KOMONG'U 8 - BUKUIT NE TILIIL Sireet ne Dutero Kanon

Koroitap aeng': Mororochik

¹ Yeityo koleenji `Kamuktaindet ne Toroor Musa, “Ui kap Pharaoh ak ileenji kang'atiin Kamuktaindet ne Toroor kole: ‘Mete piikyuk koba, si kobiit koboisyeiwo.

² Ngot ietee koba, keero, abiree emeng'ung' komugul mororochik.

³ Nyiei aineet mororochik, ak kotogosta koba koong'ung', ak koba koot ne irue, agoi itogung'ung', kooriigap otwogiguk ak kooriigap piiguk. Pendi mororochik kapkoimaung'ung', ak tereeniguk che ki chobe magatiinik.

⁴ Togostaenen inyee, piiguk ak otwogiguk tugul mororochik.’ ”

⁵ Ak ki leenji `Kamuktaindet ne Toroor Musa, “Ileenji Aron, ‘Chuul eung'ung' ne iting'e kirokto itokyi ainoosyek, kereruusyek ak tamboinik, si komong' mororochik komong'ji emetap Misiri.’ ”

⁶ Ki chuul anyun Aron eunnyi kotokyi peegap Misiri, ak ki togos mororochik konyi emetap Misiri.

⁷ Ago ki yai piik che ng'oomen che ng'oorsei eng' ng'oorsennywa ko uu nooto, ak komoong'ji mororochik emetap Misiri.

⁸ Ki kuur anyun `Pharaoh Musa ak Aron ak koleenji, “Oriirchi Kamuktaindet ne Toroor, si koistaena anee ak eng' piikyuk mororochik, ak amete anee piik koba kogoochi Kamuktaindet ne Toroor tiseiywot.”

⁹ Koleenji Musa Pharaoh, “Kagoonin imwa ile auyo ole asaun, ak asachi otwogiguk, ak piiguk kebar mororochik ak koistoenogei eng' korikwok ak kotebee aino kityo.”

¹⁰ Ak ki wol kole, “Mutai.” Koleenji Musa, “Ingoyaak ko uu ng'olyoondeng'ung', si kobiit inai ile ma mi age ne uu Kamuktaindet ne Toroor, Kamuktaindennyo.

¹¹ Istoenengei mororochik, ak eng' kooriguk, eng' otwogiguk ak eng' piiguk. Ng'etu eng' aino kityo.”

¹² Ki manda anyun Musa ak Aron eng' kap Pharaoh ak koriirchi `Musa Kamuktaindet ne Toroor koisto mororochik che kiga ibookyine Pharaoh.

¹³ Ki yai Kamuktaindet ne Toroor ko uu ng'olyootap Musa ak ki pek mororochik eng' kooriik, eng' kokwotinwek ak eng' emet komugul.

¹⁴ Ak ki kiiyumat keburusyek che chaang', ak ki ibul emet komugul.

¹⁵ Ago kingo keer Pharaoh kole ma komi mororochik, kouiit muguleldanyi ineendet, ak ki ma kas icheek, ko uu ye kiga komwa Kamuktaindet ne Toroor.

Koroito ne po somok: Isireek

¹⁶ Koleenji kogeny `Kamuktaindet ne Toroor Musa, “Ileenji Aron, ‘Sut kiroktong'ung' ak ikwere temburyegap emet, si kobiit kowalogis temburyechooto koek isireek eng' emet komugul ne po Misiri.’ ”

¹⁷ Ki yai inee ko uu nooto. Ki chuul eunnyi Aron ak kokwere kiroktonyi temburyek che po ng'wony, ak ki piit isireek che ki laany piik ak tyong'ik. Ki ek temburyek tugul che po emetap Misiri komugul isireek.

¹⁸ Kityem piik che ng'oomen che ng'oorsei eng' ng'oorsennywa komong' isireek, ago ki ma imuuch. Ki nam anyun isireechooto piik ak tyong'ik.

¹⁹ Ki mwachi anyun pichooto ng'oomen che ng'oorsei, Pharaoh, koleenji, “Ni ko mornetap Kamuktaindet ne Toroor. Ki uiit muguleldap Pharaoh, ak ma kas icheek ko uu ye kiga mwa Kamuktaindet ne Toroor.”

Koroitap ang'wan: Kalyang'ik

²⁰ Ak ki leenji `Kamuktaindet ne Toroor Musa, “Ng'eet karon muste ak itonon eng' taitap Pharaoh ye wendi aino ak ileenji ineendet, ‘Kamwa Kamuktaindet ne Toroor kole, mete piikyuk koba koboisyeiwo.’

²¹ Ago ngot ko mechamji piikyuk koba, ko ne ma tiny ayoogu kalyang'ik eng' chaang'indo kobwonjin, ak kobwonji otwogiguk ak piiguk, ak kooriguk oriit. Nyiei kalyang'ik kooriigap piigap Misiri, ak nyie ole tonone tugul eng' ng'wony.

²² Ago abestosi atabaani eng' peetuunooto emetap Goshen ole menyei piikyuk si ma it kalyang'ik olooto ak si kobiit inai inyee ile aa Kamuktaindet ne Toroor ne mi emet.

²³ Andai kiwateet kwenutap piikyuk ak piiguk. Piitu kaboorunonooto mutai.”

²⁴ Ak ki yai Kamuktaindet ne Toroor ko uu nooto; Kichang'a kalyang'ik miising' eng' kootap Pharaoh, ak eng' kooriigap otwogikyik ak king'emak emetap Misiri komugul amu kalyang'ik.

²⁵ Kiyookto Pharaoh keguur Musa ak Aron, ak koleenji, “Oba eng' emoni po Misiri ibogoochi tiseiywot Kamuktaindeng'wong'.”

²⁶ Ago ki wolji Musa Koleenji, “Ma nyolu keyai ko uu nooto amu tiseiywek che ma kegoochi Kamuktaindet ne Toroor, Kamuktaindennyo, ko imuuch ko kanaguut eng' Misiriik. Tos ngegoite tiseiywot ne wechei icheek eng' tainnywa, ko tos ma lachech eng' koik?

²⁷ Nyolu keebe panda ne po peetuusyek somok eng' surkwen, si kegoochi tiseiywot Kamuktaindet ne Toroor, Kamuktaindennyo, ko uu ye kong'atech.”

²⁸ Kowol kole Pharaoh, “Agoonok obe pandang'wong' si kobiit ogoochi tiseiywot Kamuktaindet ne Toroor Kamuktaindeng'wong' eng' surkwen. Ago mat obe anyun ole loo miising', ak osaaiywo agane.”

²⁹ Koleenji Musa, “Keero, kawe eng' ole imi nguno si asa Kamuktaindet ne Toroor si kobiit koistoenen inyee Pharaoh, otwogiguk ak piiguk kalyang'ik mutai. Ago mat koboisyee kogeny Pharaoh kaberberisyet koetee piik koba kogoochi tiseiywot Kamuktaindet ne Toroor.”

³⁰ Ki wo anyun Musa eng' ole mi Pharaoh kwo kosa Kamuktaindet ne Toroor.

³¹ Ak ki yai Kamuktaindet ne Toroor ko uu saaetap Musa. Ki istoe kalyang'ik Pharaoh, otwogikyik ak piikyik, ma ng'et kalyang' agot agenge.

³² Nga no, ko ki iuit Pharaoh muguleldanyi kogeny, ak ma meto piik koba.