LUKA 11 - BUKUIT NE TILIIL Sireet ne Dutero Kanon

Koneetei Jeso agobo saaet

¹ Ak ye kita kosaaei eng' oldo age, ak kingo kes, koleenji age eng' kasubikyik, Kiptaiyat, ineetech kesaa, ko uu ye ki ineeti Johana kasubikyik.

² Ak ki leenji icheek, “Ye osaae, omwa ole, ‘Kwandanyo, ingoloosunok kaineng'ung'. Ingonyo laitornateng'ung'.

³ Koonech ye kiech amitwogikyok che po kotugul.

⁴ Nyoiywech kaat tengekwogikyok; ko uu ye kinyoe kaat acheek pesenwogikyok. Amemutech ole mi yoomseet.’ ”

⁵ Ak ki leenji, “Ng'oo eng' okweek ne tinyei chorweet, ak kwo ole mi kemoi kween, ak koleenji, ‘Chorwani, koono magatiinik somok abesen;

⁶ amu kagoit chorwennyu ne punu rutoi, ama tinye kiy ne agoochini.’

⁷ Ak kowolji ne mi ko, koleenji, ‘Mat iima; kaager kurgeet, ak kageruiye ak lagokyuk; ma amuuchi ang'eet agoonin.’

⁸ Amwaiwok ale, agot ngo ma ng'eet kogoochi, amu chorwennyi, ko amu soomsennyi ko nooto ne igoochin kong'eet kogoochi kiy tugul ne machei.

⁹ Ak amwaiwok agane ale, Osoom, si kegoonok; ocheeng', si onyooru; ogonygony, si keyatwok.

¹⁰ Amu age tugul ne soomei, kigoochin; ak nyooru ne cheeng'ei; ak ineendet ne igonygonyi keyatyin.

¹¹ Ak ng'oo eng' okweek kwanda ne ngo soom weeriit magatyat, ko tos igoochi koita? Anan ngo soom njiryot, ko tos igoochi ereneet kogeere njiryot?

¹² Anan ngo soom koitap ingok, ko tos igoochi melmeldo?

¹³ Ngo ngen okweek che oo yaach ogoochi lagokwok tuguuk che myach, siirei anyun ne tya kagoitoet ne igoochin Kwandang'wong' ne mi kipsengwet Kabuuset ne Tiliil icheek che soomei ineendet!”

Jeso ak Beelsebul

¹⁴ Ak ki oon ineendet oindet ne namaat kuut. Ak ye kingo kagomanda oindet, kong'alaal anyun ne kinamat kuut; ak ki kwong'yo tuiyosyek.

¹⁵ Ago ki le alak, Oone oik eng' Beelsebul, laitoryat ne po oik.

¹⁶ Ak kityem alak ineendet komage kaboorunet ne punu kipsengwet.

¹⁷ Ago ki nai ineendet kabwaatutikwak, koleenji, “Laitornatet age tugul ne pchegei ko ng'emaksei; ak koot age tugul ne pchegei koluulei.

¹⁸ Ak ngo pchegei agine Setani, kotonondoi ano laitornatani? Amu omwae ole, aoone oik eng' Beelsebul.

¹⁹ Ngot aoone oik eng' Beelsebul, koonei weeriikwok eng' ng'oo? Nooto anyun ne igoochin icheeget koek kirwoogikwok.

²⁰ Ago ngot aoone oik eng' mornetap Kamuktaindet, ko kanyonjok anyun laitornatetap Kamuktaindet.

²¹ “Ak chii ne tinyei kimnateet ak kotinyei kariikyik che riibe koonnyi, kotebyei tuguukyik eng' kaalyeet:

²² ak ye nyoonji chiito ne kiim kosiir ineendet ak koterteer, korebe anyun ineendet kariikyik tugul che cham komang'u, ak kopcheita pareiywekyik.

²³ Ineendet ne ma kimi tuwai kogirindaa; ak ineendet ne ma kiyumi tuwai koiyestooti.

Tamirmiryet ne murwoon

²⁴ “Ye kagomanda tamirmiryet ne murwoon eng' chiito, kosiir ole ma mi peek, kocheeng'oti ole imuung'ee; ak ye mata konyoor, komwa anyun kole, ‘Aweektoigei koonnyu ole ki abunu.’

²⁵ Ak ye iit, konyoor kobugot ak ko choboot.

²⁶ Kwo anyun, komut oik tisap alak che yaacheen kosiir ineendet; kochut anyun oriit ak komeny olooto: ak yaitu kagesunetap chiichooto kosiir ne po tai.”

Poiboiyeet ne po iman

²⁷ Ak ye kita komwaei ng'aleechu, komwa kobogoryot age eng' tuiyet, kole, “Iberuurot moet ne kisichin, ak kinaik che ki irerye.”

²⁸ Ago ki le ineendet, “Iberuurotin kosiir che kasei ng'olyootap Kamuktaindet, ak koriip.”

