KOMONG'U 5 - BUKUIT NE TILIIL Sireet ne Dutero Kanon

Komi Musa ak Aron taitap Pharaoh.

¹ Kingo pata chuuto koba Musa ak Aron ak koleenji Pharaoh, “Kamwa ko uu ni Kamuktaindet ne Toroor, Kamuktaindet ne po Israel, kole, ‘Mete piikyuk koba, si kobiit koyaiywo igoorto eng' surkwen.’ ”

² koteebee Pharaoh koleenji, “Ng'oo Kamuktaindet ne Toroor, ne tos agas iit ng'aleekyik kot achamji Israel koba? Mangen Kamuktaindet ne Toroor, ak kogeny, ma chamjini Israel koba.”

³ Ak ki le icheek, “Kinyonjech Kamuktaindet ne po Yahudik. Kaigai anyun undech keebe pandap peetuusyek somok eng' surkwen, si keeng'ji Kamuktaindet ne Toroor, Kamuktaindennyo, tiseiywot, si ma pirenech koroito, anan ko rotwetap chok.”

⁴ Ago ki wolji `laitoryatap Misiri icheek koleenji, “Amu nee si omache otyach piik eng' poisyonikwak inyee Musa ak Aron? Oba ole mi poisyonikwok.”

⁵ Ki le Pharaoh, “Kagochang'a piikwok che mi emet kosiir, nguno ko kaogoochi kometo laisennywa.”

⁶ Eng' peetuut nooto kong'at `Pharaoh kipnyeberainigap piik ak pounik, koleenji,

⁷ “Amata ogoochi piik kogeny mobeek che cham koyae matubaruuk. Ingoba icheegei kocheeng'jigei.

⁸ Ago obirchini icheek koyai matubaruuk che tee che kocham koyaei eng' kotugul. Amochuchuch kiy eng' chooto. Choriren pichu, nooto amu nee si ko riirtos ak koleen: ‘Koonech keebe keeng'ji tiseiywot Kamuktaindennyo.’

⁹ Otesyi icheek poisyet ne nyigiis, si kobiit koyai asi mata koepchi iit ng'aleek che ma po iman.”

¹⁰ Ki manda anyun kipnyeberainik ak chemogenikwak, kong'alaalji piik koleenji, “Kamwa ko uu ni Pharaoh kole, ‘Ma agoonok mobeek,

¹¹ oba okweegei, ocheeng' eng' ole omuuchi onyoorchi, ago ma kichuchuchi kiy eng' poisyeng'wong'.’ ”

¹² Ki yestaat anyun piik eng' emet komugul ne po Misiri koyumat mobeek che beelee matubaruuk.

¹³ Ki ichirchir `kipnyeberainik piik, koleenji, “Owong'u poisyonikwok, che kocham oyae peetuut age tugul, ko uu ye kocham oyae otinye mobeek.”

¹⁴ Ki kibir anyun kipnyeberainigap piigap Israel, che ki indoi chemogenigap Pharaoh, ak keteebe keleenji, “Amu nee si mowong'u motwetap poisyet ne po amut ak ne po ra, oyai matubaruuk ko uu ye kocham oyae oin kora?”

Riiregap pounigap piigap Israel.

¹⁵ Ak ki pa anyun pounigap piigap Israel koriirchi Pharaoh, koleenji, “Amu nee si iyaiywech acheek otwogiguk ko uu ni?

¹⁶ Ma ki koonech mobeek, ago kibirchinech keyai matubaruuk ak kebirech acheek otwogiguk, ago mi lelutyet piiguk.”

¹⁷ Ago ki leenji, “Oo choriren, oo choriren; nooto anyun si omwae oleen, ‘Koonech keebe keeng'ji tiseiywot Kamuktaindet ne Toroor.’

¹⁸ Ara anyun, oba oyai poisyet. Ma kigoonok mobeek, ak kanyool oibu matubaruuk che yamegei ak che kogimachei.”

¹⁹ Ki keer pounigap piigap Israel kole tinyei nyalilda, ye ki ngemwachi keleenji, “Mochuchuchi kiy eng' matabarukwok che cham oyae eng' peetuut age tugul.”

²⁰ Ye kingo manda icheek eng' kap Pharaoh, kotuiye Musa ak Aron kotonondos eng' ooreet,

²¹ ak ki leenji icheek, “Ingogeerok Kamuktaindet ne Toroor korwookwok, amu kaoyaech kesamisitu eng' taitap Pharaoh, ak eng' taitap otwogikyik, kot onde rotwetap chok eunekwak kobarenech.”

²² Ak kiweekyigei Musa ye mi Kamuktaindet ne Toroor ak koleenji, “Ee, Kamuktaindet ne Toroor, amu nee si iyachi ne ya pichu? Amu nee si iyookwo?

²³ Amu kobooch ngap anyoo kap Pharaoh ang'alaalji eng' kaineng'ung', ko ki koyachi pichu ne ya, ak tomo isaru piiguk agot kitigin.”