KOMONG'U 29 - BUKUIT NE TILIIL Sireet ne Dutero Kanon

Kaanyinyetap tisiik

¹ “Ni kiit ne iyachini icheek ianyinyi, si kobiit koboisyeiwo eng' tisiisyet: iname kirgit agenge ne neran ak mengichik aeng' che libwoben,

² kobooto magatiinik che ma kinde mermereek, magatiinik che mengeechen che ki kikwang'da mwaiita, magatiinik che tertereen che kigi iilee mwaita ak ichobe peek che ng'ootiin che tambulul che po nganuuk.

³ Indoi ateruut agenge ak iibune ateruunooto yeityo igetu kirgit kobooto mengichichooto aeng'.

⁴ Imutu Aron ak weeriikyik kobwa kurgeetap emait ne kituiyechin ak iun icheek eng' peek.

⁵ Nam ngoroik ak ilaakyi Aron ngoryeet ne kooi, ak ngoryeet ne ki kilelesane ephod, ephod ineendet ak ngoryeetap tegeet. Kermenee ineendet `pireneet ne po ephod ne ki kinap eng' ng'omnateet.

⁶ Kerchinee metinnyi naaryeet ak iratyi kuutweet ne tiliil ne po thahabu paragutap naryonooto.

⁷ Yeityo inam mwaita ne ki ilse iroong'ji metinnyi ak iil ineendet.

⁸ “Imutu weeriikyik ak icheek ak ilaakyi ngoroik che kooen.

⁹ Yeityo igermen Aron ak weeriikyik eng' pirenaik ak igerchinee metowekwak chepkuloik che mengeechen. Si konam poisyonooto po tiseinateet eng' ng'atuutyet ne po agoi. Itoroorchi anyun Aron ak weeriikyik poisyonooto po tiliilindo.

¹⁰ “Ketu anyun kirgit konyo taitap emait ne kituiyechin. Ingogonoor Aron ak weeriikyik eunekwak metitap kirgooto.

¹¹ Yeityo ieny kirgooto eng' taitap Kamuktaindet ne Toroor eng' kurgeetap emait ne kituiyechin.

¹² Taach korotiigap kirgooto ak iilee tolochigap kaptisisyet eng' morneng'ung' yeityo iroong'ji korotichooto tugul kaptisisyet keel.

¹³ Put mwanik tugul che ki ilaach moet ak kwambelelyet ne tuchei kooet, soromok tuwai, mwanik che mi soromochooto ak ibeel chooto eng' kaptisisyet.

¹⁴ Ki peel eng' maat panyeegap kirgooto, muitonyi ak eiyandennyi eng' saang'utap nganaseet. Nooto ko kagoochinet ne po tengekto.

¹⁵ “Nam mengit agenge agine, ak kogonoor Aron ak weeriikyik eunekwak metitap mengoto.

¹⁶ Eeny mengit ak itaach korotiikyik ak iisote kaptisisyet.

¹⁷ Yeityo itonaton panyeegap mengoto, ak iun tuguugap ke tugul ak keelyekyik ak ituiye ak panyechooto kagetonaton kobooto metinnyi.

¹⁸ Beel mengoto komugul eng' kaptisisyet: niito ko kagoochinet ne kibeelei ne po Kamuktaindet ne Toroor; nyamdutyet ne anyiny, kagoochinet ne kigoochin Kamuktaindet ne Toroor kobunei maat.

¹⁹ “Nam mengit ne po aeng', si kogonoor Aron ak weeriikyik eunekwak metitap mengoto.

²⁰ Eeny anyun mengoto ak itaach korotiik che iilee walisyegap itigap tai che po Aron ak weeriikyik, ak eng' morik che eecheen che po eunekwak che po tai ak eng' morik che eecheen che po keelyekwak che po tai. Yeityo iisote korotiik che kang'et komoswek tugul eng' kaptisisyet.

²¹ Ye ibata inam korotiik che mi kaptisisyet parak ak mwaita ne kiilse, ak iise Aron ak ngoroikyik, ak iise weeriikyik ak ngoroikwak. Si kitabaan ineendet ak ngoroikyik, ak weeriikyik ak ngoroikwak.

²² “Inemune mengit mwanikyik, mwanigap saruryet, mwanik che ki ilaach moet, kwambelelyet ne po kooet ak soromok tuwai, kobooto sunetikwak ak kubesto ne po tai, amu niito ko mengit ne po poisyetap katabaanet.

²³ Eng' ateruut ole mi magatiinik che ma kinde mermereek, inemu; magatyat agenge komugul, magatyat ne ming'in ne kagiilee mwaita ak magatyat agenge ne terter ne mi taitap Kamuktaindet ne Toroor.

²⁴ Yeityo inde chooto tugul eunegap Aron ak eunegap weeriikyik ak iongoi inyee koek kagoochinet ne kiruuri eng' taitap Kamuktaindet ne Toroor.

