KOMONG'U 35 - BUKUIT NE TILIIL Sireet ne Dutero Kanon

Kagoochinoik che ki kigoitoi agobo Koot

¹ Ki iyum `Musa tuiyet komugul ne po piigap Israel ak koleenji, “Chu ng'aleek che kang'at Kamuktaindet ne Toroor kole, oyai.

² Kiyaei poisyet peetuusyek lo, ago peetuutap tisap koegu peetuut ne itabaanat eng' okweek, sabato ne po kamuung'et ne tiliil eng' Kamuktaindet ne Toroor. Kibarei chii age tugul ne yaei poisyet peetuunooto.

³ Amat olaal ma age tugul eng' meng'otosyekwok eng' peetuutap sabato.”

⁴ Ki ng'alaalji Musa tuiyet komugul ne po piigap Israel koleenji, “Niito ko kiit ne kang'at Kamuktaindet ne Toroor kole,

⁵ Oip eng' kwenung'wong' kagoochinet ne kigoochin Kamuktaindet ne Toroor. Chii age tugul ne tinyei muguleldo ne chamei, ko ingoip, kagoochinet ne kigoochin Kamuktaindet ne Toroor: thahabu, fedha ak sugunonik,

⁶ angook che buluu, che arusen ne piriir, che piriireen, katanit ne karaaran ak koroorigap ng'oroorek,

⁷ magatogap mengichik che ki kisal kobiriritu, magatogap mengichigap peek ak keetiigap chebitoik.

⁸ Kobooto mwaitap kiit ne ikweng'sei, tuguuk che ng'uu ne anyiny che po mwaita ne ki ilse ak che po nyamdutik che kibeelei che ng'uu ne anyiny,

⁹ koik che kiguure soam, koik che kitetei che po ephod ak che po ngoryeetap tegeet.

¹⁰ “Ingonyo chii age tugul eng' okweek ne tinyei muguleldo ne po kaguiyet, si koyai tugul che ki ng'at Kamuktaindet ne Toroor:

¹¹ emaitap Kamuktaindet, ak emainnyi ne kituge, kariikyik che kiname angook, pagoinikyik, rateiywekyik, lumeiywekyik ak kong'iikyik che tonone;

¹² moinget ak keetikyik che ki ibe, kerwet ne po rireenet ak angeet ne kioiye;

¹³ meset ak keetikyik che ki ibe, tuguukyik tugul ak magatiinik che itabaanatiin;

¹⁴ keldap tait agine ne po kiit ne ikweng'sei ak tuguukyik, taisyekyik ak mwaitap kioto ikweng'sei;

¹⁵ kapkorosuut ne kibeelee nyamdutik ak keetikyik che ki ibe, mwaita ne ki ilse, nyamdutik che kibeelei che ng'uu ne anyiny ak ngoryeet ne po kurgeet ne po koot ne sip kemong'jin,

¹⁶ kaptisisyet ne kibeelee kagoochinoik ak sugunwennyi ne ki kireger, keetikyik che ki ibe ak tuguukyik tugul, taabeet ak ng'echerennyi ne tebee,

¹⁷ kobooto angook che kisonginindos, che po seremut, lumeiywekyik, kong'iikwak che tononie ak ngoryeetap kurgeetap seremut;

¹⁸ tigongenik che po koot, tigongenigap seremut ak poroonikwak;

¹⁹ ngoroik che ki kisal kogororonitu si keboisyee eng' ole-tiliil, ngoroik che itabaanatiin che po tisiindet Aron ak ngoroigap weeriikyik, che poisyei eng' tisiisyet.”

²⁰ Ki pa tuiyetap piigap Israel komugul eng' taitap Musa.

²¹ Ki nyo age tugul ne ki ichirchir muguleldanyi, ak age tugul ne ki igiil muguleldanyi kogoon, ki ip kagoochinoigap Kamuktaindet ne Toroor che po poisyetap emait ne kituiyechin, che po poisyennyi tugul ak che po ngoroik che itabaanatiin.

²² Ki pwa murenik ak kwonyiik, icheeget che ki cham mugulelwekwak. Ki ip peteinigap seruunek, munaokwak, peteinik che po ng'ookset ak sonoegap kaatit; ki po chooto tugul thahabu. Ki igoochi chii tugul anyun Kamuktaindet ne Toroor tuguuk che po thahabu.

²³ Ki ip chii tugul ne ki tinyei angook che buluu, che arusen ne piriir, che piriireen ak che po katanit ne karaaran, koroorik che po ng'oroorek, magatogap mengichik che ki kisal kobiriritu ak magatogap mengichigap peek.

²⁴ Chii age tugul ne ki kon kagoochinoik che po fedha ak che po sugunonik, ko ki punji chooto kagoochinetap Kamuktaindet ne Toroor. Ko chii age tugul ne ki tinyei keetiigap chebitoik, ko ki ip chooto kobunji poisyet.

²⁵ Ki ilet anyun rogoonik kobogorisyek tugul che tinyei ng'omnateet, yeityo koip che ki ilet, che po che buluu, che arusen ne ais, che piriireen ak che po katanit ne karaaran.

²⁶ Ki ilet koroorigap ng'oroorek kobogorisyek tugul che ki ichirchir mugulelwekwak eng' ng'omnateet.

²⁷ Ki ip pounik koik che kiguure soam, koik che kitetyin ephod ak che kitetyin ngoryeetap tegeet;

²⁸ tuguuk che ng'uu ne anyiny, mwaita ne po kiit ne ikweng'sei, mwaita ne ki ilse ak che po nyamdutik che kibeelei che ng'uu ne anyiny.

²⁹ Ki ipchi `piigap Israel Kamuktaindet ne Toroor kagoochinoik che po chamyet; muren age tugul ak kobogoryo age tugul che ki igiil mugulelwekwak koip tuguuk che po poisyonooto tugul, che kiga ng'at Kamuktaindet ne Toroor keyai eng' Musa.

³⁰ Ki leenji `Musa piigap Israel, “Ogeero, kagoguur `Kamuktaindet ne Toroor Bezalel, komwa kainennyi, ineendet ne weeriitap Uri weeriitap Hur ne po ooreetap Judah;

³¹ ak kagonyiit ineendet Kabuusetap Kamuktaindet, eng' ng'omnateet, kaguiyet, ak naet, si konai ole teptoi poisyet age tugul ne po musoknateet.

³² Si kobiit konai ole choptoi poisyonigap musoknateet koboisyee thahabu, fedha ak sugunonik,

³³ kowai koik che kitetyin kelongonik, ak koyai keetiik kobois eng' poisyet tugul ne po musoknateet.

³⁴ Ki inde ng'omnateet muguleldanyi si komuuch koneet ineendet kobooto Aholiab, weeriitap Aisamak ne po ooreetap Dan.

³⁵ Ki konyiit `ineendet ng'omnateet mugulelwekwak, si koyai poisyet tugul ne po musoknateet, ne po waindet, ne po laindet ne ng'oom, ne po nabiindet ne nabei kondai lelesta eng' che buluu, eng' che arusen ne piriir, eng' che piriireen ak eng' katanit ne karaaran. Agot ne po regerindet, agot ne po icheek che yaei poisyet age tugul ak ne po icheeget che ibwaati ole choptoi poisyetap musoknateet.”