KOMONG'U 36 - BUKUIT NE TILIIL Sireet ne Dutero Kanon

Tuguuk che mi koot

¹ Ingobois anyun Bezalel, Aholiab ak chii age tugul ne tinyei naet ne nin, ne ki igoochi `Kamuktaindet ne Toroor naet ne nin ak kaguiyet, si kobiit konai koyai poisyet tugul ne po ole-tiliil ko uu tugul che kiga ng'at Kamuktaindet ne Toroor.

² Ki kuur `Musa Bezalel, Aholiab ak chii age tugul ne tinyei kaguiyet, ne kiga kogoochi Kamuktaindet ne Toroor ng'omnateet, agot age tugul ne ki ichirchi muguleldanyi koyai poisyonooto.

³ Kitaach icheek kagoochinoik tugul eng' Musa che kiga koip piigap Israel keyae poisyetap ole-tiliil. Ki ipchi kogeny karonet age tugul kagoochinoik alak che po chamyet.

⁴ Ara ki pwa anyun piik tugul che ng'oomen nyoo koyai poisyet tugul ne po ole-tiliil.

⁵ Ki ng'alaalji `icheek Musa koleenji, “Ko koip piik tuguuk che siirei che kimachei eng' poisyet ne ki ng'at Kamuktaindet ne Toroor keyai.”

⁶ Ki ng'at Musa anyun kemwaitaat eng' nganaseet komugul keele, “Amata koip chii age tugul, mureno anan kobogoryo, kiy age tugul ne kagoochinetap ole-tiliil.” Ara ki kieetee anyun piik si mata koip kogeny,

⁷ amu kiga koyam keyae poisyonooto tuguuk che kiga keip kot kosiirto.

⁸ Ki yai chii age tugul ne ng'oom eng' icheek che poisyei, koot, koyae angook taman che po katanit ne karaaran, ne ki kila, ak che buluu, kobooto che arusen ne piriir ak che piriireen, konapchi angook kerubisyek, ne poisyetap nabiindet ne nabei kondai lelesta.

⁹ Ki mitainik taman ak aeng' kooindap angeet age tugul ak mitainik aeng' tebeesindap angeet age tugul. Ki aechin angoochooto tugul.

¹⁰ Kiropchindos angook muut ak kiropchindos chuun alak muut ak icheek, ko uu nooto.

¹¹ Kinapchi ineendet pelelutik che buluu eng' tabandap angeet age eng' ole kurmanat, eng' ye tuiyechin. Ki yachi ko uu nooto eng' tabandap angeet ne po aeng', ne tabanu parak eng' ole ki kituiye ne po aeng'.

¹² Kinapchi angeet age pelelutik konom, ak kinapchi pelelutik konom eng' tabandap angeet ne po aeng', eng' ole ki kituiye ne po aeng', tabandap angeet ne po aeng', ago kitokyindos pelelutik.

¹³ Yeityo koyai kariik konom che po thahabu che kiname angook, si kotuiyo angoochooto aeng' asi koek agenge anyun emaitap Kamuktaindet.

¹⁴ Yeityo koyai angook taman ak agenge koyae koroorigap ng'oroorek koek emait ne tuge emaitap Kamuktaindet.

¹⁵ Ki mitainik taman ak somok kooindap angeet age tugul, ak tebeesindo ko ki mitainik aeng'; ki aechin angoochooto tugul tamanu ak agenge.

¹⁶ Ki ituiyo angook muut koek agenge icheegei ak ki ituiyo angook lo kogeny koek agenge icheegei.

¹⁷ Kinapchi pelelutik konom tabandap angeet age ne tabanu parak, eng' ole ki kituiye, ak kinapchi pelelutik konom tabandap angeet eng' ole ki kituiye ne po aeng'.

¹⁸ Ki itaany kariik che kiname angook konom che po sugunonik che ituiye emait koek agenge.

¹⁹ Yeityo konap magatogap mengichik che ki kisal kobiriritu, si ketuge emait ak konap magatok che po mengichigap peek kotabon parak.

²⁰ Ki yai pagoinik che tonondos che po keetiigap chebitoik kobunji emaitap Kamuktaindet.

²¹ Koindap pagoiyot age tugul ko ki mitainik ang'wan, ak ki ek tebeesindap pagoiyot age tugul sendimita tamanwogik lo.

²² Ki tinyei pagoiyot age tugul ng'elyebwek aeng' che ki tuiyo. Ki yai ko uu nooto pagoinik tugul che po koot.

²³ Ki yai pagoinik che po koot, ak konde chooto tiptem kotabon murot tai.

²⁴ Kibarbar fedha kosikyi kong'iik artam, si kotabon kapkelyenutap pagoinichooto tiptem; chutei ng'elyebwek aeng'u che po pagoiyot agenge, kong'iik aeng' che mi kapkelyen. Chutei ko uu nooto ng'elyebwek aeng'u che po pagoiyot age, kong'iik aeng' che mi kapkelyen.

²⁵ Eng' komosta age ne po aeng' ne po emaitap Kamuktaindet, ne tokyingei murot kaataam, kondai pagoinik tiptem,

²⁶ ak kong'ichooto artam che po fedha, kong'iik aeng' eng' kapkelyenutap pagoiyot age.

²⁷ Ki yai anyun pagoinik lo kobunji emaitap Kamuktaindet patai, ole tokyingei cherongo.

²⁸ Ki yai kogeny pagoinik aeng' kobunji luukwek che po koot che mi patai.

²⁹ Ki kitwakyin aeng' kobooch ng'wony agoi parak, ak kituiye tugul peteiyot. Ki yachi ko uu nooto pagoinichooto tuwai che po luukwek aeng'.

³⁰ Ki mi pagoinik sisiitu, ak kong'iikwak che po fedha, taman ak lo; kong'iik aeng' eng' kapkelyenutap pagoiyot age tugul.

³¹ Ki yai keetiigap chebitoik koek rateiywek; ki yai pagoinik muut che po komosta agenge ne po koot,

³² ak rateiywek muut che po pagoinik che po komosta age ne po koot, ak rateiywek muut che po pagoinik che po komosta age ne po koot, ne mi patai, ole tokyingei cherongo.

³³ Ki yai rateiywotap kween kwo kong'etee taban agoi taban, eng' kwenutap pagoinik chuun alak.

³⁴ Ki iliige thahabu pagoinik, ak ki yai peteinikwak che po thahabu koek chooto ole kiroochi rateiywek. Ki ilige kora rateiywechooto thahabu.

³⁵ Ki yai angeet ne kioiye koot eng' ne buluu, ak ne aruus ne piriir, ne piriir ak eng' katanit ne karaaran ne ki kileet. Ki yai anganooto kobooto kerubisyek che poisyetap laindet ne ng'oom.

³⁶ Ki yachi angoonochooto lumeiywek ang'wan che po chebitoik ak koliige thahabu. Ki po thahabu ireusyekwak; ak ki itang'ji kong'iik ang'wan che po fedha che ki kibarbar.

³⁷ Kinap angeet ne po kurgeetap Emait, ne po ne buluu, ne aruus ne piriir, ne piriir ak ne po katanit ne karaaran ne ki kileet, poisyetap chiito ne nabei kondai lelesta,

³⁸ ak lumeiywekwak muut ak ireusyekwak. Ki iliige thahabu metowegap lumeiywek, kobooto rateiywekwak che kituiye, ak kong'iikwak muut ko ki po sugunonik.