KOMONG'U 27 - BUKUIT NE TILIIL Sireet ne Dutero Kanon

Kaptisisyet

¹ “Teech kaptisisyet eng' keetiigap chebitoik koek koindo mitainik aeng' ak robo ak koek tebeesindo mitainik aeng' ak robo. Aechin komoswek tugul ang'wanu che po kaptisisyonooto ak ingoek koindo ne po tononennyi mitait agenge ak robo.

² Iyae kuinoikyik eng' luukwekyik ang'wan: itaanyi inoichooto konomnyo ak kaptisisyet koek kiy agenge ak iliige sugunwet.

³ Min tereenikyik che ki ibe oreek ak kechigosyekyik che eecheen, taabookyik che mengeechen, kariik che sogotiin ak taabookyik alak che ki ibe maat. Yae tuguuchu tugul sugunonik.

⁴ Yeityo iyai kora sugunonik che kiregeri ak inde sugunonichooto kagireger peteinik ang'wan eng' luukwekyik ang'wan.

⁵ Inde karnanooto kagireger kapkelyenutap mireiywot ne yiemei kaptisisyet komosta ole po keel si komuurmuur kaptisisyet.

⁶ Yachi kaptisisyet keetiik che ki ibe; chooto ko keetiigap chebitoik ak iliige sugunwet.

⁷ Kirooktoi keetichooto peteinik ak tebee keetichooto komoswek aeng' che po kaptisisyet si kobiit keibe.

⁸ Itete pagoinik koek moinget eng' kaptisisyonooto: ingoyai piik ko uu ye ko ki porun eng' tulweet.

⁹ “Iyae seremut ne ng'ootaat ne po emaitap Kamuktaindet. Eng' ole tokyingei murot tai, kindoi angook che uu emait ne po katanit ne karaaran ne ki kileet ne yamei mitainik artam ak ang'wan ko uu kooindap seremut eng' komosta agenge.

¹⁰ Egu tiptem lumeiywek che po sugunonik che keratyin ngoroichooto ak kong'iikwak tiptem che po sugunonik che tononie, agobo fedha ireusyegap lumeiywek.

¹¹ Uu nooto koindo agine eng' komostap murot kaataam, king'ote angook che uu emait che yamei mitainik artam ak ang'wan ak egu tiptem lumeiywekwak che po sugunonik, po fedha ireusyegap lumeiywek kobooto rateiywekwak che kituiye.

¹² Eng' tebeesindap seremut eng' komostap cherongo, ing'ote angook che uu emait che yamei mitainik tiptem ak aeng'. Egu taman lumeiywekwak ak kong'iikwak taman che tononie.

¹³ Ingoek mitainik tiptem ak aeng' tebeesindo ne po seremut ne tokyingei kong'asiis,

¹⁴ koek mitainik lo ak kebeberyat angook che uu emait che po komosta age ak lumeiywekwak somok ak kong'iikwak somok che tononie.

¹⁵ Ingoek che po komosta age angook che yamei mitainik lo ak kebeberyat kobooto lumeiywekwak somok ak kong'iikwak somok che tononie.

¹⁶ Iyae koek angook che po ormariichet ne po seremut mitainik lo iyae che buluu, che arusen ne piriir, che piriireen ak katanit ne karaaran ne ki kileet, indoi chiito ne nabei lelesta. Ingoek lumeiywek ang'wan ak kong'iikwak ang'wan che tononie.

¹⁷ Po fedha rateiywek che keratote lumeiywek tugul che yiemei seremut, po fedha ireusyekwak ak po sugunonik kong'iikwak che tononie.

¹⁸ Iteeche koek kooindap seremut mitainik artam ak ang'wan, koek tebeesindo mitainik tiptem ak aeng' ak ingoek tononet mitainik aeng' ak robo che po katanit ne karaaran ne ki kileet ak ingobunji sugunonik kong'iik che tononie.

¹⁹ Ingobunji sugunonik tuguuk tugul che keboisyee eng' poisyetap emaitap Kamuktaindet, tigongenikyik tugul ak tigongenik tugul che po seremut.

²⁰ “Ng'at piigap Israel koibun mwaita ne tiliil ne po mseituni ne ki kitui si kobunji kiit ne ikweng'sei si kobiit kolal tait kotugul.

²¹ Ingochobei Aron ak weeriikyik lapkeiyonooto eng' taitap Kamuktaindet ne Toroor kong'etee koskoleny agoi karon eng' emait ne kituiyechin eng' ole sip kemong'jin eng' angeet ne iyoitos emaitap Kamuktaindet, ne mi tai eng' paornateet. Egu ng'atuutyet ne po koigeny eng' ibinwekwak tugul agobo piigap Israel.