KOMONG'U 9 - BUKUIT NE TILIIL Sireet ne Dutero Kanon

Koroitap muut: Kobegu kiyagiik

¹ Ki leenji anyun `Kamuktaindet ne Toroor Musa, “Ui kap Pharaoh ak ileenji, ‘Kamwa Kamuktaindet ne Toroor, ineendet Kamuktaindet ne po Yahudik kole: igoochi piikyuk koba, koboisyeiwo.

² Ago ngot ietee koba ak kota iraany icheek,

³ keero, nyooru pireetap koroito ne ng'waan ne amei icheek kobun eutap Kamuktaindet ne Toroor kiyagiiguk che mi akwot: paraisisyeguk, sigiroiguk, tambeesiguk, tuguuk ak keechiireguk.

⁴ Ibestos Kamuktaindet ne Toroor tuugap Israel eng' tuugap Misiri si ma me kiy agot agenge eng' tugul che po piigap Israel.’ ”

⁵ Ak ki inde Kamuktaindet ne Toroor kasarta, ak komwa kole, “Yaei Kamuktaindet kii mutai eng' emet.”

⁶ Ki yai Kamuktaindet kioto eng' peetuut ne ki isubi ak ki pek kiyagiik tugul che po Misiri, ago ma me agot agenge eng' kiyagiigap piigap Israel.

⁷ Ki iyookto `Pharaoh piik kooro agobo kiyagiik che po piigap Israel, ak ki ma me agot agenge eng' kiyagiikwak. Ago kiuit muguleldap Pharaoh, ak ma chamji piik koba.

Koroitap lo: Oreek che ki ek ondirik

⁸ Ak ki leenji `Kamuktaindet ne Toroor Musa ak Aron, “Oram oreegap maat ne oo, ak ingoseerchi Musa parak eng' taitap Pharaoh.

⁹ Egu chooto temburyek che puspus eng' emet komugul ne po Misiri, ak koek ondirik che mong'u kobwandos eng' piik ak eng' tyong'ik eng' emetap Misiri komugul.”

¹⁰ Ki ip anyun icheek oreegap maat ne oo, ak koba kotononso eng' taitap Pharaoh, yeityo koseerchi Musa parak ak ki ek ondirik che mong'u kobwandos eng' piik ak eng' tyong'ik.

¹¹ Ak ki ma imuuch kotononso piik che ng'oomen che ng'oorsei eng' taitap Musa, amu ondirichooto. Ki nam ondirik piik che ng'oomen che ng'oorsei ak icheek ko uu Misiriik.

¹² Ago, agot nga chooto tugul, ko ki iuit Kamuktaindet ne Toroor muguleldap Pharaoh, ak ki ma kas ko uu ye kiga komwachi `Kamuktaindet ne Toroor Musa.

Koroitap tisap: Koigap ropta.

¹³ Ki leenji `Kamuktaindet ne Toroor Musa, “Ng'eet, muste karon, ak iwe itonon eng' taitap Pharaoh, ak ileenji, ‘Kamwa ko uu ni Kamuktaindet ne Toroor, ineendet Kamuktaindet ne po Yahudik kole mete piikyuk koba asi koboisyeiwo.

¹⁴ Amu ayookyini korotwek che ng'woneen muguleldang'ung', otwogiguk, ak piiguk, si kobiit inai ile ma mi age ne uu anee eng' ng'wony komugul.

¹⁵ Amu kata achuule eunnyu abariin ak piiguk eng' koroito, ak ta kageisten ibet eng' ng'wony,

¹⁶ ago kaachamun isap, si kobiit aboorun kimnateennyu, ak kemwaita kainennyu konaak eng' ng'wony komugul.

¹⁷ Ta ilasugei iraanye piikyuk, ak tomo igoochi koba?

¹⁸ Amu nooto anyun, agoonu mutai kotee ni asiis koroobon koigap ropta che eecheen, che tomo kegeerei eng' Misiri ole kigoi.

¹⁹ Iyookte anyun, keget kiyagiiguk kobwa, ak tugul che itinye che miitei akwot amu choorchingei koigap ropta ak parei kobek chii age tugul ak tyony age tugul ne mi timiin, ngot koma kiget anan kimut konyo kaa.’ ”

²⁰ Ineendet ne ki iywei ng'olyootap Kamuktaindet ne Toroor eng' otwogigap Pharaoh ko ki imweito otwogikyik ak akwotisyekyik koba kooriik.

²¹ Ago ineendet ne ki ma iit ng'olyootap Kamuktaindet ne Toroor kole kiy, ko kemetoi otwogikyik ak akwotisyekyik eng' timiin.

²² Ak ki leenji `Kamuktaindet ne Toroor Musa, “Chuul eung'ung' anyun tokyi kipsengwet, si kobiit koigap ropta eng' emetap Misiri komugul, kobir piik, tyong'ik ak kiy age tugul ne piitei eng' ng'wony ak eng' emetap Misiri komugul.”

²³ Ki chuul anyun Musa kiroktonyi kotokyi kipsengwet, ak ki iyook Kamuktaindet ne Toroor tuleet ak koigap ropta ak kochoorgei maat konyo ng'wony. Ak ki isurur Kamuktaindet ne Toroor koigap ropta koroong'ji emetap Misiri.

²⁴ Ki piit anyun koigap ropta kobooto maat ne ki ilyeli eng' kimnateet ne oo kot, ne ki tomo kobiitu eng' emetap Misiri komugul kong'etee ngo ek poror.

²⁵ Ki pir koigap ropta tugul che ki mi timiin eng' emet komugul ne po Misiri, piich ak tyong'in; kibir kiy age tugul ne piitei eng' ng'wony ak koiri keet age tugul ne po timiin.

²⁶ Emetap Goshen ineegei, ole ki mi piigap Israel, ole ma it koigap ropta.

²⁷ Eng' yooto anyun, ko ki iyookto Pharaoh keguur Musa ak Aron ak koleenji, “Kaayai tengekto eng' niito; po imanda Kamuktaindet ne Toroor, ago aa kiptengekyo kobooto piikyuk.

²⁸ Osaa Kamuktaindet ne Toroor amu kagoyam tuleennyi ak koik; agoonok anee obe, amat ogagei.”

²⁹ Koleenji Musa ineendet, “Ye kaamande eng' nganaseet, eng' yooto anyun asutyi eunekyuk Kamuktaindet ne Toroor, si kosiis tuleet, ak kong'et koiyat, ak kobiit inai ile po Kamuktaindet ne Toroor ng'wony.

³⁰ Ago angen ale, ne uu inyee ak otwogiguk, kotom oiywei Kamuktaindet ne po Toroornatet.”

³¹ Ki kibir minutik alak che ki kiguure mabuteek ak baale amu kigaba met baale ak kiga yesyo taaptogap mabuteek.

³² Ago ki ma kibir nganuuk ak peek alak che kiguure kusemet amu ki tomo koeegitu.

³³ Ki manda Musa eng' nganaseet kwo eng' ole mi Pharaoh. Yeityo koitoochi eunekyik Kamuktaindet ne Toroor, ak ki siis tuleet ak kong'et koiyat; ak mata korobonji ng'wony.

³⁴ Ye kingo keer Pharaoh kole ma komi ropta ak koigap ropta ak tuleet, kogetyigei koyai tengekto ak kongelel ineendet ak otwogikyik.

³⁵ Ko uu ye kiga komwa Kamuktaindet ne Toroor eng' Musa, kogiuit muguleldap Pharaoh, ak ma igoochi piigap Israel koba.