MARIKO 14 - BUKUIT NE TILIIL Sireet ne Dutero Kanon

Kocheeng'ei piik ole partoi Jeso

¹ Ak kingo pata peetuusyek aeng'u kobiit igoortap paska ak magatiinik che ma kinde mermereek: ak ki cheeng' tisiik che eecheen ak siriik ole imuktoi konam eng' ng'aalseet, si kobiit kobar ineendet:

² amu ki le icheeget, Amat ongenam eng' igoorto, si ma polyo piik.

Keroong'jin mwaita Jeso eng' Bethania

³ Ak ye ki mi ineendet Bethania eng' kootap Simion ne ki tinyei mogondosaik, kota kotebyei eng' amisyet, konyo kobogoryot ne tinyei chuboit ne mi mwaita ne nyamdut ne po kamanuutyet ne oo; ak kotui chuboinooto, ak koroong'ji metinnyi.

⁴ Ak ki mi alage che ki nereektos eng' oriit koleen, Amu nee si kibeet puch mwai?

⁵ Amu katayamei kealdae mwai che siirei dinarisyek pogol somok, ak kigoochi kibananook. Ak ki ing'unyng'ung'ji ineendet.

⁶ Ago ki le Jeso, “Omete; kalya si oiim ineendet? Kayaiywo poisyet ne myee.

⁷ Amu otinye kotugul kibananook, ak eng' ui tugul ye omache, omuuchi oyachi ne myee: ago ma mi anee kotugul kobootok.

⁸ Kagoyai ne imuuchi: kasip koiil poortanyu amait ketupo.

⁹ Ak amwaiwok iman ale, ui tugul ole ki amjin logoiywek che myach eng' ng'wony komugul kemwaitoi agine yautyoni po kobogoryondoni, ak egu niito ne kibwaatee ineendet.”

Chaamset ne kichaame `Judas Jeso

¹⁰ Ak ki wo Judas Iskaryot, ne ki age eng' taman ak aeng', ole mi tisiik che eecheen, si kobiit kong'wekyi icheeget.

¹¹ Ak kingap kagas icheek, koboiboitu ak kogasyin kogoochi fedhaisyek. Ak ki cheeng' sait ne yamei si kong'wekta ineendet.

Igoorta ne po let

¹² Ak eng' peetuut ne po tai ne po magatiinik che ma kinde mermereek, ye kienyei aarwetap paska, koteebe kasubikyik koleenji, “Imache keebe ano si kechobuun ole iame paska?”

¹³ Ak ki iyookto aeng' che po kasubikyik, koleenji, “Oba nganaseet, ak ye otuiye chiito ne ibu tereetap peek, osup ineendet;

¹⁴ ak oldo tugul ole mong'jin ineendet, oleenji chiitap ko po koot, ‘Kale Kaneetindet: Mi ano koonnyu ne po toek, ole anyoone aame igoortap paska kobooto kasubikyuk?’

¹⁵ Ak koboorwok ineendet koot ne oo ne po parak ne choboot ak ko tetat, ak ochobwech olooto.”

¹⁶ Ki pa anyun kasubik, kot koit nganaseet, konyoor ko uu ye kagagemwachi: ak ki chop anyun paska.

¹⁷ Ak kingo ek koskoleny konyo kobooto taman ak aeng'.

¹⁸ Ak ye kitebyei eng' amisyet, kole Jeso, Amwaiwok iman ale, Ng'wekto age eng' okweek, ineendet ne ki amisyei tuwai.

¹⁹ Kotoi anyun koaragenso, ak koleenji ineendet agenge agenge, Tos anee?

²⁰ Ak ki leenji icheek, Nooto ko agenge eng' taman ak aeng', ne kiburburtoi tuwai eng' taabeet.

²¹ Amu wendi Weeriitap chii, ko uu ye siraat agobo ineendet: ago Pwo! Eng' chiichooto king'wektae Weeriitap chii! Kita myee eng' chiichooto koma ki sich.

Igoortap Kiptaiyat

²² Ak ye ki amisyei icheeget, konam magatyat, ak kingo kagoberuur, kobuutul ak kogoochi, ak kole, “Onam magatyandani: ni ko poortanyu.”

