KOMONG'U 28 - BUKUIT NE TILIIL Sireet ne Dutero Kanon

Ngoroigap tiseinateet

¹ “Imutu anyun Aron ng'eetap komet konyo ole ami kobooto weeriikyik, kobwa eng' ole mi piigap Israel, si kobiit koboisyeiwo eng' tisiisyet. Icheeget che imutu ko; Aron ak weeriikyik, Nadap, Abiu, Eleazar ak Ithamar.

² Napchi Aron ng'eetap komet ngoroik che itabaanatiin che po teegisto ak korooronindo.

³ Yeityo ing'alaalji tugul che tinyei muguleldo ne po kaguiyet, che ki anyiit kabuusetap ng'omnateet, si konap ngoroik che po Aron si kobiit kitabaan ineendet koboisyeiwo eng' tisiisyet.

⁴ Chu angook che nabei icheek: ngoryeet ne kilaakyin tegeet, ephod, ngoryeet ne kooi, ak age ne kooi miising' ne ki kilelesan, naaryeet ak pireneet. Ilaachi Aron ng'eetap komet ak weeriikyik ngoroichuuto itabaanatiin si koboisyeiwo eng' tisiisyet.

⁵ Ingoboisyee icheek usiisyek che ililii, che buluu, che arusen ne piriir ak che piriireen kobooto katanit ne karaaran ne ki kileet.

⁶ “Yae icheek ephod eng' thahabu che buluu, eng' che arusen ne piriir, eng' che piriireen ak eng' katanit ne karaaran ne ki kileet.

⁷ Tinyei eng' tigigoik kebeberwek che ituitos ngoroichooto tuwai koek ngoryeet agenge.

⁸ Ak ki kinap pireneet eng' ng'omnateet ki tuiyo kogergeit ak ephod si kerategei. Kinabe thahabu, buluu, che arusen ne piriir, che piriireen ak katanit ne karaaran ne ki kileet.

⁹ “Nam koik aeng' che kiguure soam ak iwachi eng' sireet kainaigap piigap Israel ko uu ortinwekwak;

¹⁰ sirchi koita age kainaik lo, ak kainaik lo che kang'et isirchi koita age.

¹¹ Sirchi koichooto aeng' kainaigap piigap Israel, eng' poisyetap waindetap koik, ko uu waet ne po ng'ookset ak inde koichooto thahabu che ki kitogul konam koik.

¹² Yeityo inde koichooto aeng' tigigoigap ephod si koek koichooto kabwaatet agobo piigap Israel. Ingoibot Aron kainaikwak eng' tigigoikyik aeng' eng' taitap Kamuktaindet ne Toroor koek kabwaatet.

¹³ Iyae tuguuk che togulotin eng' thahabu,

¹⁴ ak sirimoik aeng' che po thahabu che tiliileen. Ilet koigei rogoonik ak iratyi sirimwechooto kagilet tuguuchooto togulotin.

¹⁵ “Nap eng' poisyetap nabiindet ne ng'oom, ngoryonooto po tegeet ne po kirwooget, inabe kogergeit ak ephod eng' thahabu ne buluu, ne aruus ne piriir, ne piriir ak eng' katanit ne karaaran ne ki kileet.

¹⁶ Ingoaechin koindo ak tebeesindo ko kagiliich. Ingoek kakwautyennyi olo po sendimita tiptem ak aeng' eng' koindo ak eng' tebeesindo.

¹⁷ Inde ngoryonooto koik che tetotin eng' ortinwekwak ang'wan. Inde ooreet ne po tai sardio, topasio ak bareqet,

¹⁸ ak inde ooreet ne po aeng' sumaragdo, sapphire ak yaholom.

¹⁹ Eng' ooreet ne po somok inde huakinto, sebu ak ametusto.

²⁰ Eng' ooreet ne po ang'wan inde berulo, soam ak jasipi. Kitetyin koichooto kelongonigap thahabu.

²¹ Egu koichooto taman ak aeng' ko uu kainaigap piigap Israel. Pendi ko uu kainaikwak ko uu ye kiwaei ng'ookset, tinyei koita age tugul kainennyi ak ko pee ortinwek taman ak aeng'.

²² Napchi ngoryonooto po tegeet sirimwek che uu rogoonik che po thahabu che tiliileen che ki kilet ko uu rogoet.

²³ Napchi kora peteinik aeng' che po thahabu ak inde peteinichooto aeng' tabanwegap luukwek aeng' che po ngoryonooto po tegeet.

