KOMONG'U 14 - BUKUIT NE TILIIL Sireet ne Dutero Kanon

Kolondoe piigap Israel nyanjet

¹ Yeityo koleenji `Kamuktaindet ne Toroor Musa,

² “Mwachi lagogap Israel koweek komuung'e taitap Pi-hairot kwenutap Migdol ak nyanjet ole itoorchingei Baal-sepon ak komuung'e yooto neegitee nyanjet.

³ Amu tuun mwaei Pharaoh agobo piigap Israel koleen, ‘Ki kobetyo eng' emet ak ki kogeer surkwen icheek.’

⁴ Eng' yooto kogeny auuiiti muguleldap Pharaoh si koosup icheek ak anyoorunee teegisto Pharaoh ak lugeennyi tugul si konai Misiriik kole aa Kamuktaindet ne Toroor.” Ki yai anyun piigap Israel ko uu nooto.

⁵ Ki ngemwachi laitoryatap Misiri keleenji, “Kogoba komweiso piik,” kogiwalak muguleldanyi ak kowalagis mugulelwegap otwogikyik agobo piigap Israel ak ki ibwaat icheek kole, “Nee kii kogeyai, kot kechamji Yahudik koba kometo otwoknateet ne kootech?”

⁶ Ki chop anyun chepkichutitap paraisiit ak komut asigarikyik che po lugeet.

⁷ Ki ip kariisyegap paraisisyek che po lugeet pogol lo che ki kilewen ak kariisyegap paraisisyek che po lugeet alak che po Misiri kotinyei age tugul kiptainikwak che ki pou.

⁸ Ki iuit Kamuktaindet ne Toroor muguleldap Pharaoh laitoryatap Misiri ak ki isup piigap Israel che kimondoi eng' kimnateet ne oo.

⁹ Ki isup `Misiriik icheek ak paraisisyek tugul, kariisyek che po Pharaoh, piikyik che ki laanyei paraisisyek ak lugeennyi. Ki namji icheek ole ki imuung'ee eng' ye neegit nyanjet, koriikyin Pi-hairot ole tokyingei Baal-sepon.

¹⁰ Ye kingo riikta Pharaoh, kotabendo piigap Israel ak ki keer kobwanei Misiriik kosubu icheek. Ki toi koyweis miising' ak koriirchi Kamuktaindet ne Toroor.

¹¹ Ki ing'ung'ung'ji `icheek Musa ak koleenji, “Tos ki imutwech kebekyi surkwoni amu ki ma komi kereeriisyek Misiri? Amu nee si iyaiywech ko uu ni, imoong'wech eng' Misiri?

¹² Tos ma ki kimwaun eng' Misiri keleenjin, ‘Pagaaktech keoot Misiriik?’ Amu kita kaigai keoot Misiriik kosiir kebekyi surkwen.”

¹³ Ago ki wolji `Musa piik koleenji, “Amoiywei, ogany kityo si ogeer yetunetap Kamuktaindet ne Toroor ne yaiywok rani. Amu ma ogeere kogeny misirichu ogeere rani.

¹⁴ Yaei Kamuktaindet ne Toroor ineendet lugeet agobo okweek; osisye okweek.”

¹⁵ Koleenji `Kamuktaindet ne Toroor Musa, “Amu nee si iriircho? Ileenji piigap Israel koba kotestai.

¹⁶ Namji parak kiroktong'ung' ak ichuul eung'ung' itokyi nyanjet, si kopcheak kobun aeng' ak kobun piigap Israel kwenutap nyanjet, ng'wonyut ole yaamaat.

¹⁷ Auuiiti aneendet mugulelwegap Misiriik, si koosup icheek ak anyoorunee teegisto Pharaoh, lugeennyi tugul, kariisyekyik ak piikyik che ketei paraisisyek.

¹⁸ Ye kaanyoorunee teegisto Pharaoh, kariisyekyik, ak piikyik che ketei paraisisyek, konai Misiriik kole aa Kamuktaindet ne Toroor.”

¹⁹ Ki wo anyun let malaikaiyatap Kamuktaindet ne ki indoe piigap Israel ak ki wo kora toloitap pooldet ne ki mi tainnywa ak kotonone let.

²⁰ Kitonone kwenutap lugeetap Misiriik ak tuiyetap Israel. Kingo imen, kooluu poldanooto kookweng'ji piigap Israel, ak ki mi mesundeito komostap Misiriik; ki ma riikyin lugeetap Misiriik ak tuiyetap piigap Israel eng' kemout komugul.

²¹ Ki chuul Musa eunnyi kotokyi nyanjet ak ki iyook Kamuktaindet usoonet ne punu kong'asiis kous kemout komugul koobeesyo peek si kobiit emet ne yaamaat; ak kipcheigei peek.

²² Ki pa anyun piigap Israel kobun emet ne yaamaat eng' kwenutap nyanjet. Kitoten peek eng' komostap tai ak eng' komostap kaataam.

²³ Ki isup `Misiriik icheek kochoorchigei kwenutap nyanjet; paraisisyek tugul che po Pharaoh ak kariisyekyik ak piikyik che ketei paraisisyek.

²⁴ Eng' riipseet ne po karon, kogeerot Kamuktaindet ne Toroor lugeetap Misiri, kogeerunee toloitap maat ak ne po pooldet ak kogochi lugeetap Misiriik koaragenso.

²⁵ Kichun keelyegap kariisyekwak ak kong'onng'onio kot ko ye ki kwerye ko uueen. Kole anyun Misiriik, “Ongemwee Yahudik amu yaei Kamuktaindet ne Toroor lugeet agobo icheek konyo kobarech acheek.”

²⁶ Yeityo koleenji `Kamuktaindet ne Toroor Musa, “Chuul eung'ung' tokyi nyanjet si kobiit koweigei peek kotuch Misiriik kobooto kariisyekwak ak piikwak che laanyei mbatanyisyek.”

²⁷ Ki chuul Musa eunnyi kotokyi nyanjet ak ki weigei peek kotuiyo ko uu yegonye ko kaeech. Ki mweiso Misiriik ye kingo keer peek kotokyingei icheeget ago kitoorchi `Kamuktaindet ne Toroor Misiriik kwenutap nyanjet.

²⁸ Ki weigei peek komaaluuch kariisyek, piik che ketei paraisisyek ak lugeet tugul ne po Pharaoh ne ki isubi icheek kobendi nyanjet. Ki ma ng'et agot agenge eng' icheek.

²⁹ Ago ki pun piigap Israel ng'wonyut ne yaamaat eng' kwenutap nyanjet ko katoten peek eng' komosi ak komosi.

³⁰ Ki sar eng' peetuunooto anyun `Kamuktaindet ne Toroor Israel eng' eunegap Misiriik ak ki keer `Israel Misiriik ko kagobek komi ngeguutap nyanjet.

³¹ Ki keer Israel poisyet ne kiim ne ki yachi `Kamuktaindet ne Toroor Misiriik. Ki iywei anyun `piik Kamuktaindet ne Toroor ak koyan `icheek ineendet ak Musa otwogindennyi.