIT NE TILIIL Sireet ne Dutero Kanon

Kisoobi chiito ne ki tinyei oik

¹ Ki it icheek pitet age ne po araraita, agoi emetap Gerasenik.

² Ak kingo kagolong' eng' moingetap peek, kotuiyo ak chiito ne ki menyei ole ki mi kereeriisyek, ak kotinyei tamirmiryet ne murwoon.

³ Ki menyei ye mi kereeriisyek; ak ki ma komi chii ne kita komuuchi korat ineendet agot eng' nyororoit;

⁴ amu kiga kerate ineendet mugurek ak nyororosyek konyil che chaang', ak king'etyei nyororosyek ak kotonaton mugurek; ak ki ma komi chii ne ki imuuchi koboi ineendet.

⁵ Ki waagaati peetuusyek tugul, kemoi ak peet, eng' kereeriisyek ak tuloonook, ak kotilegei koik.

⁶ Kingo keer `ineendet Jeso eng' ye loo, kolabat ole mi ak kogutung'ji;

⁷ ak kowaach eng' tuugeet ne oo kole, “Iting'eno nee inyee Jeso, Weeriitap Kamuktaindet Ne Toroor Miising'? Asoomin eng' Kamuktaindet ale amenyaliila.”

⁸ Amu kigaleenji ineendet, “Mong'u eng' chiichi, inyee tamirmiryet ne murwoon!”

⁹ Ak ki teebe ineendet koleenji, “Ng'oo kaineng'ung'?” Koleenji ineendet, “Kainennyu ko Chaang'indo, amu ki chaang'.”

¹⁰ Ki soom ineendet miising' kole, amaon komanda eng' emonooto.

¹¹ Ak ki mi tegeiyatap tulweet akweet ne oo ne po toorook che ki agetoos.

¹² Ak ki soom koleenji, “Iyanwech kechut toorook.”

¹³ Ki iyanji icheek, ak ki manda tamirmirik che murwonen koba kochut toorook. Ki rwai akweetap toorook, che neegit eliphuusyek aeng' kochoortaegei chemng'eisut koba kochoorchigei ak kobekyi araraita.

¹⁴ Ki mweiso anyun che ki iyagi toorook ak komwaitaat eng' nganaseet ak eng' emet. Ak ki pwa anyun piik kogeer kiit ne kagoyaak.

¹⁵ Ki pwa ole ki mi Jeso ak kogeer ineendet ne kiga konam oik, kotebyei ko kagolaach ngoroik, ak ko kagong'omit ineendet ne ki tinyei chaang'indap oik; ak ki aragenso pichooto.

¹⁶ Ki mwaita paorinik komwachi piik kiit ne kiyaak eng' ineendet ne ki tinyei oik, ak kiit ne kiityi toorook ak icheek.

¹⁷ Ki toi piik komwachi ineendet kole kwo eng' kiwotosyekwak.

¹⁸ Ye ki laanyei moingetap peek, kogaigai ineendet ne kiga konam oik kole kotebi tuwai.

¹⁹ Ki ma chamji Jeso, ago ki leenji, “Ui kaa ole mi choronoguk, ak iboorchi tuguuk che eecheen che kagoyaun Kiptaiyat, ak ko uu ye kagobooruun rireenet.”

²⁰ Ki nam pandanyi ak kotoi komwaita eng' Decapolis tuguuk che eecheen che kayachi `Jeso ineendet; ak ki kwong'yo piik tugul.

Cheptap Jairo ak kobogoryot ne kimyani

²¹ Ye kingo kagolanda Jeso kogeny eng' moinget kwo pitoniin, koyumjigei tuiyet ne oo komi ineendet ye neegitee araraita.

²² Ki nyo agenge eng' pounigap sinagogit ne kiguure Jairo, ak kingo keer ineendet, kobutyi keelyekyik,

²³ ak kosoom miising' koleenji, “Neegit kome cheptonyu ne ming'in. Nyoo igonoor ineendet euneguk, si kosap.”

²⁴ Ki pa anyun kobooto ineendet. Ki isup ineendet tuiyet ne oo ak ki igiich ineendet.

²⁵ Ki mi kobogoryo ne kiga komandae korotiik eng' kenyiisyek taman ak aeng'.

²⁶ Kiga konyalil ineendet miising' agobo chepkerichinik che chaang', ak kiga kogoito tuguukyik tugul che ki tinyei ama toret kiy, ago kitesak myando koyait.

²⁷ Kingo kas agobo Jeso, konyo kosubu ineendet ak tuiyet ne ki mi let ak kotiiny ngoryennyi.

²⁸ Ki leenjigei, “Ngatiiny agot ngoroikyik, kisoobo.”

²⁹ Ye kingo tiiny, kogisiis mandaetap korotiik ak kogas eng' poortanyi kole kagisoop eng' kaimutyennyi.

³⁰ Kingo nai Jeso kole, kagoistoegei kimnateet, koweleljigei tuiyet ak kole, “Ng'oo ne katiiny ngoroikyuk?”

³¹ Ak ki leenji `kasubikyik ineendet, “Igeere ole tee tuiyet ak ileen, ‘Ng'oo ne katwaa?’ ”

³² Kiguskong' kotabendo komoche konai kole ng'oo ne katiiny.

³³ Ago ki nyo kobogoryondonooto ko kagonai kiit ne kageyachi, ak kobutyi tainnyi koarageni ak kobotani, ak komwachi `ineendet imanit tugul.

³⁴ Ki leenji ineendet, “Chebi, kagosaabin kayaneng'ung'; ui eng' kaalyeet, ak isap eng' myandang'ung'.”

³⁵ Kingo ta kong'alaali ineendet, kobwa piik che punu kootap pounindet ne po sinagogit ak kole, “Kagome cheptong'ung'. Kata iimji nee kaneetindet?”

³⁶ Ago ma mage kiy Jeso ng'olyoot ne kagimwa, koleenji pounindetap sinagogit, “Meiywei, iyan kityo.”

³⁷ Ki ma chamji chii koosup ineendet kobatee Petero, Jakobo ak Johana ng'eetap kametap Jakobo.

³⁸ Ki it `icheek kootap pounindetap sinagogit, ak ki keer piik che sololendos, kobooto che riirtos ak koteeitos miising'.

³⁹ Ye kingo kakwo ko, koleenji pichooto, “Kalya si owasegei ak orirtosi? Tom kome lakweet ago inuuchi.”

⁴⁰ Ak kirorechi ineendet kochot. Ye kingo kagoon ineendet pichooto tugul koba saang', komut kwandap lakweet ak kamet kobooto che ki mi ak ineendet ak kwo ko ole mi lakweet.

⁴¹ Kingo kagonam eutap lakweet koleenji, “Talitha koum,” ye kiweech ko, “Chebi, amwaun ale, ng'eet!”

⁴² Ki ng'eet chebooto ak kowendot; (ki po kenyiisyek taman ak aeng'). Eng' yooto ko ki nam icheek kwong'eet ne oo.

⁴³ Ki ng'at `ineendet icheek miising' kole amat konai chii ng'olyoondoniito, ak ki mwaita kigoochi tuguuk che amei.