LUKA 8 - BUKUIT NE TILIIL Sireet ne Dutero Kanon

Koamdoti Jeso

¹ Ak kingo pata nooto, ne matyanit, kowendote nganasook che eecheen ak che mengeechen koamdaati ak komwaitaati logoiywek che myach che po laitornatetap Kamuktaindet, ak ki mi tamanu ak aeng' kobooto ineendet,

² ak kobogorisyek alak che kiga kosoop eng' tamirmirik che yaacheen ak myanwogik, Maria ne kiguure Magdalene, ne kimandae oik tisabu,

³ ak Joana osotyotap Kusa kiboityotap Herod, ak Susannah, ak kobogorisyek alak che chaang', che kiboisyechin ineendet eng' tuguukwak.

Kalewenet agobo chii ne koolsei

⁴ Ak kingo yomogei tuiyet ne oo, ak kobwonji ineendet che ki punu nganaseet age tugul, kong'alaal eng' kalewenet kole:

⁵ Ki wo kolindet koleeta kesweekyik: ak ye kita koletoi, kobutyi alak ooreet taban; ak ki kityegat, ak koam toriitik che po parak.

⁶ Ak ki ibutyi alak rwandet; ak ye kingo piityo, koyaamyo, amu ma nyoor peek.

⁷ Ak ki ibutyi alak kwenutap katook; ak ki piityo katook kobooto keswechooto, ak kogiich.

⁸ Ak ki ibutyi alak ng'ung'unyek che myach, ak kobiityo, ak kooi age tugul pogol. Ak ye kita komwaei tuguuchu, komwa eng' kutit ne oo, kole, “Ineendet ne tinyei iitiik che kastoe, kogas!”

Tebseet agobo kalewenet

⁹ Ak kiteebe kasubikyik ole teptoi kalewenoni.

¹⁰ Ak ki le, “Kagigoonok okweek onai ung'ootik che po laitornatetap Kamuktaindet: ago kimwachin alak eng' kalewenaik; ‘si ye keertoi koma keerei kiy, si ye kasei koma naei.’

Ko ng'anyei Jeso kalewenet

¹¹ “Kalewenonooto ko ni: Kesweek ko ng'olyootap Kamuktaindet.

¹² Ak chooto mi ooreet taban ko icheeget che ki kogas; yeityo konyo chesawilyet, ak konem ng'olyoot eng' mugulelwekwak, si ma nyoor kayaneet ak kesar.

¹³ Ak icheeget che mi rwandet parak, ko ye kagas ng'aleek, koyan eng' poiboiyet, ak ma tinyei tigitik. Iyani ne matya, ak kochuchuigei eng' peetuutap yoomseet.

¹⁴ Ak che ki ibutyi katook, ko icheeget che ki kas, ak ye kaba kogiich kererwegap met ak mogornatosyek, ak poiboiyetap tuguugap sabooni, ama iyo logoek che nyiitootiin.

¹⁵ Ak che mi ng'ung'unyek che myach, ko icheeget, che ye kagogas ng'olyoot, konam komyee, eng' mugulelwek che po telunateet ak ko myachen, ak koiiyo logoek eng' kagiiletapkei.

Kaneetetapkei ne po tait

¹⁶ “Ma mi chii ne ye kagonaam tait kotuge kiy, anan konde kurereetap itoogut; ago indoi kiit ne tonone tait, si kobiit kogeer lapkeiyet piik che pwoonei ko.

¹⁷ “Amu ma mi kiy ne keunyei ne ma tuun ng'ang'oksei; ama mi kiy ne po ung'oot, ne ma tuun naaksei eng' ole lapkei.

¹⁸ “Oriipkei anyun eng' ole ogastoi: amu age tugul ne tinyei ko tuun kigoochin; ak ineendet ne ma tinyei ko tuun kirebe agot ne leen tinyei.”

Tupchondit ne po iman

¹⁹ Ak ki pwanji ineendet `kamet ak che tupcho, ago ki ma imuuch koriikyi amu chaang'indap piik.

²⁰ Ak ki kimwachi keleenji, Tonondos kamenng'ung' ak che otupche eng' saang', machei kogeerin.

²¹ Ago ki wolji koleenji, “Kamennyu ak che kitupche ko chu kasei ng'olyootap Kamuktaindet, ak koyai.”

Kegerei kong' usoonet ne oo

²² Ak ki laany moingetap peek eng' peetuut age eng' peetuusyechooto, kobooto kasubikyik; ak ki leenji, “Ongelandae araraita keebe pitoniin.” Kotoi anyun koba.

²³ Ak kingo ta kobendi, koru Jeso konuuch: kochoorchigei anyun usoonet ne oo araraita; kot komachei konyi peek moinget ak ki nyoonji ng'oiyondit.

²⁴ Ak ki pwa ole mi ineendet ak kong'eet, koleenji, “Kiptaiyat, Kiptaiyat, kagibegu!” Kong'eet anyun, ak koger kong' usoonet ak wasetapkei ne po peek: kosiis anyun araraita komung'do.

²⁵ Ak ki leenji icheek, “Mi ano kayaneng'wong'?” Ki iyweis ak kokwong'yo, koleenjigei icheegei, “Ng'oo chiichi anyun, ne ng'atei agot usoonet ak peek, kot kogas iit ineendet?”

Kisoobi chii ne ki tinyei oik

²⁶ Ki it anyun emetap Gerasenik, ne tokyingei Galilaya.

²⁷ Ak ye kingo nyo ngeguutap araraita, kotuiyo ak ineendet chiito age ne ki punu nganaseet, ne ki tinyei oik; ak ki ma kolaachi ngoroik kobooch peetuusyek che chaang', ak ki ma komenyei ko, ago kitebote kereeriisyek.

