KOMONG'U 33 - BUKUIT NE TILIIL Sireet ne Dutero Kanon

Keng'atei piik koba eng' Sinai.

¹ Ki leenji `Kamuktaindet ne Toroor Musa, “Oba otogoste eng' oli, inyee ak piik che ki imutu komang'une emetap Misiri agoi oit emet ne ki ayosyechi Abraham, Isak ak Jakobo ale agoochini iyotennywa.

² Ayooktoi malaikaiyat kondoenak, ak aoon komanda Kanaanik, Amorik, Hitik, Perisik, Hibik ak Jebusik.

³ Ara oba agoi emonooto ne nyiitaat cheego ak komi kumyat eng' chaang'indo. Ago ma togostoi kobootok amu oo piik che uueen kaat, si ma paraak owong'uge eng' ooreet.”

⁴ Kingo kas piik ng'aleechooto yaacheen, koriiryo ak ki ma ilaach chii tuguugap lele.

⁵ Ki leenji `Kamuktaindet ne Toroor Musa, “Mwachi piigap Israel leenjin, oo piik che uueen kaat, ngot awe atogoste kobootok ko ne matya, abarook ageeswok. Ara anyun oreegu tuguukwok che po lele si kobiit ageer kiit ne ayaiywok.”

⁶ Ki ireek piigap Israel tuguukwak tugul che po lele kong'etee tulweetap Horeb ak kwo tai.

⁷ Kibiteetap Musa koip emait ak koteech eng' ye loo eng' saang'utap nganaseet. Kiguure emainooto, Emait ne kituiyechin. Chii age tugul ne ki chamei kocheeng' Kamuktaindet ne Toroor, kogiwendi emainooto kituiyechin ne ki mi saang'utap nganaseet.

⁸ Ye kingo manda Musa kwo ole mi Emait, kong'eetyo piik tugul kotononso, chii age tugul eng' kurgeetap emainnyi ak kogeerot Musa kowendi agoi kochut Emainooto oriit.

⁹ Ye kingo chut `Musa Emainooto, ko kichoorugei pooldet, konyonei kotonone kurgeetap Emait ak kong'alaal Kamuktaindet ne Toroor ak Musa.

¹⁰ Ye kingo keer piik toloata po pooldet kotonone kurgeetap Emait, kong'eetyo tugul ak kong'uruukso, chii age tugul eng' kurgeetap emainnyi.

¹¹ Ki ng'alaaljin Kamuktaindet ne Toroor ak Musa kimni, ko uu ye ng'alaaljindos chii ak chorwennyi. Kingo pata ko ki weeksei kogeny kowendi nganaseet. Ago king'etu eng' Emainooto kiboityondennyi ne neran, nooto ko Joshua weeriitap Nun.

¹² Ki leenji `Musa Kamuktaindet ne Toroor “Keero, kemwaiwo, ileenjo, ‘Imut pichu kotogosta,’ ago tomo imwaiwo chiito ne iyoogu keebe tuwai. Nganda kaimwa ile, ‘Ingen kainenyu ak kaanyooru chameet eng' taing'ung'.’

¹³ Ara anyun asoomin ale, ngo kaanyooru chameet eng' taing'ung' iman, iboorwo nguno ortinweguk si kobiit anain ak anyooru chameet eng' taing'ung' ak ibwaat inyee ile pororyoni ko piiguk.”

¹⁴ Ak ki le Kamuktaindet, “Kibendi tuwai ak agoonin kamuung'et.”

¹⁵ Ki leenji Musa, “Ngo ma kibendi tuwai, ko memutech keebe eng' oli.

¹⁶ Amu kinae nee nguno keele, kaanyooru chameet eng' taing'ung' ak piiguk? Tos ma amu kibendi kobooten ne yaech keegu che itabaanatiin, anee ak piiguk eng' piik tugul che mi ng'wony?”

¹⁷ Ki leenji `Kamuktaindet ne Toroor Musa, “Ayae anee ng'olyoondoni kesoom. Amu kenyooru chameet eng' tainnyu ak angen kaineng'ung'.”

¹⁸ Kole Musa, “Asaain ale, Iboorwo liilindang'ung'.”

¹⁹ Kowolji Kamuktaindet ne Toroor koleenji, “Achamdoi myeeindonyu tugul kosiirtoe taing'ung' ak amwaite kainenyu eng' taing'ung'. Ayachini ne myee ne amache ayachi ne myee ak aboorchi rireenetapkei ineendet ne yamei aboorchi rireenetapkei.

²⁰ Memuuchi igeer togeennyu, amu ma keera chii ak kosap.”

²¹ Yeityo kole Kamuktaindet ne Toroor, “Keero, miitei oli neegiteena oldo ole imuuchi itonone eng' rwandet parak,

²² ak ye siirtoi liilindanyu, andein rwandet ole petaat, ak atugenen eunnyu agoi asiirte.

²³ Yeityo aiste eunnyu ak igeer patennyu, ago megeere togeennyu.”