KOMONG'U 21 - BUKUIT NE TILIIL Sireet ne Dutero Kanon

Ng'atuutik agobo otwogik.

¹ Chu anyun ng'atuutik che indechini tainnywa:

² Ngial otwogindet ne Hebranindet, koboisyeun kenyiisyek lo, ak eng' kenyiitap tisap kowendi puch kotyagat.

³ Ngo ki nyonei ineegei, komandoi ineegei. Ago ngo kiga kotunis komandoi ak osotyonnyi.

⁴ Ago ngo ki igoochin kiptaiyandennyi osotyot ak kosikyi weeriik anan ko tiibiik, kobunjiin osotyondonooto ak lagokyik kiptaiyandennyi ak komanda chiichooto ineegei.

⁵ Ngo mwa ineegei eng' chamennyi otwogindet kole achame anee kiptaiyandennyu, osotyondennyu ak lagokyuk, ma mandoi nganda atyagat,

⁶ komut anyun kiptaiyandennyi chiichooto kwo taitap Kamuktaindet. Yeityo kimut konyo kurgat anan tugatukyetap kurgeet ak kobarbar itinnyi kiptaiyandennyi eng' kateet si koot ineendet agoi.

⁷ Ngo alda chii cheptonyi koek otwogindet koma mandoi chebooto ko uu otwogik che muren.

⁸ Ngo ma ibaibai chebooto kiptaiyandennyi ne ki lewen kole si tuun koek osotyonnyi, kochamda koek ne ityagat. Ma tinyei kimnateet kiptaiyandennyi koalda kwo pororyosyek alak amu king'al ineendet.

⁹ Ngo koochi weeriinnyi koek osotyonnyi, koyachin chebooto ko uu ye yachin tiibiikyik.

¹⁰ Ngo syon, ko mat kochuchuch amitwogikyik anan ngoroikyik anan ko uu ye nyoljin osotik.

¹¹ Ngo ma yachi ineendet tuguuchooto somok, komuuchi osotyondonooto kwo puch ama melekto age tugul.

Ng'atuutik agobo yaityet

¹² Ineendet ne pirei chii kot kome, kebarei ne matiny.

¹³ Ago chii ne kama koyaei ko kwetyin, ago ki yaak eng' mageetap Kamuktaindet, achopchini ole imuuchi komwechi.

¹⁴ Ngosetyi chii chiitap kokwennyi ak kobar ineendet eng' ng'aalseet, ko agot ngo mwechi kaptisisyennyu, omong'u ineendet si kebar.

¹⁵ Ineendet ne pirei kwan anan kamet, kebarei ne matiny.

¹⁶ Ineendet ne choorei chii ak koalda anan ngenamji komi eunekyik, kebarei iman.

¹⁷ Ineendet ne sasei kwan anan kamet, kebarei iman.

¹⁸ “Ngo pooryo piik ak kewire age koita, anan ngo luch ama ta kome, ago iguotenot ne mang'etei eng' itogunnyi,

¹⁹ ak ngot kong'eet kowendot kotebenoti kiroktonyi, keunda anyun ne kibirei. Ago nganda kiuundoi, kogoochin tuguuk che yamei peetuusyekyik che kibetyo puch ak konya ineendet komyee agoi kosap.

²⁰ “Ngo pir chii otwogindennyi ne muren anan ne tye eng' kirokto kot komechi eunekyik, kigeerchin chiichooto yaityennyi ne matiny.

²¹ Ago ngot koeekyi peetuut agenge anan ko aeng' ama me, koma kigeerchin kiy, amu kiga al ineendet.

²² “Ngo pooryo piik kot kokwer osotyot ne tomono ak kororok moet ama koam kiy osotyondonooto, kogeerchin ineendet ne kalel che yamegei ak che machei manong'otyotap osotyondonooto. Igoitoi ko uu ye kamwa kirwoogik.

²³ Ago ngo yaak kiy ne ya, kigeeri saboondo eng' saboondo,

²⁴ konda eng' konda, keldet eng' keldet, euut eng' euut, keeldo eng' keeldo,

²⁵ peelset eng' peelset, kaguotenet eng' kaguotenet, pireet eng' pireet.

²⁶ “Ngo kwer chii kondap otwogindennyi ne muren anan ne tye, kot kotui, kounda kwo kotyagat amu kondanyi.

²⁷ Ngo kwer keldetap otwogindennyi ne muren anan otwogindennyi ne tye kot kochun, kounda kwo kotyagat amu keldennyi.

²⁸ “Ngo toor kirgit muren anan kobogoryo ak kome, kelachei kirgootok iman ak ma ki amei panyeekyik. Ma ki ityin anyun chiitap ko po kirgooto leluut age tugul.

²⁹ Ago ngo kocham kobarei piich kirgooto ak kigemwachi chiitap ko po ama koger ineendet, ago kabar muren anan kobogoryo, kelachei kirgooto ak kebar chiitap ko po agine.

³⁰ Ago ngemage ineendet kagerutyet kotyagegei, kogoito anyun nooto kityage saboondanyi ko uu ye magaat.

³¹ Kiyae ko uu kirwoogoniito ngo ki par kirgooto weeriit anan ko chepto.

³² Ngo toor kirgit otwogindet ne muren anan otwogindet ne tye, kogoitoi chiitap ko po kirgit shekelisyek sosom che po fedha, kogoochin kiptaiyannywa ak kelach kirgooto kebar.

³³ “Ngo yaat chii keriinget anan ngo pal keriing' ama koger ak kororokyi tany anan sigiryo,

³⁴ kogeeri chiichooto po keriinget, ak kogoochi chiitap ko po tuguuchooto silingisyek, ak kobunji nooto kagome chiitap ko po keriinget.

³⁵ “Ngo par kirgit kirgitap chiito age kot kome, kealdoi nooto sabei ak kopchei pichooto po kiruugik tuguuk che kagialdae ak kopchei panyeegap nooto kame.

³⁶ Ago ngot kingen keele ki cham kobarisyei kirgooto, ama koger chiitap ko po, kowale kirgooto kirgit age ak kobunji ineendet panyeegap nooto kame.”