KIRUOGIK 9 - BUKUIT NE TILIIL Sireet ne Dutero Kanon

Laitornatetap Abimelek

¹ Ki wo Shekem Abimelek weeriitap Jerubaal ye mi kapimamet ak piik tugul che po kootap kwandap kamennyi ak kong'alaalji icheek koleenji,

² “Kaigai omwachi piik tugul che po Shekem kogas: Nee ne myee eng' okweek: koboiywok weeriik tugul che po Jerubaal chooto tamanwogik tisabu anan poiywok chiito agenge? Obwaat kogeny ole aa kawekwok ak ko aa panyeekwok.”

³ Ara ki mwachi imamosyekyik piik tugul che po Shekem ng'aleechooto kogas, ak kimach mugulelwekwak koosup Abimelek, amu ki mwa kole, “Ineendet ko ne kitupche.”

⁴ Ki igoochi `pichooto ineendet fedhaisyek tamanwogik tisap eng' kootap Baal-berit, che ki igaigae `Abimelek piik che yaach, che njaamik, che ki isup ineendet.

⁵ Ki wo anyun kootap kwandanyi eng' Ophrah, ak kibarchi koita agenge tupchosyekyik, weeriigap Jerubaal, chooto tamanwogik tisap. Ago kichilil Jotham weeriit ne ming'in ne po Jerubaal, amu kiunygei.

⁶ Ki iyumgei anyun piik tugul che po Shekem ak che po kootap Milo ak koba koyai Abimelek koek laitoryat, eng' ole neegitee keetit ne oo ne po toloita ne ki mi Shekem.

⁷ Ye ki ngemwachi Jotham, kogiwo kotogosta agoi kotonon eng' tulweet parak ne po Gerizim ak kowaach eng' kutit ne oo kole: “Ogasa, okweek pounigap Shekem, si kobiit kogasak Kamuktaindet!

⁸ Ki pa peetuut age keetiik koiil age koek laitoryat ne pou icheek. Ki leenji keetitap mseituni, ‘Laitoran eng' acheek!’

⁹ Ago ki leenji `mseituni icheek, ‘Tos abagaakte akwaiyennyu, ne kigonyite kamuktaik ak piik, ak awe atumdumotegei eng' paragutap keetiik?’

¹⁰ Yeityo koleenji `keetiik mogoywet, ‘Nyoo ilaitoran eng' acheek!’

¹¹ Ago ki leenji `mogoywet icheek, ‘Tos abagaakte anyinyindanyu, ak logoekyuk che myach, awe atumdumotegei eng' paragutap keetiik?’

¹² Ki leenji keetiik anyun keetitap sabibuk, ‘Nyoo ilaitoran eng' acheek!’

¹³ Ki wol keetitap sabibuk kole, ‘Tos, abagaakte yaetap divaik, che iboiboi kamuktaik ak piik, ak awe atumdumotegei eng' paragutap keetiik?’

¹⁴ Yeityo koleenji `keetiik tugul keetit ne ming'in ne po katook, ‘Nyoo ilaitoran eng' acheek!’

¹⁵ Ak ki leenji `keetoto ming'in keetiik, ‘Ngot iman oiila aek laitoryat eng' okweek, obwa anyun ak omang'u urwennyu. Ago ngo ma uu nooto, ko ingomang'une maat keetit ne ming'in, ak kobeel taragonigap Lebanon kogees.’ ”

¹⁶ “Nooto anyun nguno ngo ki oyai ne po iman ak ne litit, ye ki oyai Abimelek koek laitoryat, ak ngot ko ki oyachi ne myee Jerubaal ak koonnyi, ak ki oyachi ineendet ko uu ye nyoljin poisyonigap eunekyik,

¹⁷ amu ki yai lugeet abba agobo okweek, ki ma iit saboondanyi ak kisarwok eng' eutap Midian,

¹⁸ ago kong'eetyi kootap abba ra ak obar weeriikyik, piik tamanwogik tisap eng' koita agenge, yeityo oyai Abimelek, weeriitap otwogindennyi ne chepto koek laitoryat eng' piigap Shekem, amu ineendet ko ne otupche

¹⁹ ngot ko ki oyachi Jerubaal ne po iman ak ne litit kobooto koonnyi rani, oboiboitu anyun eng' Abimelek ak ingobaibait agine eng' okweek.

²⁰ Ngot koma uu nooto, ko ingomong' maat eng' Abimelek ak kobeel pounigap Shekem kogees, kobooto kootap Milo; ak ingomong' maat eng' pounigap Shekem ak eng' kootap Milo, yeityo kobeel Abimelek kogees.”

²¹ Yeityo kolabat Jotham komwei kwo Beer, ak komeny ineendet olooto, amu ki iywei Abimelek ng'eetap kamet.

²² Ki ek pounindet Abimelek eng' Israel kenyiisyek somok.

²³ Ki iyookyi anyun Kamuktaindet ne Toroor tamirmiryet ne ya kwenutap Abimelek ak piigap Shekem, ak ki iberber piigap Shekem Abimelek.