²³ Ak yeityo konam kigombet, ak kingo kagomwa kongoi, kogoochi icheek: koee tugul kigombanato.

²⁴ Ak koleenji, “Chu ko korotiikyuk che po arorutyet, che kitumdoi agobo che chaang'.

²⁵ Amwaiwok iman ale, ma aee kogeny che po logoegap sabibuk, agoi peetuunooto ne aee che leelach eng' laitornatetap Kamuktaindet.”

²⁶ Ak kingo kagotyen tyendo, komanda koba tulweet ne po Mseituni.

Kemwai agobo eesyoetab Petero

²⁷ Koleenji `Jeso icheek, Kinachok okweek tugul: amu ki kisir keele, Abire mestowot, ak koiyesta keechiirek.

²⁸ Ago, ye kaging'eeta, andoenok awe Galilaya.

²⁹ Ago ki leenji Petero, Agot nginach tugul agobo inyee, koma kinacha.

³⁰ Ak ki leenji `Jeso ineendet, Amwaun iman ale, rani, kemouni, kotom koote kipsoiywet konyil aeng', ieesyoa konyil somok.

³¹ Ak ki mwa eng' kimnateet ne oo kole, “Ngo nyolu kebegu tuwai, koma koi aeesyen.” Ak ki mwa ak icheek tugul ko uu nooto.

Jeso eng' Gethsemane

³² Ak kiit kooret ne kiguure Gethsemane, ak ki leenji kasubikyik, Otebee yu, ye asaae.

³³ Ak ki imut Petero ak Jakobo ak Johana, ak kotoi kokwong'yo miising' ak koaragenso.

³⁴ Ak ki leenji icheek, Kaaragen saboondanyu miising' agoi meet: otebee yu ak oriipse.

³⁵ Ak ki wo tai kitigin, ak kobutyi ng'wony, ak kosa kole, ngo mugaksei, ko myee kosiirtoena sainiito.

³⁶ Ak ki mwa kole, “Abba, Kwanda, imugaksei tuguuk tugul eng' inyee; istaena kigombani; ago, ma ko uu ye amache, ago ko uu ye imache.”

³⁷ Ak ki nyo ak konyoor icheek koruitos, ak koleenji Petero, “Simion, irue? Ma imuuch iriipse agot sait agenge?

³⁸ Oriipse ak osaae, si mochut yoomseet: chamei muguleldo iman, ago nyaluli poorto.”

³⁹ Ak ki wo kogeny, ak kosa komwa ng'aleechugaita.

⁴⁰ Ak ki nyo kogeny, ak konyoor koruitos, amu kiga nyigisitu miising' konyekwak; ak ki ma kongen kiit ne woljin ineendet.

⁴¹ Ak ki nyo ne po somok, ak koleenji icheek, Oruiye anyun nguno, omuuny: kagoyam; kagoit sait; ogeero, kageng'wekyi Weeriitap chii eunegap kiptengeginik.

⁴² Ong'eetyee, keebe: ogeero, kagoriik ineendet ne ng'wektoo.

Kenamei Jeso

⁴³ Ak eng' yooto kota kong'alaali, konyo Judas, age eng' taman ak aeng', kobooto tuiyet che tinyei rotoogap chok ak kirokweek, kobunu ole mi tisiik che eecheen ak siriik ak poisyek.

⁴⁴ Ak kiga koarorchi ng'wektaindet icheek, koleenji, “Ineendet ne ang'ututi ko ineendet nooto; onam, ak omut ak oriiboote. ”

⁴⁵ Ak kingo it, kwo eng' sainooto ole mi ineendet ak kole, “Rabbi!” ak kong'utut.

⁴⁶ Ak ki iyogoito pichooto eunekwak ak konam ineendet.

⁴⁷ Ago king'us rotwennyi po chok age eng' che kitonondos eng' ye neegit, ak koep iititap otwogindetap tisiindet ne oo.

⁴⁸ Ak ki wolji Jeso koleenji, “Komong'u ak rotoogap chok ak kirokweek, ko uu ye osetyini rebindet, si onama?

