KOMONG'U 34 - BUKUIT NE TILIIL Sireet ne Dutero Kanon

Kogimiti Kamuktaindet kogeny arorutyennyi

¹ Ki leenji `Kamuktaindet ne Toroor Musa, “Pet koik aeng' che lebeleen ko uu che po tai, ak asirchi ng'aleek che ki mi koik che po tai che ki itui.

² Chopkei karon ak imusu tulweetap Sinai, ak inyoo tainnyu eng' tulweet parak.

³ Amat otogosu ak chii age tugul, amat kegeerchi chii age tugul tulweet komugul. Amat koagete keechiirek anan tuuga ole neegitee tulwoonooto.”

⁴ Ki pet anyun `Musa koik aeng' che lebeleen ko uu che po tai, ak kong'eet karon kotogosta kwo tulweetap Sinai ko uu ye kiga kong'at `Kamuktaindet ne Toroor ineendet, ki ibei eng' eunnyi koichooto aeng'.

⁵ Ki choorgei Kamuktaindet ne Toroor eng' pooldet ak kotonon kobooto ineendet eng' yooto ak komwa kainennyi, “Kamuktaindet ne Toroor.”

⁶ Ki pun Kamuktaindet ne Toroor tainnyi ak komwaita kole, “Kamuktaindet ne Toroor, Kamuktaindet ne Toroor, Kamuktaindet ne nyiitaat rireenet ak myeeindo, ma sip konereechi ak nyiitaat talasyet ak imanit,

⁷ ne italachingei eliphuusyek, ne nyochin kaat piik tengekto ak pistoet ak chalwokto, ma pagaaktoi kiptengekyot age tugul. Igeerchin lagok tengektap kwanisyekwak ak eng' lagogap lagokwak agoi ibindap somok ak ne po ang'wan.”

⁸ Kichirchiren Musa kong'uruuk agoi ng'wony, kolas Kamuktaindet.

⁹ Yeityo komwa kole, “Ngo kaanyooru nguno chameet eng' taing'ung', Ee Kiptaiyat, asaain ale ingocham Kiptaiyat keebe tugul amu uueen kaat pichu. Nyoiywech kaat tengekwogikyok ak chalwogikyok ak inamech keegu poroteng'ung'.”

¹⁰ Kowol Kamuktaindet kole, “Keero, kaayai arorutyet. Ayae kwang'utik eng' taitap piiguk tugul, che kitom keyaei eng' ng'wony komugul anan eng' pororyet age tugul. Keerei piik tugul che imi kwenunnywa poisyetap Kamuktaindet ne Toroor amu kiit ne ki iywei ne ayae eng' inyee.

¹¹ Riip anyun chuuto kang'atiin rani. Keero, aoone komanda eng' taing'ung' Amorik, Kanaanik, Hitik, Perisik, Hibik ak Jebusik.”

¹² “Riipkei, si meyai arorutyet ak piik che menyei emonooto iwendi si ma ek mesteet eng' kwenung'wong'.

¹³ Ago obut kapkorosusyekwak. Otuatui kanamonikwak kotonogis ak oluul Aserikwak,

¹⁴ among'urukyi kamuktain age tugul. Amu Kamuktaindet ne Toroor ne kainennyi ko ng'etkong', ineendet Kamuktaindet ne amei ng'etkong'.”

¹⁵ “Oriipkei si moyai arorut kobooto piik che menyei emonooto, amu ye ipkei icheek ak kanamonikwak ak koeng'ji tiseiywot kamuktaikwak koguurin age iam che po tiseiywondennyi.

¹⁶ Ak ye itunji weeriiguk tiibiikwak, ko tiibiikwak chooto ibegei ak kanamonikwak, kochuuti iman weeriikwok koosup kanamonikwak.”

¹⁷ “Ameyachigei kanamonik che kitaanyi.”

