KOMONG'U 20 - BUKUIT NE TILIIL Sireet ne Dutero Kanon

Ng'atuutik taman

¹ Ki mwa Kamuktaindet ng'aleechu tugul kole,

² “Aa Kamuktaindet ne Toroor, Kamuktaindeng'ung' ne ki imutun imang'une emetap Misiri, kootap otwoknateet.

³ Amecheeng'jigei cheptalelisyek che teer, kobatena aneege.

⁴ Ameyachigei kanamwet anan itoondap kiy age tugul ne mi parak kipsengwet anan ne mi ng'wony anan ne mi nyanjet ng'wony oriit;

⁵ ameng'uruukyi anan ioot icheek, amu anee Kamuktaindet ne Toroor Kamuktaindeng'ung', ko aa Kamuktaindet ne ama ng'etkong'. Ageerchini lagok tengektap kwanisyekwak agoi ibindap somok ak ne po ang'wan eng' icheek che wecho.

⁶ Ago ariiree eliphuusyek eng' icheek che chama ak kosubi ng'atuutikyuk.

⁷ Amemwa kainetap Kamuktaindet ne Toroor Kamuktaindeng'ung' eng' tangoi. Amu iityin Kamuktaindet ne Toroor ng'oogisto ne mwaei kainennyi eng' tangoi.

⁸ Ibwaat peetuutap sabato, iriip itabaan.

⁹ Iboisyee peetuusyek lo ak iyai poisyoniguk tugul,

¹⁰ ago peetuutap tisap ko sabato ne po Kamuktaindet ne Toroor Kamuktaindeng'ung'. Ameyai poisyo eng' peetuunooto inyee anan weeriing'ung' anan cheptong'ung', anan otwogindeng'ung' ne muren anan otwogindeng'ung' ne tye anan tuguuk anan toondeng'ung' ne miitei kurgotiguk.

¹¹ Amu ki yai Kamuktaindet ne Toroor kipsengwet ak ng'wony, nyanjet ak tuguuk tugul che mi oriitinnywa eng' peetuusyek lo ak komuuny eng' peetuutap tisap. Ki iberuur anyun Kamuktaindet ne Toroor peetuutap sabato amu nooto ak kotabaan.

¹² Teech kwandang'ung' ak kamenng'ung' si kochang'a peetuusyeguk eng' emet ne koonin Kamuktaindet ne Toroor Kamuktaindeng'ung'.

¹³ Amerumisye.

¹⁴ Amoipkei.

¹⁵ Amechoorse.

¹⁶ Amebaoryanji chiitap kokweng'ung' eng' lembech.

¹⁷ Amegase myat kootap chiitap kokweng'ung'. Amegase myat osotyotap chiitap kokweng'ung' anan otwogindennyi ne muren anan otwogindennyi ne tye anan eitonyi anan sigiryennyi anan kiy age tugul ne po chiitap kokweng'ung'.”

¹⁸ Ye kingo keer piik tugul kalyelosyek ak tulweet ne ki iyeni, ak kogas tuleetap ilotik ak cheetap iryageet, kobotanso eng' arageneet ak kotononso eng' ole loo.

¹⁹ Ak ki leenji `icheek Musa, “Ng'alaalwech inyee si kegasin, ago amengong'alaalwech Kamuktaindet, amu ngot ko ng'alaalwech ineendet kebeguu.”

²⁰ Koleenji `Musa piik, “Amoiywei, amu kanyo Kamuktaindennyo kotyemak si kotebee taing'wong' kaiyweisyennyi ne oiywei ineendet asi moyai tengek.”

²¹ Kitononso piik anyun eng' ole loo ak kiriikta Musa ole mi Kamuktaindet eng' pooldet ne tuui.

²² Ki leenji `Kamuktaindet ne Toroor Musa, “Mwachi piigap Israel leenjin, ‘Kaogeerchigei okweegei ole, kaang'alaalwok kong'etee kipsengwet.

²³ Amat oyachigei kanamonik otesena che po fedha, anan kanamonik che po thahabu.

²⁴ Teekwo kaptisyet ne po ng'ung'unyek ak ieng'wo eng' kaptisisyonooto kagoochinoiguk che kibeelei ak kagoochinoiguk che po kaalyeet, keechiireguk ak tuguuk. Anyoonjinin ak aberuurin eng' komosta age tugul ole andoi kainennyu kibwaate.

²⁵ Ngimache iteekwo kaptisisyet ne po koik, ko meteege koik che ki kiwai amu ngiwai, ko keng'wanit.

²⁶ Ametogoste iwe kaptisisyennyu ibune lang'eiywot si mewe aach ngor.’ ”