LUKA 24 - BUKUIT NE TILIIL Sireet ne Dutero Kanon

Ng'eetyetap Jeso

¹ Ak eng' peetuut ne po tai ne po wigiit, ko kaeech emet, kobwa kererit, koibu nyamdutik che kiga kochop.

² Ak kinyoor ko kagemilda koita eng' kererit.

³ Ak ki pa oriit, amanyoor poortap Kiptaiyat Jeso.

⁴ Ak kingap kagereer met agobo nooto, ogeero, kitonondos eng' ye neegit icheek murenik aeng'u che tinyei ngoroik che liilei piich:

⁵ ak kingo iyweis, kong'uruuk, kotiing'e togoochikwak ng'wony, koleenji icheek, Amu nee si ocheeng'e ne sabei eng' ye mi che ki kobek?

⁶ Ma komi yu, ago kagong'eet: obwaat kiit ne kimwaiwok kota komi Galilaya,

⁷ koleen kanyool kinde eunegap piigap tengek Weeriitap chii, ak kigartaat, ak kong'eet eng' peetuutap somok.

⁸ Kobwaat anyun ng'aleekyik,

⁹ ak koweektagei eng' kererit, ak komwachi taman ak agenge, ak chuun tugul alak.

¹⁰ Ki Maria Magdalene, ak Joana, ak Maria kametap Jakobo, ak kobogorisyek alak che ki mi kobooto icheek, che ki mwachi che kiyooktoi tuguuchooto.

¹¹ Ak ki keer pichooto ng'aleechooto ko uu tangoi; ak ki ma iyan icheek.

¹² Ago king'eet Petero, ak kolabat kererit; ki ing'uruuk koiit oriit, kogeer ngoroik icheegei; ak kwo, kokwong'oti agobo tuguuk che kagoyagis.

Koboorchingei `Jeso piik aeng' kobendi Emmaus

¹³ Ak ogeero, kibendi aeng'u eng' icheeget peetuunooto nganaseet age ne kiguure Emmaus, ne ki pandap maelisyek tisap ak nusu kong'etee Jerusalem.

¹⁴ Ak ki ng'alaaljinotigei agobo ng'aleechuuto tugul koyaagiis.

¹⁵ Ak kingo ta kong'alaaljinotegei ak koteebegei, koriikyi Jeso icheek ak koba tugul.

¹⁶ Ago kigerogis konyekwak si ma nai ineendet.

¹⁷ Ak ki leenji icheek, Nee ng'aleechu omwachinotige okweegei obendi? Ak kitononso, kosiiriny togoochikwak.

¹⁸ Ak ki wolji age eng' icheek, ne keguure Kleopa, koleenji, “Tos ii too inyee eng' Jerusalem si menai tuguuk che koyaagiis eng' olooto eng' peetuusyechu?”

¹⁹ Ak ki leenji icheek, Nee tuguuchooto? Ak ki leenji, “Tuguuk che kiyaak agobo Jeso ne po Nazareth ne ki maotyot ne kiim eng' poisyet ak ng'olyoot eng' taitap Kamuktaindet ak eng' piik tugul:

²⁰ ak ko uu ole ki igoito tisiik che eecheen ak pounikyok si kirwookyi kirwooget ne po meet, ak kigartaat.

²¹ Ago kogimang'u keleen ineendet ne ityaachi Israel. Ee, ak kobooto chooto tugul ko peetuutap somok rani kobooch ngap kobata ng'aleechuuto.

²² Ak kagoonech kobogorisyek alak che kagimi tugul kekwong', che kagamusta kererit;

²³ ak ye kamata konyoor poortanyi, kobwa, kole, kamong'ji icheek malaikaisyek, che kamwa kole, sabei ineendet.

²⁴ Ak kaba alak kererit che kami kobootech, konyoor ko uu nooto ko uu ye kagamwa kobogorisyek: ago ma keer ineendet.”

²⁵ Ak ki leenji anyun pichooto, “Ee, che perberen ak ko tamusen mugulelwek kot ko mata koyan tuguuk tugul che ki mwa maotik!

