KOMONG'U 31 - BUKUIT NE TILIIL Sireet ne Dutero Kanon

Keleweni Bezalel ak Oholiab agobo poisyetap Koot

¹ Ki ng'alaalji `Kamuktaindet ne Toroor Musa koleenji,

² “Keero, ki aguur Bezalel weeriitap Uri weeriitap Hur ne po ooreetap Judah,

³ ak kaanyiit ineendet Kabuuset ne po Kamuktaindet, ng'omnateet, kaguiyet ak naet, konai ole teptoi poisyet age tugul ne po musoknateet.

⁴ Imuuchi inee koyai poisyonigap musoknateet ne kiboisyee thahabu, fedha, ak sugunonik,

⁵ ak waetap koik che kitetyin kelongonik, keetiik ak poisyet age tugul ne po musoknateet.

⁶ Ak asi kotoret ineendet, ko kaalewen anee Aholiab weeriitap Aisamak ne po ooreetap Dan, ak kaande ng'omnateet mugulelwegap tugul che tinyei kaguiyet si kobiit koyai icheek tugul che kaang'atiin:

⁷ emait ne kituiyechin, moingetap paornateet, kerwet ne po rireenet ne mi paragunnyi ak tuguuk tugul che mi Emainooto;

⁸ meset ak tuguukyik, keeldo ne tiliil ne po tait ak tuguukyik tugul ak kaptisisyet ne kibeelee nyamdutik,

⁹ kaptisisyet ne po tiseiywek che kibeelei ak tuguukyik tugul ak taabeet kobooto ng'echerennyi ne tebee,

¹⁰ ngoroik che kisalei kogororonitu che itabaanatiin che po Aron tisiindet ak ngoroigap weeriikyik si koboisyee eng' tisiisyet;

¹¹ ak mwaita ne ki iilse ak nyamdutigap tuguuk che ng'uu ne anyiny che po ole-tiliil. Yaei anyun icheek ko uu tugul che kaang'atiin.”

Riipseetap Sabato.

¹² Ki ng'alaalji `Kamuktaindet ne Toroor Musa koleenji,

¹³ “Ng'alaalji piigap Israel ileenji, ‘Oriip sabatosyekyuk komyee. Amu niito kaboorunet eng' kwenunnyo anee ak okweek eng' ibinwekwok tugul, si kobiit onai ole aa Kamuktaindet ne Toroor ne atabaanok.

¹⁴ Nooto anyun oriip sabato amu itabaanat eng' okweek. Kibarei iman age tugul ne imurwooni.’ ” Ago king'etoi eng' piikyik chii age tugul ne yaei poisyet age tugul eng' peetuunooto.

¹⁵ Kiyaei poisyet peetuusyek lo, ago peetuutap tisap ko sabato ne po kamuung'et ne tiliil ne itabaanat eng' Kamuktaindet ne Toroor. Kibarei iman chii age tugul ne yaei poisyet age tugul eng' peetuutap sabato.

¹⁶ Eng' nooto anyun ko kanyool koriip piigap Israel sabato ak kotabaan eng' ibinwekwak tugul koek arorutyet ne po koigeny.

¹⁷ Kaboorunet niito eng' kwenunnyu ak piigap Israel ne po agoi, amu ki yai Kamuktaindet ne Toroor kipsengwet ak ng'wony eng' peetuusyek lo ak eng' peetuut ne po tisap ko ki imuuny kotalbis.

¹⁸ Ye kingo kagogees Kamuktaindet ne Toroor ng'alaalet ne ki ng'alaali ak Musa eng' tulweetap Sinai, kogoochi Musa koik aeng' che lebeleen che po paornateet che ki kisire mornetap Kamuktaindet.