KOMONG'U 23 - BUKUIT NE TILIIL Sireet ne Dutero Kanon

Kergeitu Imanda eng' piik tugul.

¹ “Amemwaate ng'aleek che po lembech. Amonamge ak kiptengekyot iegu paoryat ne ma po iman.

² Amesup tuiyet iwe iyai kiy ne ya. Ye ibaoryan eng' kapkirwook ko matonamgei ak tuiyet ibaoryan lembech, imaas kirwooget.

³ Ametiytiy kibanania eng' ng'aleekyik.

⁴ “Nginyooru tetap punyondeng'ung' anan sigiryennyi ne petoti, ikwerichi.

⁵ Nginyooru sigiryetap ne wechin ko kagobut amu tuguuk che laei, nganda kama imache itoret, ko kanyool itoret ing'eet sigiryonooto.

⁶ “Amat imaas kirwoogetap kibananiandeng'ung' eng' kirwoogutikyik.

⁷ Istegei looitu eng' kirwoogutik che kirwookyin chii eng' lembech; amebar che ma tinyei yaityo ak che po imanda, amu ma ityinii imanda chii ne yae tengegito.

⁸ Ametaach tuguuk che po asoya, amu tuchei konunoik icheeget che ng'oomen ak kogunuuri ng'aleegap che po imanda.

⁹ “Amenyaliil toondet amu ongen ole teptoi muguleldap toondet amu ki oo toek eng' emetap Misiri.

Kenyiitap Sabato.

¹⁰ “Igoole mbareeng'ung' kenyiisyek lo ak iges ruratennyi,

¹¹ ago mete eng' kenyiit ne po tisap kotep komuuny. Niito ko si kobiit konyoor turoonik kibananogap piiguk, ak koam tyong'igap timiin che ituuchi pichooto. Iyae ko uu nooto eng' mbareeng'ung' ne po sabibuk ak eng' mbareeng'ung' ne po keetiigap mseituni che punu mwanik.

¹² “Yai poisyeng'ung' eng' peetuusyek lo ak imuuny eng' peetuutap tisap. Iyae niito si kobiit komuuny eitang'ung' ak sigiryeng'ung' ak konyoor kamuung'et weeriitap otwogindeng'ung' ne tye ak toondet.

¹³ Riip tuguuk tugul che kaamwaun. Amat imwa kainaigap kamuktaik, amat kegasyi kutinng'ung'.

Igoorta ne oo

¹⁴ “Iyaiywo igoorto konyil somok eng' kenyiit age tugul.

¹⁵ Yai igoortap magatiinik che ma kinde mermereek. Iame eng' peetuusyek tisap magatiinik che ma kinde mermereek ko uu ye ki ang'atiin eng' peetuut ne ki kiaror eng' arawetap Abib; amu arawanooto ne ki omang'une Misiri. Amat konyo chii tainnyu ak euut puch.

¹⁶ Riip igoorto ne po kesisyet eng' tongoanigap minutikyik che igooljini mbar. Riip kora igoortap peetuusyek che kiyumune tuguugap mbar eng' kagesunetap kenyiit, ye iyumi tuguugap poisyeng'ung' eng' mbar.

¹⁷ Pwoonei taitap Kiptaiyat Kamuktaindet ne Toroor murenik tugul konyil somok eng' kenyiit agenge.

¹⁸ “Ameibu korotiigap tiseiywondennyu kobooto magatiinik che kaginde mermereek. Amengoeekyi mwanigap igoortanyu.

¹⁹ “Kanyool iibu tuguuk che po tai eng' tongoanik che po emeng'ung' kobwa kootap Kamuktaindet ne Toroor Kamuktaindeng'ung'. “Ameyoe aarwet cheegap kamet.

Kayomiset ak Ng'atuutik agobo itetap Kanaan

²⁰ “Ayooktoi anyun malaikaiyat kondoenak koriibootok eng' ooreet ak komutaak obe ole ki achop.

²¹ Oriipkei eng' tainnyi ak ogas iit ng'aleekyik; ama ta obistoe ineendet. Amu ma nyochin kaat pistoeng'wong' amu mi kainennyu eng' ineendet.

²² Ago ngigas iit ng'aleekyik, ak iyai tugul che amwaun, aegu anyun puunyootap puuniguk, ak aegu usiindetap che usin.

²³ Amu wendi malaikaiyandennyu kondoenen, komutin iwe ole mi Amorik, Hitik, Perisik, Kanaanik, Hibik ak Jebusik ak aiste icheek awong'u.

²⁴ Amat isaa kanamonikwak, anan ioot, anan isup poisyonikwak. Ago oluul kot koma ng'et kiy ak obut kotonogis tolochikwak.

²⁵ Oboisyeiwo anee Kamuktaindet ne Toroor Kamuktaindeng'wong', si koberuur amitwogiguk ak peeguk, ak aiste myanwogik eng' kwenung'ung'.

²⁶ Ma piitu ne rorogu moet anan ne oosu anan ne soneni eng' emeng'ung'. Ayae kosulda koitetap peetuusyeguk.

²⁷ “Ayooktoi kamuisennyu kondoenen ak anyaliil piik tugul che mi ole iite ak ayai puuniguk tugul komweenen.

²⁸ Ayooktoi kaaraamyet kondoenen kwo koon Hibik, Kanaanik ak Hitik, koba eng' taing'ung'.

²⁹ Maone icheek koba eng' taing'ung' eng' kenyiit agenge, si ma kuber emet ak kotesagis tyong'igap timiin ak koiimak.

³⁰ Ago aoone komutya koba eng' taing'ung' agoi itesage ak inyaban emet.

³¹ Andoi kiwoteng'ung' koboochit Araraita ne Piriir agoi nyanjetap Mediterenian ak koboochit surkwen agoi aineet. Amu andoi piigap emonooto eunekwok, si ioon icheek koba eng' taing'ung'.

³² Amoyai arorut ak icheek, anan agot eng' kanamonikwak.

³³ Amat komeny emeng'ung' si ma koonin iyaiywo tengek. Amu imuuch ioot kamuktaikwak koek nooto iman mesteet eng' inyee.”