²⁵ Icheru tuguuchooto eng' eunekwak ak ibeel eng' kaptisisyet eng' paragutap kagoochinet ne kibeelei, koek nyamdutyet ne anyiny eng' taitap Kamuktaindet ne Toroor. Niito ko kagoochinet ne kigoochin Kamuktaindet ne Toroor kobunei maat.

²⁶ “Iip tagateet ne po mengitap poisyet ne po katabaanet ne po Aron, ak iongoi koek kagoochinet ne kiongoi eng' taitap Kamuktaindet ne Toroor si koek nooto kebebertang'ung'.

²⁷ Itabaan tagateet ne po kagoochinet ne kiongoi ak kubesto ne po kagoochinet ne kinamjin parak, ne kiongoi ak ne kinamjin parak che po mengoto po poisyetap katabaanet agobo Aron ak weeriikyik.

²⁸ Punjin chooto Aron ak weeriikyik koek ng'atuutyet ne po agoi eng' piigap Israel, amu niito kebebertap kagoochinet ne kagitabaan, ak koek nooto kagoochinet ne kinamjin parak ne punu lagogap Israel eng' tiseiywegap kagoochinoikwak che po kaalyeet. Niito anyun ko kagoochinennywa ne kagitabaanji Kamuktaindet ne Toroor.

²⁹ “Tuun punjin weeriikyik ngoroichooto itabaanatiin che po Aron, ilaachi icheek si ki ili kitoroorchin poisyonooto tiliil.

³⁰ Ilaachi ngoroichooto peetuusyek tisap, weerooto tuun namjin Aron tisiisyet ye mandoi emait ne kituiyechin si koboisyei eng' ole-tiliil.

³¹ “Nam mengit ne po poisyetap katabaanet si iyo panyeekyik eng' ole ki kitiliil,

³² ak koam Aron ak weeriikyik panyeegap mengoto ak magatiinik che mi ateruut eng' kurgeetap emait ne kituiyechin.

³³ Amei icheegei tuguuchooto che kiyae kagaigaet, ak kinde poisyetap tiliilindo, ak kitabaan icheek. Ago amat koam toondet amu tiliileen tuguuchooto.

³⁴ Ngo ng'et panyeek che po nooto ki kitabaanji poisyetap katabaanet anan eng' magatiinik, ak ngo tebi kot koeech, ibeel anyun eng' ma tugul che kong'et; amat keam amu tiliileen.

³⁵ “Yachi Aron anyun ak weeriikyik ko uu tugul che kang'atiin. Inde icheek poisyonooto tiliil eng' peetuusyek tisap.

³⁶ Igoitoi inyee peetuut age tugul kirgit ne neran ne po kagoochinet ne po tengekto kobunji kagaigaet. Ianyinyi kaptisisyet ye iyachini kagaigaet agobo ineendet. Yeityo iil ianyiny.

³⁷ Iyae kagaigaet agobo kaptisisyet eng' peetuusyek tisap ak itiliil. Si kotiliilit kaptisisyet miising', ak kanyool kotiliilit kiy age tugul ne twaei kaptisisyet.

Kogoochinoigap kotugul.

³⁸ “Chu che igoitoi eng' kaptisiisyo; igoitoi peetuut age tugul aarek aeng' che mengichik che po keechiir che ma siirei kenyiit agenge koek kiit ne po agoi.

³⁹ Igoite aarwet age karon ak igoite aarwet ne po aeng' koskoleny.

⁴⁰ Itesyini aarwet age keruutyet agenge ne po peek che ng'ootiin che tambulul che kagiburukto litait agenge ne po mwaita ne pitunee tuisyet, ak litait agenge ne po divaik koek kagoochinet ne kirong'u.

⁴¹ Igoite aarwet age koskoleny ak iyachi ko uu kagoochinetap peek ni kabo karon ak ko uu kagoochinennyi ne kirong'u, koek nyamdutyet ne anyiny, kagoochinet ne kigoochin Kamuktaindet ne Toroor ne punei maat.

⁴² Egu nooto kagoochinet ne kibeelei ne po kotugul eng' ibinwekwok tugul eng' kurgeetap emait ne kituiyechin eng' taitap Kamuktaindet ne Toroor, eng' ole kituiyechini ak inyee si ang'alaalun eng' olooto.

⁴³ Kituiyechini yooto ak piigap Israel ak itiliili toroornatennyu yooto.

⁴⁴ Atiliilii emait ne kituiyechin ak kaptisisyet. Atabaani Aron ak weeriikyik ak icheek si koboisyeiwo eng' tisiisyet.

⁴⁵ Amenye kwenutap piigap Israel ak aegu Kamuktaindennywa.

⁴⁶ Ak konai icheek kole aa Kamuktaindet ne Toroor Kamuktaindennywa ne ki among'u eng' emetap Misiri, si kobiit ameny kwenunnywa. Aa Kamuktaindet ne Toroor Kamuktaindennywa.