KOMONG'U 7 - BUKUIT NE TILIIL Sireet ne Dutero Kanon

Komi Musa ak Aron kap Pharaoh.

¹ Ak ki wolji `Kamuktaindet ne Toroor Musa koleenji, “Kayain iigei Kamuktaindet eng' Pharaoh, ak koek ng'eetap komet Aron maotyondeng'ung'.

² Imwachini ng'eetap komet Aron tuguuk tugul che ang'atiin, si komwachi ineendet Pharaoh kounda piigap Israel komanda eng' emennyi.

³ Auuiiti muguleldap Pharaoh, ak ates kaboorunoikyuk ak kwang'utikyuk eng' emetap Misiri,

⁴ ago ma imuuchi kogasaak Pharaoh, ak eng' nooto anyun, andai eunnyu Misiri, ak among'u lugosyekyuk, piikyuk piigap Israel, komang'une emetap Misiri eng' poisyonik che eecheen che po kirwoogutik.

⁵ Ye achuul eunnyu atokyi Misiri, ak among'u piigap Israel eng' kwenunnywa, konai Misiriik kole aa Kamuktaindet ne Toroor.”

⁶ Ki yai anyun Musa ak Aron ko uu nooto, ko uu ye ki ng'at Kamuktaindet ne Toroor.

⁷ Kiga koit kenyiisyegap Musa tamanwogik sisiit, ak ki tamanwogik sisiit ak somok kenyiisyegap Aron ye ki ng'alaaljindos icheek ak Pharaoh.

⁸ Ki ng'alaalji `Kamuktaindet ne Toroor Musa ak Aron, koleenji,

⁹ “Ye teebenak Pharaoh kwang'utyet, imwachi inyee Aron anyun konam kiroktonyi ak kowiirchi ng'wony si kobiit koek ereneet eng' taitap Pharaoh.”

¹⁰ Ko uu nooto ko ki pa Musa ak Aron anyun kap Pharaoh, ak ki yai ko uu ye kiga ng'at Kamuktaindet ne Toroor. Ki wiirchi ng'wony Aron kiroktonyi eng' taitap Pharaoh, ak eng' taitap otwogikyik, ak kiwalak koek ereneet.

¹¹ Ki guur agine Pharaoh piik che tinyei utaatyet ak orgoik. Ak ki yai ak icheek ko uu nooto eng' ng'oorsennywa piigap Misiri che ng'oorsei ak che ng'oomen.

¹² Ki wiirchi chii age tugul eng' icheek kiroktonyi ng'wony ak kiwalogis koek erenook. Ago kilugui kirokto ne po Aron kirokweekwak.

¹³ Ki iuit muguleldap Pharaoh, ak ma kas iit icheek ko uu ye kiga komwa Kamuktaindet ne Toroor.

¹⁴ Ki leenji `Kamuktaindet ne Toroor Musa, “Uui muguleldap Pharaoh, kaeesyo kounda piik koba.

¹⁵ Ara anyun ui karon kap Pharaoh amu wendi aino. Tonone tabandap aineet si otuiyechi yooto. Ip kirokto nooto kowalak koek ereneet eng' eung'ung',

¹⁶ ui ak ileenji ineendet, ‘Kagoyokwo Kamuktaindet ne po Toroornatet ne po Yahudik, ak kale, mete piikyuk koba si kobiit koboisyeiwo eng' surkwen; agoi kora ko tomo igas.’

¹⁷ Kamwa anyun ko uu ni Kamuktaindet ne Toroor, ‘Inae eng' ni ile aa Kamuktaindet ne Toroor. Keero, akweree kirogi atinye eng' eunnyu peechu mi ainooni, ak kowalogis peek koek korotiik.

¹⁸ Pegu njireenik che mi aineet, ak kobul aineet, ak kowech Misiriik koe peek che punu aineet.’ ”

¹⁹ Ki leenji `Kamuktaindet ne Toroor Musa, “Ileenji Aron, ‘Nam kiroktong'ung' ak ichuul eung'ung' itokyi peegap Misiri, ainoosyekwak, kereruusyekwak, tamboinikwak ak togomwekwak tugul che po peek. Piitu korotiik eng' emet komugul ne po Misiri ak eng' tereenigap peek che po keetiik, ak eng' tereenigap peek che po koik.’ ”

²⁰ Ki yai Musa ak Aron ko uu ye ki kang'at Kamuktaindet ne Toroor, kisut kirogoto ak kokweree peek che mi aineet, eng' taitap Pharaoh, ak eng' taitap otwogikyik, ak kiwalogis peek tugul che mi aineet koek korotiik.

²¹ Ki pek njireenik che ki mi aineet ak kibul aineet kot ko mata komuuch Misiriik koe peegap aineet, ak ki piit korotiik eng' emet tugul ne po Misiri.

²² Ago ye kingo yai ko uu nooto eng' ng'oorsennywa ak icheek piik che ng'oomen che ng'oorsei che po Misiri, kogiuit muguleldap Pharaoh, ak ma kas iit icheek; ko uu ye ki kamwa Kamuktaindet ne Toroor.

²³ Kiweektagei anyun Pharaoh kwo koonnyi, ak ki ma iit ineendet tuguuk che koyaagiis koek kiy.

²⁴ Kibalaat anyun Misiriik tugul ole neegitee aineet koleen tamangap konyoor peek che eei, amu ki ma imuuch koe peegap aineet.

²⁵ Ki iwong'kei peetuusyek tisabu kobooch ngap kokwer Kamuktaindet ne Toroor aineet.