KOMONG'U 18 - BUKUIT NE TILIIL Sireet ne Dutero Kanon

Korutochin `Jethro Musa.

¹ Ki kas anyun Jethro tisiindetap Midian, kabyugoitap Musa agobo tugul che ki koyachi `Kamuktaindet Musa ak piikyik Israel. Ki kas ole ki imutunda `Kamuktaindet ne Toroor Israel komang'une Misiri.

² Ki imut anyun `Jethro Ziporah, osotyotap Musa amu kiga koweekta Musa ineendet kwo,

³ ak weeriikyik aeng'. Ki kiguure age Gerson, amu ki le, “Ki aegunote kiprutoiyo eng' emetap pororyosyek alak”,

⁴ ak ki kiguure age Elieser; amu ki le, “Ki ek toretindennyu Kamuktaindet ne po abba ak kisarwo eng' rotwetap chok ne po Pharaoh.”

⁵ Ki wo anyun Jethro kobooto weeriigap Musa ak osotyonnyi ole ki mi Musa eng' surkwen komuunyi eng' tulweetap Kamuktaindet.

⁶ Ki iyookto ineendet keleenji Musa, “Kaaitu oling'ung' anee Jethro kabyugoing'ung' kobooto osotyondeng'ung' ak weeriikyik aeng'.”

⁷ Ki manda anyun Musa kwo kotorookta kapyugoinnyi. Ki ing'uruuk ak kotoroochkei ak kiteebegei chametapkei yeityo komanda koba emait oriit.

⁸ Ki mwachi Musa anyun kapyugoinnyi tuguuk tugul che ki koyachi `Kamuktaindet ne Toroor Pharaoh ak Misiriik agobo Israel, ak nyalilwogik tugul che kinyoor eng' ooreet ak ole kisaruundo icheek `Kamuktaindet ne Toroor.

⁹ Ki paibait Jethro amu myeeindo tugul ne kiga koyachi `Kamuktaindet ne Toroor Israel kosar icheek komang'une eunegap Misiriik.

¹⁰ Ki le Jethro, “Iberuurot Kamuktaindet ne Toroor ne kisarwok eng' eunegap Misiriik ak eng' eutap Pharaoh, ne ki sar piik komang'une pounatetap Misiriik.

¹¹ Angen nguno anyun ale oo Kamuktaindet ne Toroor kosiir kamuktaik tugul. Amu ki sar piik eng' eunegap Misiriik che ki yachi pichooto kiit ne ya eng' menoteet.”

¹² Eng' yooto anyun konam Jethro kabyugoitap Musa kagoochinet ne kibeelei ak tiseiywot ak koeng'ji Kamuktaindet. Ki nyo Aron kobooto poisyek tugul che po Israel koamis ak kabyugoitap Musa eng' taitap Kamuktaindet.

Lewenetap Kirwoogik.

¹³ Eng' karonet ne po aeng', kotep ng'wony Musa korwooksechi piik. Ki tononso piik eng' ole mi Musa kong'etee karon agoi koimen.

¹⁴ Ye kingo keer kabyugoitap Musa tuguuk tugul che ki yachin `Musa piik, koteebe koleenji, “Nee ni iyachini piik? Amu nee si itebi inyegei ak kotonondos piik tugul ko kayiemin kobooch karon agoi koimen?”

¹⁵ Kowolji `Musa kapyugoinnyi koleenji, “Amu pwonjino piik si koteepse Kamuktaindet ne Toroor.

¹⁶ Ye tinyei ng'olyoo kobwonjino, ak abesyechini chii tugul ak chiitap kokwennyi. Aneeti icheek konai kaneetisyosyegap Kamuktaindet ne Toroor ak ng'atuutikyik.”

¹⁷ Koleenji anyun `kapyugoinnyi Musa, “Ma myee kii iyae.

¹⁸ Iwong'ugei kimnateng'ung' inyee ak ne po pichu omiitei tugul. Amu siirei kimnateng'ung' niito ago memuuchi iyai inyegei.

¹⁹ Kas anyun ng'olyoondennyu aboorun kiit ne iyae ak ingotep Kamuktaindet kobooten. Myee iegu ne ing'alaaljini Kamuktaindet ne kata piik ak iipchi Kamuktaindet ng'aleekwak.

²⁰ Ineet icheek kaneetisyosyek, ng'atuutik ak iboorchi ooreet ne kanyolji koosup ak poisyet ne kanyolji koyai.

²¹ Nyolu kogeny ilewenote eng' piik tugul piik che kiimeen, che iywei Kamuktaindet, piigap imanit che wechei tuguugap asoya. Inde icheek koboi piik koek pounigap eliphuusyek, che po pogolwogik, che po konomusyek ak che po tamanusyek.

²² Ingoek icheek kirwoogik che irwookyin piik eng' peetuusyek tugul ak koibun ng'olyoot age tugul ne uui. Ago ingobesyechi icheek ng'olyoo age tugul ne ming'in, si kobiit konyamnyumun amu kogesen tugul.

²³ Ngot iyai kiito anyun ak ngo ng'atin Kamuktaindet ko uu nooto, imuuch anyun itonon ak koba pichu tugul ak icheek oldanywa eng' kaalyeet.”

²⁴ Ki kas anyun Musa ng'aleegap kapyugoinnyi ak ki yai chooto tugul kamwachi ineendet.

²⁵ Ki lewenot piik che kiimeen eng' Israel tugul ak konde koboi piik koek pounik che po eliphuusyek, che po pogolwogik, che po konomusyek ak che po tamanusyek.

²⁶ Ki irwookyin `icheek piik eng' peetuusyek tugul. Ki ipchi Musa ng'aleek che uueen ago ki ibesyechi icheek ng'olyoo age tugul ne ming'in.

²⁷ Yeityo kochamji anyun `Musa kapyugoinnyi kwo. Ki wo anyun pandanyi agoi emennyi.