KOMONG'U 24 - BUKUIT NE TILIIL Sireet ne Dutero Kanon

Ki kimiiti Kayomiset

¹ Yeityo koleenji `Kamuktaindet ne Toroor Musa, “Otogosu ole mi Kamuktaindet ne Toroor, inyee, Aron, Nadap, Abiu ak poisyek tamanwogik tisap che po Israel. Ye neegit oitu ole ami, ong'uruukyo osaa.

² Nyoonei Musa ineegei koriikyin Kamuktaindet ne Toroor, ago ma riigu icheek ak mat kotogos chii kobooto ineendet.”

³ Ki nyo anyun Musa komwachi piik ng'aleek tugul che po Kamuktaindet ne Toroor ak kirwoogutik tugul, ak ki wol piik tugul eng' kutit agenge kole, “Kiyae ng'aleechooto tugul kamwa Kamuktaindet ne Toroor.”

⁴ Ki sir Musa ng'aleek tugul che po Kamuktaindet ne Toroor ak king'eet karon ko tuui ak koteech kaptisisyet eng' tulweet keel. Kiteeche koik tolochik taman ak aeng' ko uu ortinwek taman ak aeng' che po Israel.

⁵ Yeityo koyookto murenik che neran che po piigap Israel kogoito kagoochinoik che kibeelei ak kieng'ji tuuga Kamuktaindet ne Toroor koek tiseiywegap kaalyeet.

⁶ Kisiil Musa korotiik kebeber, konde taabook che mengeechen, ak koisotee che kiganget kaptisisyet.

⁷ Yeityo konam kitabuutap arorutyet ak kosomanji piik kogas, ak ki le icheek, “Kigase iit Kamuktaindet ne Toroor ak keyae chooto tugul kamwa.”

⁸ Kingo pata konam Musa korotiik ak koisote piik komwae koleen, “Chu korotiigap arorutyet ne kagoyai Kamuktaindet ne Toroor kobootok eng' ng'aleechu tugul.”

⁹ Ki togosta anyun Musa ak Aron, Nadap, Abiu ak poisyek tamanwogik tisap che po Israel.

¹⁰ Ki keer anyun icheek Kamuktaindet ne po Israel. Ki mi keelyekyik keel koita ne keguure sapphire ne uu sengwetyet eng' tiliilindanyi.

¹¹ Nga ki keer icheek kondoigap Israel Kamuktaindet, koma twa ineendet icheek eng' eunnyi. Ago ki amis ak koe eng' taitap Kamuktaindet.

¹² Ki leenji `Kamuktaindet Musa, “Togosu oli ami eng' tulweet ak itebee olito, si agoonin koik che lebeleen che ki asirchi ng'atuutik ak kayomisutik si kobiit ineete piik.”

¹³ Ki ng'eet anyun Musa ak Joshua kiboityondennyi, ak ye ibata kotogosta Musa kwo tulweetap Kamuktaindet.

¹⁴ Ki leenji poisyek, “Otebi eng' yu, ogenech agoi keeweege kogeny ole omi: ‘Ogeero, mi Aron ak Hur kobootok. Ingonyo ole mi icheek chii age tugul ne tinyei ng'olyoo.’ ”

¹⁵ Ki togosta anyun Musa kwo tulweet ak ki tuch `pooldet tulweet.

¹⁶ Ki tebee liilindap Kamuktaindet ne Toroor tulweetap Sinai ak ki tuch `pooldet tulwoonooto peetuusyek lo. Eng' peetuutap tisap koguur `Kamuktaindet Musa eng' pooldet oriit.

¹⁷ Ki uu itoondap liilindap Kamuktaindet maat ne peelei kowong'u eng' tulweet parak ko uu ye kigeerei piigap Israel.

¹⁸ Ki wo Musa pooldet oriit ak kotogosta tulweet. Ki tebee ineendet tulweet peetuusyek artam ak kemousyek artam.