KOMONG'U 2 - BUKUIT NE TILIIL Sireet ne Dutero Kanon

Sigeetap Musa.

¹ Eng' peetuusyechooto ko ki itunis chiito age ne po pororyetap Lawi, kotun cheptap pororyonooto po Lawi.

² Ak ki manach osotyondonooto ak kosich weeriit, ak ye kingo keer kole lakweet ne karaaran, kouny ineendet arawek somok.

³ Ye ki mata komuuchi kouny kosiir yooto, kocheeng'ji ineendet kitonget ne po mutweek, ak komale lamit ak manget ak konde lakweet oriit. Yeityo konde kouny eng' saoset oriit eng' ngeguutap aineet.

⁴ Kitonone chepkamet ye ma loo, si kogeer kiit ne tos yaak eng' lakwanooto.

⁵ Ki choortagei cheptap Pharaoh kwo kouungei eng' aino. Ye kibendoti tiibiik eng' tabandap aineet che ki mi kobooto ineendet, kogeer cheptap Pharaoh kitonget eng' saoset oriit ak ki iyookto otwogindennyi kwo koipchi.

⁶ Kingo yaat kogeer lakweet ne weeriit koriirei. Kiriree `ineendet lakwanooto ak kole; “Agenge lakwani eng' che po Yahudik.”

⁷ ki teebee chepkametap lakwanooto cheptap Pharaoh koleenji; “Tos myee awo aguurun cheplakwet eng' osotigap Yahudik si koriibun lakwaniito?”

⁸ Koleenji cheptap Pharaoh; “Ee, Ui iguur.” Ki wo anyun chebooto koguur kametap lakweet.

⁹ Ki leenji `cheptap Pharaoh ineendet; “Imut lakwani, ui iiguiywa, si agoonin melektang'ung'.” Ki imut anyun osotyondonooto lakweet ak koriip.

¹⁰ Kingo kagoner ak koeet lakweet, komutyi cheptap Pharaoh ak ki nam koek weeriinnyi. Kiguure kainennyi Musa kole: “Amu ki among'u eng' peek.”

¹¹ Eng' peetuusyek alak ye kiga koeet Musa, ko ki wo ole mi tupchosyekyik ak ki keer laisennywa. Ki keer Misirindet kobirei Hebranindet ne ki age eng' piikyik.

¹² Kigusyigong' Musa komosi ak komosi, ak kingo keer kole ma mi chii, kobar misirindonooto ak kotube ng'aniek.

¹³ Ki wo kogeny eng' peetuut ne po aeng' ak ki keer kobiregei piik aeng'u che po Yahudik. Koleenji ineendet ne ki kalel, “Amu nee si ibir chiing'wong'?”

¹⁴ Kowolji koleenji, “Ng'oo ne koindein iegu pounindet ak kirwoogindet irwookwech? Ileen ibara, ko uu ye koibar Misirindet?” Amu niito ko ki iyweis Musa ak ki ibwaat kole, “Kaagaa kogenai niito.”

¹⁵ Kingo kas Pharaoh ng'olyoondonooto, kocheeng' kobar Musa. Ago ki mwei anyun Musa eng' taitap Pharaoh ak kwo komeny emetap Midian, kotebi eng' ole neegitee keriingetap peek.

¹⁶ Ki pwa tiibiik tisabu che po tisiindet age ne po Midian si kosiil peek konyiit moingonik si kobiit konaga akweetap keechiiregap kwandanywa.

¹⁷ Ak ki pwa mestoweek koon tiipchooto, ago king'eet Musa kotoret ak konaga peek akweet.

¹⁸ Ye kingo it tiipchooto ole mi kwandanywa Reuel, koteebe koleenji, “Ngo sip oweigei rani?”

¹⁹ Kowol icheek kole; “Katoretech Misirindet eng' eunegap mestoweek, yeityo kosiilwech peek ak konaga akweet.”

²⁰ Koleenji icheek; “Mi ano chiichooto? Amu nee si omete? Oguur konyo koamis.”

²¹ Ki cham Musa kotebi ak chiichooto, ak ki igoochi `ineendet Musa cheptonyi Ziporah kotun.

²² Ki sich `Ziporah weeriit, ak kiguure Musa kainennyi Gershom. Amu ki le; “Aa kiprutoiyo eng' emetap pororyosyek alak.”

²³ Ye kingo pata peetuusyek che chaang', kome laitoryatap Misiri. Ki tigenso eng' ng'wanindo ak koriiryo piigap Israel amu otwoknateet, ak ki ityi riirekwak Kamuktaindet amu otwoknateet.

²⁴ Ki kas Kamuktaindet tigenoikwak, ak ki ibwaat kayomisennyi ne ki iyomisyi Abraham, Isak ak Jakobo.

²⁵ Ki keer Kamuktaindet piigap Israel, ak ki nai kiit ne uu.