²⁸ Ak kingo keer Jeso, kowaach ak kobutyi tainnyi ak ki mwa eng' kutit ne oo kole, “Ating'enen nee, Jeso Weeriitap Kamuktaindet Ne Toroor Miising'? Kasoomin ale, amenyaliila.”

²⁹ Amu ki ng'at tamirmiryet ne murwoon komong' eng' chiichooto. Amu kiga nam eng' peetuusyek che chaang': ak ki kiriibei miising', ak kiga kirate nyororosyek ak mugurek; ak king'etyei tuguuk che kirate, ak ki oonei oindet ineendet kwo surkwen.

³⁰ Ak kiteebe Jeso, koleenji, “Kiguurenen nee?” Ak ki le, “Chaang'indo”; amu kiga chut oik che chaang' ineendet.

³¹ Ak ki soom kole si ma ng'at koba keriinget ne ma tinyei ole poochin.

³² Ak ki mi olooto akweet ne oo ne po toorook che ki agetoos eng' tulweet: ak ki soom icheek miising' kole kochamji kochut tooroochooto. Kochamji anyun.

³³ Ak ki mong' anyun oik eng' chiichooto, ak kochut toorook: ak ki rwai akweet kochoortaegei chemng'eisut koba araraita, ak kobek.

³⁴ Ak kingo keer che ki iyagisyei tuguuk che kabiit, komwaei, ak koba komwaita eng' nganaseet ak eng' emet agobo nooto.

³⁵ Ak ki pa kogeer kiit ne kagoyaak; ak ki pwa ole mi Jeso, konyoor chiichooto ne kamandae oik, kotebyei eng' keelyegap Jeso, kolaagat, ak kotinyei ng'omnatennyi: ak ki iywei.

³⁶ Ak ki mwachi icheek che kageerei tuguuk che kabiit, ole kagisaapto chiito ne katinyei oik.

³⁷ Ak ki soom anyun piik tugul che po ole neegitee emetap Gerasenik kole, kwo kobagaakta icheek; amu kiga nam icheek kaiyweisyet ne oo. Ki laany anyun moingetap peek, ak koweektagei.

³⁸ Ago ki soom ineendet chiito ne kamandae oik kole, kotebi tuwai; ago ki mwachi kwo, koleenji,

³⁹ “Iweekyigei koong'ung', ak imwaite tuguuk che eecheen che kagoyaun Kamuktaindet.” Ak ki wo anyun, komwaitaat eng' nganaseet komugul tuguuk che eecheen che kagoyachi Jeso.

Kisoobi cheptap Jairu ak kobogoryot ne kimandae korotiik

⁴⁰ Ak ye ki weeksei Jeso, kotaach tuiyet; amu ki igeni piik tugul ineendet.

⁴¹ Ak ogeero, ki nyo chiito age ne keguure Jairo; ki pounindetap sinagogit: ak ki ibutyi keelyegap Jeso, ak kosoom ineendet kole, konyo koonnyi:

⁴² amu ki tinyei chepto ne ki kisich ineegei, ne ki po olo po kenyiisyek taman ak aeng', ak ki neegit kome. Ago ki igiigoti tuiyosyek ineendet kowendi.

⁴³ Ak ki mi kobogoryot age ne kimandae korotiik kenyiisyek taman ak aeng', ne kiga koboisyee tuguukyik tugul eng' chepkerichinik, ama imuuch kosoop ineendet age tugul eng' icheek.

⁴⁴ Ki nyo anyun kobun let eng' ineendet ak kotwa tabandap ngoryennyi: ak koma tyanit kosiisyo korotiik.

⁴⁵ Ak ki le Jeso, Ng'oo ne katwaa? Ak kingo tiiyo tugul, koleenji Petero ak che ki mi kobooto ineendet, Kaneetindoni, kariichin tuiyosyek ak kagogiichin.

⁴⁶ Ago ki le Jeso, Kagotwaa chii: amu kaanai ale, kagomandaena kimnateet.

⁴⁷ Ak ye kingo keer kobogoryot kole, ma imuuch koung'ak, konyo kobotanonu, ak kobutyi ng'wony eng' tainnyi ak komwaita eng' taitap piik tugul kiit ne kaigoochi kotwa ineendet ak ole kagisaapto.

⁴⁸ Ak ki leenji, “Chebi, kagosaabin kayaneng'ung'; ui eng' kaalyeet.”

⁴⁹ Ak ye kita kong'alaali, konyo chii ne ki punu kootap pounindetap sinagogit, kole, “Kagome cheptong'ung' amatata iim Kaneetindet.”

⁵⁰ Ago kingo kas Jeso, kowolji koleenji, “Meiywei. Iyan kityo, si kisoop.”

⁵¹ Ak ye kingo kagoit koot, koma kochamji chii age tugul kwo ko kobooto ineendet, kobatee Petero, ak Johana, ak Jakobo, ak kwandap chebooto ak kamet.

⁵² Ak ki riirtos piik tugul, ak koteeitos agobo ineendet: ago ki le, “Morirtosi; amu ma me ineendet, ago inuuchi.”

⁵³ Ak kirorechi ineendet anyun kochot, amu ki ingen kole kagome.

⁵⁴ Ago ki nam ineendet eutap chebooto, ak koguur, kole, “Chebi, ng'eet”

⁵⁵ Koweek anyun saboondanyi, ak kong'eet. Ak ki ng'at kole, kigoochi kiy ne amei.

⁵⁶ Ak ki kwong'yo miising' sigiikyik; ak ki ng'at ineendet icheek koleenji, amomwachi chii age tugul kiit ne kagoyaak.