KOMONG'U 6 - BUKUIT NE TILIIL Sireet ne Dutero Kanon

Kogimityin Kamuktaindet kogeny Israel arorutyennyi

¹ Ki leenji `Kamuktaindet ne Toroor Musa, “Machei si igeer nguno kiit ne amache ayachi Pharaoh, amu eng' eunyu ne kiim, kogoochin icheek koba, ak koon koba eng' emennyi eng' eunooto kiim.”

² Ki ng'alaalji `Kamuktaindet Musa koleenji; “Aa Kamuktaindet ne Toroor.

³ Ki among'ji Abraham, Isak ak Jakobo, ko aa Kamuktaindet Ne po Kamuktaet agot nga ki ma naa icheek eng' kainennyu Kamuktaindet ne Toroor.

⁴ Ki agimiit kayomisennyu kobooto icheek, ale agoochi emetap Kanaan, ole ki menyei icheek ko kiprutoin.

⁵ Kobooto nooto, ko koagas tigenoigap piigap Israel che mi eunegap Misiriik ko ratotiin, ak kaabwaat kayomisennyu.

⁶ Ileenji anyun piigap Israel, ‘Aa Kamuktaindet ne Toroor, ak among'wok omang'une otetap Misiriik. Asarwok eng' otwoknateet ne oote icheek ak atyachak eng' euut ne chuulaat ak eng' kwang'utik che eecheen che po kirwooget.

⁷ Anamok oegu piikyuk, ak aegu Kamuktaindet eng' okweek, si onai ole Aa Kamuktaindet ne Toroor, Kamuktaindeng'wong' ne imoong'wok omang'une otetap Misiriik.

⁸ Ak amutwak obwa emet ne ki aitoochi eunnyu agoochi Abraham, Isak ak Jakobo, ak agoonok kobunjook. Aa Kamuktaindet ne Toroor.’ ”

⁹ Ki ng'alaalji anyun `Musa piigap Israel ko uu nooto. Nga no, ko ki ma kas icheek ng'aleekyik amu ng'wanindo ne ki tinyei eng' mugulelwekwak, ak otwoknateet ne ki koroom.

¹⁰ Ki ng'alaalji anyun `Kamuktaindet ne Toroor Musa koleenji,

¹¹ “Mande, ing'alaalji Pharaoh laitoryatap Misiri ileenji kochamji piigap Israel komanda eng' emennyi.”

¹² Ago ki ng'alaal Musa eng' taitap Kamuktaindet ne Toroor kole, “Ngot koma kasa piigap Israel, ko tos imuuchi kogasta ano Pharaoh ak anee atinye kutit ne palyach?”

¹³ Ki ng'alaalji `Kamuktaindet ne Toroor Musa ak Aron agobo piigap Israel ak Pharaoh laitoryatap Misiri, ak kong'at icheek koomaanda piigap Israel eng' emetap Misiri.

Ooreetap ne kisalu Musa ak Aron.

¹⁴ Chu ko poisyegap kooriigap weeriigap Reuben taitap Israel: Hanok, Palu, Hesron, ak Karmi. Chuuto ko ortinwegap kap Reuben.

¹⁵ Weeriigap Simion ko ki: Jemuel, Jamin, Ohad, Jakin, Sohar, ak Shaul weeriitap cheptap Kanaan. Chuuto ko ortinwegap kap Simion.

¹⁶ Chu ko kainaigap weeriigap Lawi ko uu ortinwekwak: Gerson, Kohat, ak Merari; ak kenyiisyegap Lawi kotee kosabei ko ki kenyiisyek pogol ak sosom ak tisap.

¹⁷ Weeriigap Gerson ko ki: Libni ak Shimei, ko uu kooriikwak.

¹⁸ Ak weeriigap Kohat ko ki: Amram, Itshar, Hebron, ak Uzziel. Kenyiisyegap Kohat kotee kosabei ko ki kenyiisyek pogol ak sosom ak somok.

¹⁹ Weeriigap Merari ko ki: Mali ak Musi. Chuuto ko kooriigap Lawiik ko uu ortinwekwak.

²⁰ Ki itun anyun Amram sengennyi Jokebed, ne ki sikyi Aron ak Musa. Kenyiisyegap Amram kotee kosabei ko ki kenyiisyek pogol ak sosom ak tisap.

²¹ Weeriigap Itshar ko: Kora, Nepeg ak Zikri.

²² Ki weeriigap Uzziel ko Mishael, Elzaphan ak Sitri.

²³ Ki itun `Aron Eliseba, cheptap Aminadab, chepkametap Nason, ne ki sikyi ineendet Nadap, Abiu, Eleazar ak Ithamar.

²⁴ Weeriigap Kora ko: Asir, Elkanah, ak Abiasap; chuuto ko kooriigap Koraik.

²⁵ Ak ki itun Eleazar weeriitap Aron age eng' tiibiigap Putiel, ne ki sikyi ineendet Phineas. Chuuto ko poisyegap kooriik che po kwanisyegap Lawiik ko uu kooriikwak.

²⁶ Ki Aron ak Musa che ki mwachi Kamuktaindet ne Toroor koleenji: “Omoong'u piigap Israel eng' emetap Misiri ko uu lugosyekwak.”

²⁷ Ki icheeget Musa ak Aron che ki mwachi Pharaoh laitoryatap Misiri, komaanda piigap Israel eng' Misiri.

²⁸ Ak eng' peetuunooto ne ki ng'alaaljin `Kamuktaindet ne Toroor Musa eng' emetap Misiri,

²⁹ kong'alaalji koleenji, “Aa Kamuktaindet ne Toroor. Mwachi Pharaoh laitoryatap Misiri tuguuk tugul che amwaun.”

³⁰ Ago ki mwa Musa eng' taitap Kamuktaindet ne Toroor kole, “Atinye kutit ne palyach, imuuchi kogastaa ano Pharaoh?”