KOMONG'U 37 - BUKUIT NE TILIIL Sireet ne Dutero Kanon

Moing'etap kayomiset.

¹ Ki yai Bezalel moinget eng' keetiigap chebitoik, ne ki mitainik pogol ak taman koindonyi, mitainik tamanwogik lo ak lo tebeesindanyi ak mitainik tamanwogik lo ak lo tononennyi.

² Ki iliige thahabu che tiliileen oriit ak saang' ak kitegele tegeleiywotap thahabu koyieme paragunnyi tugul.

³ Ki itang'ji peteinik ang'wan che po thahabu luukwekwak ang'wan. Ki inde aeng' komosta age ak aeng' eng' komosta age.

⁴ Ki yai keetiik che ki ibe che po chebitoik ak koliige thahabu.

⁵ Ki irooch keetichooto peteinik che miitei tabanwegap moinget, si keibe.

⁶ Ki yai kerwetap rireenet eng' thahabu che tiliileen. Koindonyi kogi sendimita pogol ak taman ak tebeesindanyi kogi sendimita tamanwogik lo ak lo.

⁷ Yeityo koyai kerubisyek aeng' eng' thahabu che kitaanyi, eng' tabanwek aeng' che po kerwetap rireenet.

⁸ Ki tebee kerubit age komosi, kotebee age komosin. Inaamdos kerwetap rireenet ak kerubisyek eng' tabanwekyik tuwai.

⁹ Kiiito kerubisyek kebebaikwak koba parak, kotuch kerwetap rireenet eng' kebebaikwak, ak kotoorchin togoochikwak, ing'ururi togoochigap kerubisyechooto kerwetap rireenet.

Meseetap magatiinik che itabaanatiin

¹⁰ Ki yai meset eng' keetiigap chebitoik, ne koindonyi ko ki mitainik tamanwogik sisiit ak tebeesindanyi ko ki mitainik artam ak ang'wan. Tononennyi ko ki mitainik tamanwogik lo ak lo.

¹¹ Ki iliige thahabu che tiliileen ak ki yachi tegeleiywotap thahabu kotegele, koyieme paragunnyi tugul.

¹² Ki yachi tegeleiywot ne yamei mitainik tamanwogik tisap ak muut tebeesindanyi koyiem kioto ak ki yai tegeleiywotap thahabu koyieme tabanwekyik tugul.

¹³ Ki itang'ji peteinik ang'wan che po thahabu ak ki inde peteinichooto luukwek ang'wan eng' komoswegap keelyekyik ang'wan.

¹⁴ Ki mi peteinichooto ole neegitee tegeleiywot, ole chutei keetiik che keibe meset.

¹⁵ Ki yai keetichooto eng' keetiigap chebitoik ak koliige thahabu, si keibe meset.

¹⁶ Ki yai kora eng' thahabu che tiliileen tuguuk che ki mi meset parak, taabookyik, kechigosyekyik ak tageiywekyik ak kigombokyik che kiroong'jine tuguuk.

¹⁷ Ki itaany kogeny tait eng' thahabu che tiliileen. Kiyae keloto po tait thahabu che kitaanyi, kelunnyi ak toloitanyi. Kigombokyik, mulonokyik ak taaptokyik, koginamdos chooto tugul ko kiit agenge.

¹⁸ Kisage mooriik lo toloita nooto, kosage mooriik somogu komostanyi age ne po keloto, ak kosage mooriik somogu ko uu nooto komostanin age.

¹⁹ Ki tinyei temeet agenge kigombok somok che ki kiyai koigei taaptook che kiguure almond, ak mulwet ak taapteet. Ki tinyei ko uu nooto temeet age ne po komosta age kigombok somok che ki kiyai koigei taptochooto kiguure almond, ak mulwet ak taapteet: ko uu nooto eng' mooriik tugul lo che sachei eng' kioto.

²⁰ Ki miitei ole po toloita ineendet kigombok ang'wanu che ki kiyai kogergeit ak taaptogap almond, kobooto mulonokyik ak taaptokyik.

²¹ Eng' komaswechooto tugul lo ye kigasage mooriik aeng'u, ko ki mi keel mulwet, ne ki kituiye koek kiy agenge.

²² Ki namgei mulonokwak ak mooriikwak, koek kiy agenge ak ki kitang'e kioto komugul thahabu che tiliileen.

²³ Ki yai taisyekyik koek tisap koyae thahabu che tiliileen, kobooto kanameiywondennyi ak taabookyik che mengeechen.

²⁴ Ki yai kioto eng' thahabu che yamei keruutik sosom ak muut kobooto tuguukyik tugul.

²⁵ Ki yai kapkorosuut ole kibeelee nyamdutik koyae keetiigap chebitoik. Ki mitainik artam ak muut koindonyi ak ki mitainik artam ak muut tebeesindanyi, ak ki mitainik tamanwogik sogool tononennyi. Kiga namgei kapkorosuut ak kuinoikyik koek kiy agenge.

²⁶ Ki iliige thahabu che tiliileen, paragunnyi ak komoswekyik tugul kotuiyo ak kuinoikyik, yeityo kotany tegeleiywotap thahabu koyieme.

²⁷ Ki itaany peteinik aeng' che po thahabu ak ki inde tuguuchooto kotabon tegeleiywot keel eng' tegeet, eng' komoswekyik tuwai, si kobiit kirooch keetiik che ki ibe,

²⁸ Ki yai keetiik che ki ibe, eng' keetiigap chebitoik ak koliige thahabu.

²⁹ Ki chop mwaita ne tiliil ne ki ilse, ak nyamdutik che tiliileen che kibeelei che po tuguuchooto anyinyen che ng'uu ne anyiny, ne poisyetap ng'amotyot ne puruchi tuguuk che ng'uu ne karaaran.