MARIKO 11 - BUKUIT NE TILIIL Sireet ne Dutero Kanon

Taagetap Jeso eng' Jerusalem

¹ Ak ye kingo riikta Jerusalem, ak Bethphage ak Bethania, eng' tulweetap Mseituni, koyookto aeng' eng' kasubikyik,

² ak koleenji, “Oba nganaseet ne mi taing'wong'; ak onyooru eng' sainooto oite, moitap sigiryet ko rataat, ne tomo kolaany chii; otyach, ak ogetu.

³ Ak ngo teebenak chii kole, ‘Kalya si oyai ko uu ni?’ Oleenji, ‘Makyingei Kiptaiyat; ak kogoonok ogetu anyun.’ ”

⁴ Ki pa anyun, ak konyoor moitap sigiryet ko rataat, eng' saang'utap ormariich, eng' ole pesiap oor; kotyach.

⁵ Ak kiteebe alak che kitonondos eng' olooto koleenji, “Olyon, ngo tyachi moitap sigiryet?”

⁶ Komwachi icheek ko uu ye ki kamwachi Jeso; ak ki unda `pichooto icheeget koba.

⁷ Ak kiget moitap sigiryet konyo ole mi Jeso, ak kiito ngoroikwak eng' sigiryet; ak ki tebee `Jeso sigiryonooto.

⁸ Ak kiito piik che chaang' ngoroikwak eng' ooreet; ak ki indooti alage mooriigap keetiik, che kiebei eng' mbareenik.

⁹ Ak kimwaoti eng' kutit ne oo che ki indoi, ak che ki isubi, koleen “Hosanna! Iberuurot ineendet ne nyoonei eng' kainetap Kiptaiyat!

¹⁰ Iberuurot laitornatet ne nyoonei ne po kwandanyo Daudi. Hosanna eng' ole toroor miising'!”

¹¹ Ak ki mong'ji Jerusalem, ak kwo Hekaluut oriit; ak ye kingo kagogeerot tuguuk tugul, ak kiga koek koskoleny, kwo anyun Bethania kobooto taman ak aeng'.

Mogoiywet ne ma yiei logoek

¹² Ak kingo mong' icheeget karon eng' Bethania, koam rubeet ineendet.

¹³ Ak kingo keer eng' ole loo mogoywet ne tinyei sogeek, konyo, koleen tamangap konyoorchi kiy: ak kingo it ye mi keetoto, koma konyoorchi kiy kobatee sogeek kityo; amu kitom koit ye rure logoegap mogoonik.

¹⁴ Ak ki leenji keetoto, Kobooch nguno koma koamenen chii logoek agoi koigeny. Ak kigasei kasubikyik.

Kotiliili Jeso Hekaluut

¹⁵ Ak kiit Jerusalem: ak ki wo Hekaluut oriit, ak kotoi koon che ki aldaisyei ak che ki alisyee Hekaluut, ak kogabui mesosyek che po woliigap silingisyek, ak ng'echerok che po che ki aldoi cheptugenik;

¹⁶ ak ki ma chamji chii age tugul kobun Hekaluut koibei kiy.

¹⁷ Ak ki ineet icheek koleenji, “Siraat keele, ‘Koonnyu ko kootap saaet ne po pororyosyek tugul!’ Ago kaoyai okweek koek kebeneetap rebiik.”

¹⁸ Ak ki kas tisiik che eecheen ak siriik, ak kocheeng' ole partoi ineendet: amu ki iywei ineendet, amu kiga kwong' tuiyet komugul agobo kaneetisyennyi.

¹⁹ Ak kingo ek koskoleny komanda eng' nganaseet.

Kimnateet ne po kayaneet

²⁰ Ak ye kisiirtoi icheek karon, kogeer mogoywonooto ko kogores kot koit tigitik.

²¹ Kobwaat anyun Petero, koleenji, “Kaneetindoni, keero, kogores mogoywondoni koichube.”

²² Kowolji Jeso koleenji, “Oyan Kamuktaindet.

²³ Amwaiwok iman ale, chii age tugul ne leenjin tulwooni, ‘Kitutin ak kewiirchin araraita,’ koma soge eng' muguleldanyi, ago koyan kole, isuldoi tuguuk che kamwa; konyooru tuguuchooto.

²⁴ Nooto anyun amwaiwok ale, Tuguuk alak tugul che osoome eng' saaet, oyan ole kaotaach, ak onyooru.

²⁵ Ak ngo ting'ee chii ng'olyoo, ko ye otonon osaae, onyochi kaat, si konyoiywok kaat lelutikwok Kwandang'wong' agine ne mi kipsengwet.”

²⁶ Ago ngo monyochi kaat okweek, koma nyoiywok kaat lelutikwok Kwandang'wong' agine ne mi kipsengwet.

Koeesyoi piik kimnateetap Jeso

²⁷ Ak ki pwa kogeny Jerusalem: ak kingo ta kowendoti eng' Hekaluut, kobwonji ineendet tisiik che eecheen, ak siriik, ak poisyek;

²⁸ ak kiteebe kole, “Nee kimnateet ne iyae tuguuchu? Anan ng'oo ne kigoonin kimnatoni iyae tuguuchuuto?”

²⁹ Ak ki leenji `Jeso icheek, “Ateebenok ak anee ng'olyoot agenge, ak owolwo, si amwaiwok kimnateet ne ayae tuguuchuuto.

³⁰ Tos ki punu kabatisanetap Johana kipsengwet, anan ki punu piik? Owolwo.”

³¹ Ak kiteebegei icheegei kole, “Ngeele, ‘Ki punu kipsengwet,’ kole ineendet, ‘Kilya anyun si moyan?’

³² Ago ngot keele, ‘Ki punu piik’ amu ki iywei `icheek piik, amu kiga koyan piik tugul kole maotyot Johana iman.

³³ Ak ki wolji Jeso kole, ‘Ma kingen.’ Ak ki leenji Jeso anyun, ‘Ma mwaiwok agane kimnateet ne ayae tuguuchuuto.’ ”