⁴⁹ Ki ami kobootok peetuusyek tugul eng' Hekaluut aneetisyei, ak ki ma onama. Ago kayaak ni si kobiit kosulda siruutik.”

⁵⁰ Ak ki pagaakta icheek tugul ineendet ak komwei.

⁵¹ Ak ki isup ineendet mureno age, ne ki ilaachi angeet ineegei ne po katanit, ak konam pichooto ineendet;

⁵² ak kometo ngoryonooto po katanit, komwei aach ngor.

Komi Jeso taitap kapkirwook

⁵³ Ki imut Jeso anyun kwo ole mi tisiindet ne oo: ak koyumjigei ineendet tisiik tugul che eecheen ak poisyek ak siriik.

⁵⁴ Ak ki isup Petero ineendet eng' ye loo, agoi koit seremutap kootap tisiindet ne oo; ak kitebyei kobooto ng'atik, koyue maat.

⁵⁵ Ki cheeng' anyun tisiik che eecheen ak kapkirwooget komugul paornateet eng' Jeso si kobiit kobar; ago ki ma nyoor.

⁵⁶ Amu kibaoryanji che chaang' lembech agobo ineendet ak ma namgei paornatennywa.

⁵⁷ Ak kitononso alak, kobaoryan lembech agobo ineendet, kole,

⁵⁸ Kigegas komwaei ineendet koleen, Ang'eme hekaluni ki kiyae eunek, ak ateech age eng' peetuusyek somok ne ma kiyae eunek.

⁵⁹ Agot eng' nooto koma namgei paornatennywa.

⁶⁰ Ki tonon anyun tisiindet ne oo eng' kwenunnywa, koteebe Jeso, kole, “Mewolu kiy? Nee ni paoryanjinin pichu?”

⁶¹ Ago ki siis, ama wol kiy. ki teebee kogeny tisiindet ne oo, kole, “Tos ii Kristo inyee, Weeriitap Ne Iberuurot?”

⁶² Ak ki le Jeso, “Aa ineendet; ak tuun ogeere Weeriitap chii kotebyei eng' eutap tai ne po kamuktaet, konyonei eng' poolik che po kipsengwet.”

⁶³ Ak kigereer ngoroikyik tisiindet ne oo, koleen, Ta kemage nee paorinik alak?

⁶⁴ Kaogas ng'aleek che yaach che mwaei: obwaati nee? Ak ki irwookyi tugul kole nyoljin meet.

⁶⁵ Ak ki toi alak kosing'ilji ineendet ak kotuch togeennyi, ak koluch, ak koleenji, “Ng'orse!” Ki nam `riibiik ineendet ak korabach.

Kotuuche `Petero Jeso

⁶⁶ Ak kingo ta komi Petero seremut ole po ng'wony, konyo age eng' tiibiik che otwogigap tisiindet ne oo;

⁶⁷ ak kingo keer Petero koyue maat, kochiilji kong' ineendet ak koleenji, “Ki imi aginye kobooto Nazaretindonooto, Jeso.”

⁶⁸ Ago ki tiiyo kole, “Mangen, amaguitosi chooto imwae.” Ak komanda kwo keter; ak kiito anyun kipsoiywet.

⁶⁹ Ak ki keer chebooto ineendet ak kotoi kogeny komwachi che tonondos eng' ye neegit, koleenji, “Ni ko agenge eng' icheeget.”

⁷⁰ Ak kitiiyo kogeny. Ak ne matya koleenji icheek kogeny che kitonondos eng' ye neegit Petero, “Iman ii agenge eng' icheek amu ii Galiilindet.”

⁷¹ Ak ki toi kochubis, ak koyasyo, kole, “Mangen chiichi omwae.”

⁷² Ak koma tyanit koote kipsoiywet ne po aeng'. Ak ki ibwaat anyun Petero ng'olyoondonooto, ko uu ye kiga komwachi `Jeso ineendet kole, “Kotom koote kipsoiywet konyil aeng', ieesyoa konyil somok.” Ak kingo pwaat ng'olyoondonooto, koriir.