KOMONG'U 19 - BUKUIT NE TILIIL Sireet ne Dutero Kanon

Koitei piigap Israel Sinai.

¹ Ki it anyun piigap Israel surkwen ne po Sinai eng' arawet ne po somok kobooch ngap komanda eng' emetap Misiri.

² Kingo kagoba eng' Rephidim ak koit surkwen ne po Sinai, komuung'so eng' olooto ak kotebee ye kigatokyigei tulweet.

³ Ki togosta Musa kwo ole mi Kamuktaindet ak kiguur `Kamuktaindet ne Toroor ineendet eng' tulweet koleenji, “Mwachi ko uu ni kootap Jakobo, ak imwachi piigap Israel ileenji,

⁴ ‘Ki ogeer kiit ne ki ayachi Misiriik ak ko uu ye ki agesenenak kebebaigap kipsichinik amutwak obwanjo.

⁵ Eng' nooto anyun, ngot ogas iit kutinnyu iman ak oriip kayomisennyu, oegu anyun iman eng' anee chamanikyuk che itabaanatiin eng' piik tugul, amu nenyu ng'wony komugul.

⁶ Oegu eng' anee laitornatetap tisiik ak pororyet ne itabaanat. Chuuto ng'aleek che iwendi imwachini piigap Israel.’ ”

⁷ Ki nyo anyun Musa koguur poisyegap pichooto ak kotetyi icheek ng'aleechooto tugul che ki kang'at `Kamuktaindet ne Toroor ineendet.

⁸ Ki wol piik tugul eng' kibagenge kole, “Kiyae chooto tugul kamwa Kamuktaindet ne Toroor.” Ki ipchi anyun `Musa Kamuktaindet ne Toroor ng'aleegap piik,

⁹ ak ki leenji `Kamuktaindet ne Toroor Musa, “Anyoonjinin iman eng' pooldet ne tuui si kobiit kogas piik ye ang'alaalun ak koyanin agoi.” Kingo mwachi `Musa Kamuktaindet ne Toroor ng'aleegap piik,

¹⁰ koleenji `Kamuktaindet ne Toroor ineendet, “Chortegei ui ole mi piik ianyiny icheek ra ak mutai ak ingomwet ngoroikwak.

¹¹ Ingochopkei agobo peetuut ne po somok: amu choorchingei Kamuktaindet ne Toroor tulweetap Sinai eng' peetuutap somok eng' taitap piik tugul.

¹² Tilji piik ole iboch ak ileenji; ‘Oriipkei si motogoste tulweet anan otwaa kiwotennyi. Kibarei age tugul ne tiinyei tulweet.

¹³ Ma kitiinyei eng' euut chii ne katiny kobatee kilage koik anan kemwok. Ama sabei age tugul, ngo tyony anan chii. Ye ki kuut igonditap kuinetap mengit kochulyo kotogos icheeget kobwa tulweet.’ ”

¹⁴ Ki choortagei Musa anyun kwo ole mi piik, kwo koanyiny icheeget ak kimwet icheek ngoroikwak.

¹⁵ Ki leenji piik, “Ochopkei ogen peetuutap somok amat koriikyi chii kobogoryo.”

¹⁶ Eng' peetuutap somok anyun, ko kaeech kobiit tuloosyek ak kalyelosyek. Ki ilaach `pooldet ne tuui tulweet ak ki mi cheetap iryageet ne cheei kot. Kibotanso piik tugul che ki mi nganaseet.

¹⁷ Ki indochi `Musa piik ak komuut komong' eng' nganaseet koba kotuiyo ak Kamuktaindet. Ki pa anyun piik kotononie tulweet keel.

¹⁸ Ki iyeni tulweet komugul ne po Sinai amu kichoorchigei `Kamuktaindet ne Toroor tulwoonooto eng' maat. Ki togosta iyetanyi ne uu ne po maat ne oo kot ak ki potan tulweet miising'.

¹⁹ Kingo tesak cheetap iryageet kwo parak miising', kotwek Musa ak ki wolji `Kamuktaindet ineendet eng' tuugeet.

²⁰ Kichoorchigei Kamuktaindet ne Toroor tulweetap Sinai parak ak kiguur `Kamuktaindet ne Toroor Musa kwo tulweet parak, ak kitogosta Musa.

²¹ Yeityo koleenji `Kamuktaindet ne Toroor Musa, “Ui choortegei iteechi piik si ma put kiwateet kogeer Kamuktaindet ne Toroor ak kobek che chaang'.

²² Ingoanyinygei tisiik ak icheek che riikyin Kamuktaindet ne Toroor si ma par icheek.”

²³ Ki leenji `Musa Kamuktaindet ne Toroor, “Ma chamdaat eng' piik kotogos tulwooniito po Sinai, amu ki iteiywech ileenjech, ‘Onde kiwateet tulweet ak otabaan.’ ”

²⁴ Ak ki wolji `Kamuktaindet ne Toroor ineendet koleenji, “Ui choortegei si otogosu ak Aron. Ago amat kobut piik ak tisiik kiwateet kotogos ole mi Kamuktaindet ne Toroor si ma par `ineendet icheek.”

²⁵ Ki choortagei anyun Musa kwo ole mi piik, kwo komwachi.