KOLOSAIK 4 - BUKUIT NE TILIIL Sireet ne Dutero Kanon

¹ Kiptainichu, ogoochini otwogikwok nooto ne po imanda ak ne nyolu; ongen ole otinye ak okweek Kiptaiyat eng' kipsengwet.

Katigonutik

² Ogiiligei kotugul eng' saaet, oriipsei eng' nooto kobooto kongoi;

³ osaiywech ak acheek, si koyatwech Kamuktaindet kurgeet ne po ng'olyoot, kemwa ung'ootyetap Kristo; ki kirata agobo nooto;

⁴ si aboortoi, ko uu ye nyolu amwa.

⁵ Obendoti eng' ng'omnateet eng' taitap icheeget che mi saang', ingoek saisyek kamanuut eng' okweek.

⁶ Ingotep ng'aleekwok eng' myeeindo kotugul, koanyinyogis eng' muunyuk, si kobiit onai ole kanyool owoljinde chii age tugul.

Ng'aleek che po let

⁷ Mwaiwok ng'aleekyuk tugul Tukiko, tupchet ne chamat, ak ko kiboityot ne iyanaat, ineendet otwogindet ne kiboisyei tuwai eng' Kiptaiyat:

⁸ ne koayokwok amu ng'olyoondoniito, si kobiit onai atebeennyo, si kogaigai mugulelwekwok;

⁹ kobooto Onesmus, tupchet ne kiyani ak kochamaat, ne age eng' okweek. Mwaiwok icheek tuguuk tugul che po olito.

¹⁰ Igatok Aristarko ne ki kimonjororinik tuwai, ak Mariko ne tupchetap Barnaba (ki onyooru ng'aleek agobo ineendet; ngo nyonjok, otaach),

¹¹ ak Jeso, ne kiguure Justo, icheeget che po che imuratonotin: chuuto kityo che keboisyei tugul agobo laitornatetap Kamuktaindet, icheeget che ki koek kagaigaet eng' anee.

¹² Igatok Epapra, ne age eng' okweek, otwogindetap Kristo Jeso, igiilegei kotugul agobo okweek eng' saautikyik, si kobiit otononse ko ogesunotingei, ak ongen komyee mageet tugul ne po Kamuktaindet.

¹³ Amu abaoryani agobo ineendet, ale tinyei kagiiletapkei ne oo agobo okweek, ak agobo icheek che miitei Laodikia, ak icheek che miitei Hierapoli.

¹⁴ Igatok Luka, chepkerichot ne chamaneet, ak Dema.

¹⁵ Ogat tupchosyek che miitei Laodikia, ak Numpa, ak kaniset ne miitei koonnyi.

¹⁶ Ak ye kagesoman parwaani eng' kwenung'wong', ogoite kesoman agine eng' kanisetap Laodikia; ak osoman ak okweek parwaanin po Laodikia.

¹⁷ Ak omwachi Arkipo oleenji, Riip poisyet ne kiitaach eng' Kiptaiyat, si kobiit iyai kosulda.

¹⁸ Kagatennyu anee Paulo eng' eunnyu. Obwaat monjorornatennyu. Ingotep myeeindo kobootok.