¹⁸ “Kanyool iriip igoorto ne po magatiinik che ma kinde mermereek. Iame magatiinik che ma kinde mermereek eng' peetuusyek tisap ko uu ye ki ang'atiin eng' peetuusyek che ki kiaror eng' arawetap Abib. Amu ki omong'u eng' Misiri eng' arawanooto.

¹⁹ Chechuuk tugul che yaatei iyoteet ak tugul che twati tuuga ak keechiirek, che kiruugik ak mengichik.

²⁰ Ityachi ne twatei sigiryet ityage aarwet. Ngo metyach, iiri kaatit. Ityachi weeriiguk tugul che po tai. Ma nyoonei chii oli ami ak euut puch.

²¹ “Yai poisyet peetuusyek lo, ago imuuny eng' peetuutap tisap. Imuuny eng' peetuusyegap kabatisyet ak eng' peetuusyegap kesisyet.

²² Riip igoortap wigisyek, nooto ko tongoanigap nganuuk ak igoortap peetuusyek che kiyumune tuguugap mbar, kogesugei kenyiit.

²³ Pwoonei mureniguk taitap Kiptaiyat Kamuktaindet ne Toroor, Kamuktaindet ne po Israel, konyil somok eng' kenyiit.

²⁴ Amu aoone pororyosyek eng' taing'ung' ak abaroi kiwotosyeguk. Ak ma piitu chii age tugul ne machei emeng'ung', ye itogostoi iwendi taitap Kamuktaindet ne Toroor Kamuktaindeng'ung' konyil somok eng' kenyiit.

²⁵ “Amegoite korotiigap tiseiywondennyu kobooto magatyat ne kaginde mermereek. Amat kong'et kot koeech tiseiywotap igoortap paska.

²⁶ Ibu kobwa kootap Kamuktaindet ne Toroor Kamuktaindeng'ung', tuguuk che po tai eng' tongoaniguk che po emeng'ung'. Ameyoe aarwet cheegap kamet.”

²⁷ Ki leenji `Kamuktaindet ne Toroor Musa, “Sir ng'aleechu, amu kagiyomiske ak inyee kobooto Israel, ko uu ole teptoi ng'aleechu.”

²⁸ Ki tebi Musa ak Kamuktaindet ne Toroor eng' olooto peetuusyek artam ak kemousyek artam. Ma am amit ama ee pei. Ki sirchi ng'aleegap arorutyet; ng'atuutik taman koichooto lebeleen.

Kooluu togeetap Musa

²⁹ Ye kingo choorgei Musa eng' tulweetap Sinai koibu koik aeng' che po paornateet eng' eunnyi, koma nai inee kole iluu iriryotap togeennyi amu kigang'alaal Kamuktaindet ne Toroor ak ineendet.

³⁰ Ye kingo keer `Aron ak `lagok tugul che po Israel Musa, ogeero, kilildoi togeennyi, ak ki iywei icheek koriikyi ineendet.

³¹ Ki kuur `Musa icheek ak kiweektagei Aron ak pounik tugul che po tuiyet ole mi ineendet ak ki ng'alaalji `Musa icheek.

³² Eng' let koriikyi lagok tugul che po Israel, ak ki mwachi icheek ng'atuutik tugul che kiga komwachi `Kamuktaindet ineendet eng' tulweetap Sinai.

³³ Ye kingo kagogees Musa ng'alaalennyi kobooto icheek, kotuge togeennyi kitambaet.

³⁴ Ago ki ireegu Musa kitambaanooto ye kingo mandoi taitap Kamuktaindet ne Toroor kowendi kong'alaaldos ak ineendet agoi komong'. Ago ye kingo mong' konyo kong'alaal ak piigap Israel, komwachi che ki king'at,

³⁵ ak ki keer piigap Israel togeetap Musa kole iluu iriryotap togeennyi. Kituge anyun Musa togeennyi kitaambaet kogeny agoi komanda kwo kong'alaal ak Kamuktaindet.