²⁶ Ki ma nyoljin Kristo konyalil eng' tuguuchu, si komong'ji toroornatennyi?”

²⁷ Ak ki toi kobooch Musa ak maotik tugul, ak ki iarorchi icheek eng' siruutik tugul ng'aleek agobo ineendet.

²⁸ Ak kingo riikta nganaseet ole kibendi koigei ineendet ne machei kosiirto.

²⁹ Ak ki isimji, kole, “Tebi kobootech: amu kariikta koimen, ak machei koratarat.” Ak ki wo ko kotebi tugul.

³⁰ Ak ye kingo kagotebi ng'wony tugul koamisyei, konam magatyat, koberuur, kobuutul, ak kogoochi icheek.

³¹ Ak ki yaatagis konyekwak, ak konai ineendet; kobetito eng' tainnywa.

³² Ak ki leenjigei icheegei, Tos kama lal maat eng' mugulelwekyok, yu kang'alaalwech eng' ooreet, kong'ang'wech siruutik?

³³ Ak ki ng'eetyo eng' sainooto, koweektagei Jerusalem, ak ki nyoor taman ak agenge ko katuiyo, ak che ki mi kobooto icheek,

³⁴ kole, “Kang'eet Kiptaiyat iman, ak kang'aang'jigei Simion.”

³⁵ Ak ki mwachi ng'aleek che kayaak eng' ooreet, ak ko uu ye kagonyit ineendet kobuutuli magatyat.

Koborojingei `Jeso kasubik

³⁶ Ak kingo ta komwaei tuguuchu, kotonon ineendet eng' kwenunnywa, ak koleenji icheek, Ingotep kaalyeet eng' okweek.

³⁷ Ago ki aragenso ak koiyweis, ak kileen kageer tamirmir.

³⁸ Ak ki leenji icheek, Koaragenji nee? Ak amu nee si kong'eetyo kererwegap met eng' mugulelwekwok?

³⁹ Ogeer eunekyuk ak keelyekyuk, ole aa ineendet: osapsaba, ak ogeer; amu ma tinyei `tamirmiryo poor ak kaawo, ko uu yu ogeere atinye.

⁴⁰ Ak ye kiga komwa ni, koboorchi eunekyik ak keelyekyik.

⁴¹ Ak kingo tomo koyan icheek amu poiboiyet, ak kwong'eet, koleenji, Otinye eng' yu kiy ne ki amei?

⁴² Ak ki igoochi kebebertap njiryot ne kagibeel.

⁴³ Ak ki nam ak koam eng' tainnywa.

⁴⁴ Ak ki leenji icheek, Chu ko ng'aleekyuk che ki kamwaiwok, ye kingo ta ami kobootok, ko uu ye kanyool kosulda tuguuk tugul, che ki kisir eng' Ng'atuutik che po Musa, ak eng' maotik, ak eng' tyenwogigap kalasunet, agobo anee.

⁴⁵ Koyaat anyun ng'omnootosyekwak, si kobiit konai siruutik;

⁴⁶ ak ki leenji icheek, Ki kisir ko uu nooto, keele, nyoljin Kristo konyalil, ak kong'eet kogeny eng' che ki kobek eng' peetuutap somok;

⁴⁷ ak keamdaat eng' pororyosyek tugul siguunet ak nyoetap kaat ne po tengekwogik eng' kainennyi, ki taune Jerusalem.

⁴⁸ Oo paorinigap tuguuchuuto.

⁴⁹ Ak ogeero, ayoogu kayomisetap Abba kotebi eng' okweek: ago otebi okweek eng' nganaseet, agoi kilaakwok kimnateet ne punu parak.

Kowendi parak Jeso

⁵⁰ Ak ki indochi icheek agoi koit Bethania: ak ki namji parak eunekyik, ak koberuur icheek.

⁵¹ Ak kingo ta koberuuri icheek, kobesyegei anyun, ak ki kimut kwo kipsengwet.

⁵² Ak ki ilas ineendet ak koweektagei Jerusalem eng' poiboiyet ne oo:

⁵³ ak ki mi kotugul Hekaluut, kolasu Kamuktaindet.