LUKA 13 - BUKUIT NE TILIIL Sireet ne Dutero Kanon

Ki kiili piik kosik

¹ Ki mi piik alage eng' peetuusyechooto che ki mwachi ineendet agobo piigap Galilaya, che kiburuch Pilato korotiikwak ak tiseiywekwak.

² Ak kowolji koleenji, “Tos oleen ki kiptengeginik pichooto po Galilaya kosiir piigap Galilaya tugul, amu kinyoor nyalilwogichu?

³ Amwaiwok ale, Achicha: ago, ngot ko mosigu okweek, olustosi okweek tugul ko uu nooto.

⁴ Anan chooto taman ak sisiit, che kisyep koot ne koi ne po Siloam, ak kobar, tos oleen ki kiptengeginik kosiir piik tugul che ki menyei Jerusalem?

⁵ Amwaiwok ale, Achicha: ago, ngot ko mosigu ak okweek, olustosi tugul ko uu nooto.”

Kalewenet agobo mogoywet ne ma yiei kiy

⁶ Ak ki mwa kalewenoni, koleenji, “Ki mi chiito age ne ki tinyei mogoywet ne kiga minji mbareennyi ne po sabibuk; ak ki nyo kocheeng' logoegap keetoto, amanyoorchi kiy.

⁷ Koleenji riibindetap mbareetap sabibuk, ‘Keero, kenyini ko ne po somok anyoone acheeng'e logoek eng' mogoywoni amanyoorunee kiy: ep koluul; amu nee si koamei ng'ung'unyek puch?’

⁸ Ak ki wolji koleenji, ‘Kiptaiyat, ingotebi kenyini agine, si kota asemberchi ak ande ng'atateek:

⁹ ak ngo i logoek kong'etee nguno, ko myee; ak ngo ma i, iep anyun koluul.’ ”

Kobogoryot ne ki kisoop eng' peetuutap Sabato

¹⁰ Ak ki ineetisyei eng' sinagogit age eng' peetuutap sabato.

¹¹ Ak ogeero, kobogoryot age ne ki tinyei tamirmiryet ne po nyalulet kenyiisyek taman ak sisiit; ak kigarigak, ak ki ma kota komuuchi kochuulgei agot kitigin.

¹² Ak kingo keer `Jeso ineendet, koguur ak koleenji, “Kobogoryondoni, kagityachin eng' nyaluleng'ung'.”

¹³ Ak ki igonoor eunekyik ineendet, kochuulak sainooto ak kolas Kamuktaindet.

¹⁴ Ki nereech anyun pounindetap sinagogit, amu ki isoop `Jeso chiito eng' peetuutap sabato, ak komwachi tuiyet koleenji, “Miitei peetuusyek lo che nyolu koboisyee piik; obwa anyun eng' peetuusyechooto si kisaabok, ama eng' peetuutap sabato.”

¹⁵ Ago ki wolji Kiptaiyat, koleenji, “Okweek chombilik, tos ma yaatei age tugul eng' okweek eitonyi anan sigiryennyi eng' piiy eng' peetuutap sabato, ak kokweri koe peek?

¹⁶ Ak kobogoryondoni, ne cheptap Abraham, ne ki korat Setani kenyisyechu taman ak sisiit, tos manyol kityaach eng' ratuutyoni eng' peetuutap sabato?”

¹⁷ Ak ye kingo ta komwaei tuguuchu, kolilaanso puunikyik tugul: ago kiboiboitu tuiyet komugul agobo tuguuk che torooreen che ki yaei ineendet.

Kalewenet agobo keswootap karadali

¹⁸ Ki mwa anyun, kole, “Kergei laitornatetap Kamuktaindet ak nee? Ak tos aroge nee?

¹⁹ Kergei ak keswootap karadali, ne ki nam chiito, ak komiinji mbareennyi; ak ki piit, agoi koek keetit; ak ki tebee toriitik che po parak mooriikyik.”

Kalewenet agobo mermereek

²⁰ Ak ki mwa kogeny kole, “Aroge nee laitornatetap Kamuktaindet?

²¹ Kergei ak mermereek, che ki nam kobogoryot, ak koburukto peek che ng'ootiin che po kitongok somok, agoi kogut tugul.”

Kurgeet ne mariich

²² Ak kibunoot nganasook che eecheen ak che mengech, koneetisyoti, kobunei ooreet ne wendi Jerusalem.

²³ Ak ki leenji chiito age, Kiptaiyat, tos ng'ering' che tuun kisaru? Ak ki leenji,

²⁴ Ogiilgei obun kurgeet ne mariich: amu amwaiwok ale, cheeng'ei tuun che chaang' kobun yooto, ago ma tuun imuuchi.

²⁵ Ak ye tuun kang'eet chiitap ko po koot, ak koger kurgeet, ak otau anyun otononse eng' saang', ak ogonygony kurgeet, ole, “Kiptaiyat, yaatwech.” Ak kowolwok ineendet kole, “Mangenok, ak ole obunu.”

²⁶ Otau anyun ole, “Ki kiamisyei ak ki kiee eng' taing'ung', ak ki ineetisyei eng' ortinwekyok.”

²⁷ Ak tuun mwaei kole, “Mangen ole obunu; oba eng' anee, okweek tugul yaigap tengek!”

²⁸ Koek anyun riirek ak nyeetap kelek, ye tuun ogeer Abraham, ak Isak, ak Jakobo, ak maotik tugul, eng' laitornatetap Kamuktaindet, ak kewiirchok okweeget saang'.

²⁹ Ak tuun pwoonei kobunu kong'asiis ak cherongo, ak murot kaataam ak murot tai, ak kotep ng'wony koamis eng' laitornatetap Kamuktaindet.

³⁰ Ak ogeero, mi che po let che tuun egu che po tai, ak miitei che po tai che tuun egu che po let.

Koarageni Jeso agobo Jerusalem

³¹ Ki pwa Pharisaik alak eng' sainooto ak koleenji, “Ng'eet mande, ui eng' oli, amu machei kobarin Herod.”

³² Ak ki leenji icheek, “Oba omwachi lelwandonooto, oleenji: ‘Keero, aoone oik ak asoobi piik rani ak mutai, ak eng' peetuutap somok abegechi.

³³ Ago kanyool awo pandanyu rani ak mutai ak peetuut ne po somok: amu ma nyooljin komechi maotyondo oldo age kobatee Jerusalem.’

³⁴ “Ee, Jerusalem, Jerusalem, inyee ne ibare maotik, ak ilage koik che kiyogun! Ki amach konyil ata ayum lagoguk, ko uu ngokyet ne iyumjin aarekyik kebebaikyik, ago ki ma ocham!

³⁵ Ogeero, kagebagakwok koonng'wong' koek kipkuubere: ak amwaiwok ale, Maogeera, agoi tuun ole, ‘Iberuurot ne nyoonei eng' kainetap Kiptaiyat.’ ”