LUKA 19 - BUKUIT NE TILIIL Sireet ne Dutero Kanon

Kotuitos Jeso ak Zakayo

¹ Kimong'ji anyun Jeriko ak kobun kwenut.

² Ak ogeero, chiito ne kiguure Zakayo; ak ki ne oo ineendet eng' taagigap aisuruut, ak ki mogoryo.

³ Ak ki cheeng'ei kole kogeer Jeso si konai kole ng'oo ineendet; ago ki ma imuuch amu tuiyet, amu ki nwach.

⁴ Ak ki labat kondo, kwo kolaany mogoywet si kogeer ineendet: amu ki nyo kosiirtoe oranooto.

⁵ Ak ye kingo it Jeso yooto, konyal keetoto, ak koleenji, “Zakayo, chooruge, chogu; amu kanyolja aru koong'ung' ra.

⁶ Ak ki chook, kochoorgei, ak kotaach ineendet eng' poiboiyet.

⁷ Ak ye kingo keer pichooto, kong'unyng'ung'so tugul, kole, ‘kawo kotebi eng' kootap chiito ne kiptengekyo.’

⁸ Ak ki tonon Zakayo, ak koleenji Kiptaiyat, Keero, Kiptaiyat, agoochini kibananook kebebertap tuguukyuk; ak ngo ki aibe chii age tugul kiy eng' ng'aalseet, aweekyini konyil ang'wan.

⁹ Ak ki leenji Jeso, Kagonyo yetunet rani kooi, amu weeriitap Abraham agine ineendet.

¹⁰ Amu ki nyo Weeriitap chii kocheeng' ak kosar ne kiga kobet.”

Kalewenet agobo otwogik taman

¹¹ Ak ye kingo ta kogasei icheek tuguuchu, kotes komwa kalewenet, amu ki neegit Jerusalem, ak ki ibwaati icheeget koleen taagu laitornatetap Kamuktaindet sainooto.

¹² Ki mwa anyun kole, “Ki wo chii anum ne tagunoot emet ne loo, kwo konam pounateet kobunji, ak koweek.

¹³ Yeityo koguur otwogikyik taman, ak kogoochi fedhaisyek taman, ak koleenji, Oboisyee agoi tuun aitu.

¹⁴ Ago kiwech ineendet piigap emennyi, koyookto ng'olyoot kosube ineendet, kole, ‘Ma kimache chiichi koboiywech.’

¹⁵ “Ak ye kingo week kogeny, ko kagonam pounateet, kong'at keguur otwogichooto, chu kiga kigoochi fedhaisyek, kobwa ole mi ineendet, si kobiit konai che kinyoor pichooto eng' poisyet.

¹⁶ Ak ki nyo tainnyi chiito ne po tai, kole, ‘Kiptaiyat, ki konyoor fedhaiyandeng'ung' fedhaisyek alak taman.’

¹⁷ Ak ki leenji ineendet, Ki iyai ne myee, otwogindoni myee: amu ki iegu ne kiyani eng' kiit ne ming'in miising', pou nganasook taman.

¹⁸ Ak ki nyo ne po aeng', kole, ‘Kiptaiyat, kigonyoor fedhaiyandeng'ung' fedhaisyek muut alak.’

¹⁹ Ak ki leenji nooto agine, ‘Pou nganasook muut aginye.’

²⁰ “Ak ki nyo age, kole, ‘Kiptaiyat, keero, ineni fedhaiyandeng'ung' ne kigaratyi angeet ak agonor:

²¹ amu ki aiywein, amu ii chii ne kolgol: inemu ne ki ma inde ng'wony, ak igese che ki ma igol.’

²² Koleenji anyun ineendet, Arwoogun agobo ne kemwa eng' kuting'ung', otwogindoni ya. Ki ingen ile aa chii ne kolgol, anemu ne ki ma ande ng'wony, ak agese che ki ma agool;

²³ kilya anyun si mende fedhaisyekyuk ole kiwalawale, ta kaanyooru ko kaitu kobooto che kitesak?

