MALAKI 2 - BUKUIT NE TILIIL Sireet ne Dutero Kanon

¹ Ee okweek tisiik, neng'wong' ng'atuutyoni.

² Ngot ko momache ogas, ak ngot ko momache ogonoree mugulelwekwok, si kobiit otoroor kainennyu, mwaei Kamuktaindet ne Toroor ne po lugoosyek, ayookwok anyun chubisyet, ak achup perurwogikwok. Ee, kaachup, amu mogonoree ng'atuutyonooto mugulelwek.

³ Ogeero, ang'eme iyoteng'wong', ak alage ng'atateek togoochikwok, ng'atateegap kagoochinoikwok; ak keistok kobooto tuguuchooto.

⁴ Ak onai ole ki ayookwok ng'atuutyoniito, si kotebi kayomisennyu kobooto Lawiik, mwaei Kamuktaindet ne Toroor ne po lugoosyek.

⁵ Ki mi kayomisennyu ne po saboondo ak kaalyeet kobooto ineendet; ak ki agoochi tuguuchooto ineendet si kobiit koiyweis, koiywea, ak kogonyit kainennyu.

⁶ Ki mi kutinnyi ng'atuutyetap imanit, ama ki nyoorchi kutinnyi kiit ne po lembech. Ki kibendate tuwai eng' kaalyeet ak eng' lititindo, ak koweech che chaang' kometo yaityo.

⁷ Amu kanyool koriip kutitap tisiindet naet, ak kocheeng' piik ng'atuutyet eng' ng'aleekyik; amu ineendet ko chiito ne iyooktoi Kamuktaindet ne Toroor ne po lugoosyek.

⁸ Ago ki omaste eng' ooreet; ki onach che chaang' eng' ng'atuutyet; ki ong'em kayomisetap Lawi, mwaei Kamuktaindet ne Toroor ne po lugoosyek.

⁹ Ki ayaak anyun oegu che kisasei ak ko nyerootiin eng' taitap piik tugul, ko uu ye ki ma oriip ortinwekyuk, ago ki otiytiy piik eng' ng'atuutik.

Ki kobut kayosyetap kayanjinet Israel

¹⁰ Tos ma ki tinyei acheek tugul kwanda agenge? Tos ma yaech Kamuktaindet agenge? Amu nee si koberber chii age tugul eng' acheek tupchennyi, kong'wanit kayomisetap kwanisyekyok?

¹¹ Kigong'em Judah kayaneet, ye kingo yai kiit ne kiwechei eng' Israel ak eng' Jerusalem; amu ki kong'wanit tiliilindap Kamuktaindet ne Toroor ne chamei, ak kotun cheptap kamuktaik che teer.

¹² Igeesu Kamuktaindet ne Toroor chiito ne yachin ineendet kiito, ineendet ne kosu ak ineendet ne wolu. Ki istoe icheek emaisyegap Jakobo, kobooto ineendet ne igoitoi kagoochinet, kogoochin Kamuktaindet ne Toroor ne po lugoosyek.

¹³ Ak ni kiit age ne oyae kogeny, otumjini peegap kong' kaptisisyetap Kamuktaindet ne Toroor, eng' riirek ak kateeiyet, kot koma koiti kogeny kagoochinet, ama kotaachei eng' chamyet che ogoochini eng' eunekwok.

¹⁴ Ago oteebe ole, “Amu nee si ma kotaachei?” Amu kogoek Kamuktaindet ne Toroor paoryat eng' kwenung'wong', inyee ak osotyotap ming'inateng'ung' ne ki iberber, nganda ineendet ko chamaneng'ung' ak ko osotyotap kayomisutyeng'ung'.

¹⁵ Tos ki ma yaak Kamuktaindet okweek tuwai oegu poorto agenge ak oegu saboondo agenge? Amu nee si koek agenge? Ki cheeng'ei iyoteet ne iywei Kamuktaindet. Oriip anyun mugulelwekwok, amat koberber chii osotyotap ming'inatennyi.

¹⁶ Amu aweche peesyet, mwaei Kamuktaindet ne Toroor, Kamuktaindetap Israel, ak ineendet ne tuge ngoryennyi sastaet, mwaei Kamuktaindet ne Toroor ne po lugoosyek. Oriip anyun mugulelwekwok, si moberberisye.

Peetuutap Kirwooget

¹⁷ Kooiim Kamuktaindet ne Toroor eng' ng'aleekwok. Ago oteebe ole, “Ki kiime nee?” Amu omwae ole, Myee age tugul eng' taitap Kamuktaindet ne Toroor ne yaei yaityet ak koboiboitune pichooto. Anan ye oteebe ole, “Mi ano Kamuktaindet ne po kirwoogetap imanda?”