²⁴ Yeityo inde sirimwechooto aeng' po thahabu che ki kilet peteinik aeng' che mi tabanwek aeng' che po ngoryonooto po tegeet.

²⁵ Nam anyun komoswechuun alak aeng' che po sirimwechooto aeng' ki kilet ak irooch kelongonik aeng' che ki kitogul yeityo ituiye ak ephod eng' komostap tigigoik ole tabanu tai.

²⁶ Chop peteinik aeng' che po thahabu yeityo inapchji ngoryonooto po tegeet eng' komostap luukwek aeng' eng' tabanwekyik che tabanu komostap oriit eng' ephod keel.

²⁷ Chop anyun peteinik aeng' che po thahabu inapchi tuguuchooto tigigoigap ngoryonooto kiguure ephod eng' komostap kapkelyen ole tabanu tai eng' ole neegitee ye ki kituiye, eng' paragutap pirenonooto po ephod ne ki kinap eng' ng'omnateet.

²⁸ Igiichi icheek ngoryeetap tegeet eng' peteinikyik koratyin ak peteinigap ephod, korate rogoet ne buluu si kotebee paragutap pireneet ne po ephod ne ki kila eng' ng'omnateet, si ma peesyo ngoryeetap tegeet ak ephod.

²⁹ Ye mandoi Aron ole-tiliil, koibe kainaigap piigap Israel ngoryonooto po tegeet ne po kirwooget eng' muguleldanyi si koek kabwaatet eng' taitap Kamuktaindet ne Toroor kotugul.

³⁰ Inde ngoryonooto po tegeet ne po kirwooget Urim ak Tumim si kotebee chooto muguleldap Aron ye mandoi taitap Kamuktaindet ne Toroor. Eng' nooto anyun koibei Aron kirwoogetap piigap Israel eng' muguleldanyi eng' taitap Kamuktaindet ne Toroor kotugul.

³¹ “Inabe ngoryeet ne kiroochigei ne po ephod ne ki kisal konyalilit ne ais kityo.

³² Ak inap ole kirooktoi metit eng' kwenunnyi ak igurman kaatit ko uu poisyetap laindet ak ko uu ye kichobei ngoroigap lugeet si ma kereer.

³³ Napchi ngoryonooto tabandap keel logoek che buluu, che arusen ne piriir, che piriireen, koyiem tabandap kapkelyen tugul ak itilate cheptingiloogap thahabu kot kotuiyo.

³⁴ Indoi twolyot ne po thahabu yeityo inde logoiyandanooto korupkei ak itilate ko uu nooto korubatkei agoi tabandap ngoryeet komugul.

³⁵ Ak ingolaach Aron si koboisyee ak kegas cheetap cheptingilinichooto ye wendi ole-tiliil eng' taitap Kamuktaindet ne Toroor, ak ye mong'u si ma me.

³⁶ “Itaany kora thahabu che tiliileen kolebelitu ak iwai eng' paragunnywa waet ne uu ne po ng'ookset, ile, Tiliil eng' Kamuktaindet ne Toroor.

³⁷ Iratee rogoet ne buluu si kotebee naaryeet chepkulet ak kotebee naaryeet ole po togoch.

³⁸ Tebee togeetap Aron ak koibot Aron tengektap tuguuk che tiliileen, che itabaani piigap Israel eng' kagoochinoikwak tugul che tiliileen. Ak kotebee nooto togeetap Aron kotugul si kobiit kochamogis eng' taitap Kamuktaindet ne Toroor.

³⁹ Inapchini Aron ngoryeet ne kooi eng' katanit ne karaaran ak inde lelesta ak inap ko uu nooto naaryeet ne po katanit ne karaaran ak inap pireneet.

⁴⁰ “Eng' weeriigap Aron inapchini ngoroik che kooen, pirenaik ak chepkuloik che mengeechen che po teegisto ak kororindo.

⁴¹ Yeityo ilaakyi ng'eetap komet Aron tuguuchooto ak weeriikyik ak icheek ak iil, ak itoroorchi icheek poisyetap tiliilindo itabaan, si kobiit koboisyeiwo eng' tisiisyet.

⁴² Inapchini icheek sulwalisyek che ng'ete suet agoi kubesoik che po katanit si kobiit kotuge aach ngorinnywa.

⁴³ Ilaachi Aron ak weeriikyik tuguuchooto ye pendi emaitap oriit, anan ye riikyin kapkorosuut si kobiit kobois eng' ole-tiliil si ma nam icheek tengekto, ak kobek. Egu niito ng'atuutyet eng' ineendet ak eng' iyotennyi ne piitu let.