KOLOSAIK 2 - BUKUIT NE TILIIL Sireet ne Dutero Kanon

¹ Amu amache onai ole agiiligei miising' agobo okweek, ak icheek che mi Laodikia, ak alak tugul che tomo kogeero togoch eng' poorto;

² si kobiit kigaigai mugulelwekwak, ak keropchin eng' chamyet, ak eng' mogornatosyek tugul che po nyiietap kaguiyet, si kobiit konai icheek ung'ootyetap Kamuktaindet, ineendet Kristo,

³ ki kiuny eng' ineendet konoraik tugul che po utaatyet ak naet.

⁴ Amwae niito ale, si ma kenaak chii age tugul eng' ng'aleegap lomset.

⁵ Amu agot ngo ma mi anee eng' poorto, ami kobootok eng' Kabuuset ne Tiliil, ko abaibai eng' atebeeng'wong', ne ageere, ak kimnateetap kayaneng'wong' eng' Kristo.

Sabeet ne igeesunotkei eng' Kristo

⁶ Ko uu ye ki otaach anyun Kristo Jeso Kiptaiyat, obendate eng' ineendet,

⁷ ko oo lumdootin ak ko oo teegotin eng' ineendet, ak kigimitok eng' kayaneng'wong', ko uu ye ki kinetak, otese omwae kongoi.

⁸ Oriipkei si ma iluulok chii age eng' ng'omnatennyi ak kaberberisyet ne po puch, eng' pitonwegap piik, eng' kaneetisyosyek che po tai che po ng'wony, ak ma eng' Kristo:

⁹ amu menyei eng' ineendet eng' poorto nyiyet tugul ne po Kamuktaindet,

¹⁰ ak keyaok oegu che nyiitootiin eng' ineendet, ne metitap pounateet tugul ak kimnateet:

¹¹ ki kimuratanak eng' ineendet eng' kamuratanet ne ki ma kiyae eunek, eng' istoetap poortap panyeek, eng' kamuratanetap Kristo;

¹² ko kagetubok kobooto ineendet eng' kabatisanet, ak ki king'eetak eng' nooto kobooto ineendet amu kayaneet eng' yaeet ne yaei Kamuktaindet, ne ki ing'eet ineendet komong' eng' che ki pek.

¹³ Ak okweek, che ki oo pegunotin eng' yaitwogikwok ak poorwekwok che ma kimuratan, ki isaabok okweek, kobooto ineendet, ko kagonyoiywech kaat yaitwogikyok tugul;

¹⁴ ko kagobuch sireet ne po arorutik ne kiga kogikyech, ne kiraanyech: ak kigoisto, kobirchi kimurtoiyot;

¹⁵ ko kagorek pounatosyek ak kimnatosyek, koboor kotook, koterteeri icheek eng' kimurtoiyot.

¹⁶ Nooto anyun amat korwokwok chii age tugul agobo amitwogik, anan agobo che kieei, anan agobo peetuutap igoorto anan agobo arawet ne kaleel anan peetuutap sabato:

¹⁷ che urwetap tuguuk che pwoonei; ago poorto ko po Kristo.

¹⁸ Amat korebenak chii melektang'wong' eng' ooreet ne machei ineendet, ne po kaming'inetapkei ak kalasunetap malaikaisyek, ak kogimitegei tuguuk che ki kogeer, ak komenee kabwaatutikyik che po poorto,

¹⁹ ama namei komyee Metit, ne nyoorunee poorto tugul teset eng' teset ne punu Kamuktaindet, ko kagonyoor tugul, ak konamatkei eng' kebeberwek ak tigitik.

Kateunoik agobo kaneetigap lembech

²⁰ Ko uu ye ki obegu kobooto Kristo omang'une kaneetisyosyek che po tai che po ng'wony, amu nee anyun si ogas iit arorutik, ko uu ye osaptosi eng' ng'wony,

²¹ amonam, anan ochamcham, anan otwaa

²² (petos tuguuchuuto tugul ye kiboisye), ko uu ng'atuutik ak kaneetisyosyegap piik?

²³ Tinyei tuguuchooto kaboorunet ne po utaatyet eng' chameet ne po kalasunet, ak eng' kaming'inetapkei, ak nyalilda ne kinyaliili poorto; matoreti kiy age tugul eng' katerteretap magutigap poorto.