Mageetap kaboorunet

²⁹ Ak ye kingo yumjigei ineendet tuiyosyek, kotoi komwa kole, “Ibini, ko ibinda ne ya: cheeng'ei kaboorunet; ago ma kigoochin kaboorunet kobatee kaboorunetap Jona.

³⁰ Amu ko uu ye ki ek kaboorunet Jona eng' piigap Nineveh, ko uu nooto Weeriitap chii eng' ibini.

³¹ Tuun ng'eetei laitoryat kobogoryot ne po murot tai eng' kirwooget kobooto piigap ibini, ak korwookyi icheek: amu ki pun tabanwegap emet konyo kogas utaatyetap Solomon; ak ogeero, miitei yu ne oo kosiir Solomon.

³² Tuun tonondos piigap Nineveh ak ibini eng' kirwooget, ak korwookyi: amu kisik icheek eng' amdaetap Jona; ak ogeero, mi yu ne oo kosiir Jona.

Kaneetet agobo lapkeiyetap tait

³³ “Ma mi chii ne ngo kagonaam tait, konde ole ung'aat, anan kitonget oriit, ago indoi kiit ne tonone, si kobiit kogeer lapkeiyet che pendi ko.

³⁴ Taitap poortang'ung' kondang'ung': ngo myee kondang'ung', ko nyiitaat poortang'ung' komugul lapkeiyet; ago ngo ya kondang'ung' ko nyiitaat poortang'ung' agine mesundeito.

³⁵ Keer anyun ngo lapkeiyet ne mi oriing'ung' ko mesundeito.

³⁶ Ngo nyiitaat poortang'ung' komugul lapkeiyet, ama tinyei ye imen, kolapkeitu anyun poortang'ung' tugul, ko uu ye koonin lapkeiyet tait ne ikweng'sei komyee.”

Ko kerei kong' `Jeso Pharisaik ak siriik

³⁷ Ak ye kita kong'alaali, koguur Pharisaindet age kwo koamis tuwai: ak ki wo ko ak kotep ng'wony koamis.

³⁸ Ak ye kingo keer Pharisaindet, kokwong', amu ki amis ama iun euut korook.

³⁹ Koleenji `Kiptaiyat, Okweek Pharisaik, ouni parak kigombet ak sanit; ago nyiitaat oriing'wong' rebisyet ak yaityet.

⁴⁰ Okweek che oo perber, ineendet ne kiyaei saang' koma ne kiyaei oriit agine?

⁴¹ Ogoite kagoochinoik che po tuguuk che mi oriit; ak ogeero, tiliiliitu tuguuk tugul eng' okweek.

⁴² Ago pwo eng' okweek Pharisaik! Amu ogoitoi kebebertap taman ne po heduosmon ak keetiik che mengech che ng'uu, ak che po sogeek alak tugul, ak ometoi kirwooget ak chamyetap Kamuktaindet: ago kita nyolu oyai chuuto, amomete chuun alak.

⁴³ Pwo eng' okweek Pharisaik! Amu ochame ng'echerok che torooreen eng' sinagogisyek, ak kagatosyek che kigatok eng' ole kiyae mung'aaret.

⁴⁴ Pwo eng' okweek! Amu oo kerge ak kereeriisyek che mataagu, ama naei piik che punooti parak.

⁴⁵ Ak ki wolji ng'amotyot age ne po ng'atuutik, koleenji, “Kaneetindoni, ngot imwa ko uu nooto ko keteweerech agacheek.”

⁴⁶ Ak kole, “Pwo eng' okweek ng'amotigap Ng'atuutik! Amu oganapchini piik lautik che pichiien eng' laiset, ago okweek ko motwae lautichooto agot eng' mornet agenge.

⁴⁷ Pwo eng' okweek! Amu oteeche kereeriisyegap maotik, ago ki parei kwanisyekwok.

⁴⁸ Ki oegu anyun paorinik ak ochamyechini poisyonigap kwanisyekwok: amu icheeget che kibarei ak oteeche okweek kereeriisyekwak.

⁴⁹ Ki le anyun `utaatyetap Kamuktaindet amu nooto, ‘Tuun ayookyini maotik ak che kiyooktoi; ak kobar alak eng' icheek ak kousaus alak,’

⁵⁰ si kobiit komage ibini, korotiigap maotik tugul, che ki kitumda kobooch ko kagilumda ng'wony;

⁵¹ kobooch korotiigap Abel agoi korotiigap Zekariah, ne kime eng' kwenutap kaptisisyet ak Hekaluut: ee, amwaiwok ale, tuun kimage ibini.

⁵² “Pwo eng' okweek ng'amotigap ng'atuutik! Amu ki oip yaateiwot ne po ng'omnateet ama obe oriit okweeget, ak ki oger che kita mong'jin.”

⁵³ Ak ye kingo mong' eng' olooto, kotoi siriik ak Pharisaik koriich ineendet miising', ak kogilgilye, si kobiit komwa ng'aleek che chaang';

⁵⁴ koriip kole tamangap konyoor ng'olyoo ne mang'une kutinnyi.