²⁴ Ak ki mwachi icheek che kitonondos eng' ye neegit, koleenji, ‘Orebe ineendet fedhaiyat, ak ogoochi ineendet ne tinyei fedhaisyek taman.

²⁵ Ak ki leenji icheek ineendet, Kiptaiyat, tinyei ineendet fedhaisyek taman.

²⁶ Amwaiwok ale, chii age tugul ne tinyei, kigoochin; ago ineendet ne ma tinyei, kerebe agot ne tinyei.

²⁷ Ago omutu anyun puunichuchuk kobwa yu, che ma chamei aboi, si obar eng' tainnyu.’ ”

Taagetap Jeso eng' Jerusalem

²⁸ Ak ye kiga komwa ko uu nooto, kwo kondo, kotogostoi Jerusalem.

²⁹ Ak ye kingo kagoriikta Bethphage ak Bethania, eng' tulweet ne kiguure tulweetap Mseituni, koyookto aeng' che po kasubikyik,

³⁰ koleenji, “Oba agoi oit nganaseet ne mi taing'wong'; ak ye oit ogeer moitap sigiryet ne rataat, ne tomo kolaany chii: otyach, ak ogetu.

³¹ Ak ngo teebenak chii age tugul, kole, ‘Kalya si otyach? Oleenji anyun, Makyingei Kiptaiyat.’ ”

³² Koba anyun che kagagiyookto, ak konyoor ko uu ye kagamwachi ineendet icheek.

³³ Ak ye kita kotyachi moitap sigiryet, koleenji piigap ko po, Kalya si otyach moitap sigiryet?

³⁴ Ak ki leenji, “Makyingei Kiptaiyat.”

³⁵ Ak kiget konyo ole mi Jeso: yeityo koiito ngoroikwak eng' moata po sigiryet, ak koganapchi Jeso parak.

³⁶ Ak ye kiwendi, koiitoot ngoroikwak eng' ooreet.

³⁷ Ak kingo riikta tegeiyatap tulweetap Mseituni, kotoi tuiyet tugul ne po kasubik koboiboitu ak kolas Kamuktaindet eng' kutit ne oo agobo poisyonik tugul che po kamuktaet che kiga kogeer;

³⁸ koleen, Iberuurot Laitoryat ne nyoonei eng' kainetap Kiptaiyat: kaalyeet eng' kipsengwet, ak liilindo eng' ole toroor miising'.

³⁹ Ak ki leenji Pharisaik alage che po tuiyet ineendet, Kaneetindoni, kergong' kasubiguk.

⁴⁰ Ak ki wolji koleenji, “Amwaiwok ale, ngot kosiisyo chu, koboldos koik.”

Koriirchin `Jeso Jerusalem

⁴¹ Ak kingo riik, kogeer nganaseet ak koriirchi,

⁴² koleen, Nda kengen eng' peetuuni, agot inyee, tuguuk che po kaalyeet! Ago nguno ko kagoung'ogis eng' konyeguk.

⁴³ Amu tuun pwonjinin peetuusyek che teechei puuniguk irimeet koyiemin komoswek tugul, ak kogerchin ko eng' komosta age tugul,

⁴⁴ ak kowiirchin ng'wony, ak lagoguk che mi oriing'ung'; ama pagaagun agot koita agenge ne mi paragutap age; amu ki ma inai peetuutap rutochineng'ung'.

Kochutei `Jeso Hekaluut

⁴⁵ Ak ki wo Hekaluut oriit, ak kotoi koon komanda che ki aldaisyei,

⁴⁶ koleenji icheek, Ki kisir keele, Egu koonnyu kootap saaet: ago kaoyai koek kebeneetap rebiik.

⁴⁷ Ak ki ineetisyei peetuut age tugul eng' Hekaluut. Ago ki cheeng' tisiik che eecheen ak siriik ak che taagunotiin eng' piik, kobar ineendet:

⁴⁸ ak ma nyoor kiit ne ki imuuchi koyai; amu ki epchin iit piik tugul ineendet miising'.