²⁴ Ki yaak niito si kobiit koityi kolgolyet Abimelek ak piigap Shekem ko uu ye ki yachi weeriigap Jerubaal tamanwogik tisap, si kotebee korotiikwak paragutap Abimelek ne ki parei icheek, ak paragutap piigap Shekem che ki igimit eunekyik si kobar weeriik che tupcho.

²⁵ Ki inde `piigap Shekem murenik che ki ribistos koriibei ineendet eng' tuloonook parak, ak kirebee icheek tuguuk piik tugul che kibunei oranooto; ak ki kimwachi Abimelek.

²⁶ Ak ki nyo Gaal weeriitap Ebed kobooto tupchosyekyik kolanda koba komeny Shekem. Ki iyan ineendet piigap Shekem.

²⁷ Ki pa mbareennywa kobut sabibuk ak kotui, ak koyai igoorto. Yeityo koba kootap kamuktaindennywa, koamis ak koeisei ak kochup Abimelek.

²⁸ Ki le Gaal weeriitap Ebed, “Ng'oo Abimelek, ak ki ng'oo acheek che kebo Shekem, kot keoot ineendet? Weeriitap Jerubaal ak Sebul kiptaiyandennyi ko oote piigap Hamor kwandap Shekem. Ago amu nee si keoot ineendet?

²⁹ Ak nda kami pichu eunnyu, ta kaiste Abimelek. Ki leenji Abimelek, ‘Tes lugeeng'ung' ak imong'u.’ ”

³⁰ Ak kingo kas Sebul pounindetap nganaseet ng'aleegap Gaal weeriitap Ebed, konereech miising'.

³¹ Ki iyookto piik koba kap Abimelek eng' ng'aalseet, koleenji, “Keero, kabwa Shekem, Gaal weeriitap Ebed ak tupchosyekyik, machei kochaamji piigap nganaseet si kobookyin.

³² Ng'eet nguno anyun kemoi, inyee ak piik che mi kobooten ak oribisye ogong'isye eng' mbar;

³³ ak mutai karon, ko kata kochor asiista isip ing'eet ak ibookyi nganaseet. Ye kamong' ineendet kobooto piik che mi tugul kobookyin, iyachi anyun icheek kiit age tugul ko uu ye kenyooru poroindo.”

³⁴ Ki ng'eet anyun Abimelek kemoi ak piik tugul che ki mi kobooto ineendet ak kiribisyo icheek agobo Shekem eng' kweanaik ang'wan.

³⁵ Ye kimando Gaal weeriitap Ebed ak kotonon eng' ole kibunei eng' kurgeetap nganaseet koging'eet anyun Abimelek ak piik che ki mi kobooto ineendet eng' ole koga ribisye.

³⁶ Kingo keer `Gaal piik koleenji Sebul, “Keero, choorugei piik eng' tuloonook parak!” Ak ki leenji Sebul ineendet, “Igeere urwetap tuloonook ko uu piik.”

³⁷ Ago ki mwa Gaal kogeny kole, “Keero, choorugei piik eng' kwenutap emet, ak nyoonei kweanet agenge kobunu ooreetap keetitap Meonenim.”

³⁸ Koleenji anyun `Sebul ineendet, “Mi ano kuting'ung' nguno, ne koimwa ile, ‘Ng'oo Abimelek kot keoot ineendet?’ Tos chu koma piik che koisase? Mande anyun nguno ak obargei ak icheek.”

³⁹ Komanda Gaal kondoe piigap Shekem ak kobargei ak Abimelek.

⁴⁰ Ara ki oon `Abimelek ineendet ak ki mwei eng' tainnyi. Ki ibutyo che chaang' che ki kiguoten, kot koit ole kibunei eng' kurgeet.

⁴¹ Ki meny anyun Abimelek Aruma, ak ki oon Sebul Gaal ak tupchosyekyik komanda, si ma meny Shekem.

⁴² Eng' peetuut ne ki isubi, ko kagoba piik mbar, kemwachi Abimelek agobo niito.

⁴³ Ki imut `ineendet piik, kopcheune kweanaik somok ak koribisyo eng' mbar. Kingo keer piik komong'u saang' eng' nganaseet, kong'eet kobookyi icheek ak kobar.

⁴⁴ Ye kingo rwaei Abimelek ak kweanaik che ki mi kobooto ineendet koba tai ak kotononso eng' ye kibunei eng' kurgeetap nganaseet, ko ki rwai kweanaichooto alage aeng'u kobookyi che ki mi mbar ak ki par icheek.

⁴⁵ Kibargei Abimelek ak nganasanooto peetuut komugul; ak ki nam nganaseet ak ki par piik che ki mi oriit. Kibut nganaseet ak koseerchi olooto muunyuk.

⁴⁶ Kingo kas piik tugul che po teekseet ne kooi ne po Shekem agobo ng'olyoondonooto, ko ki pa icheek irimeet oriit ne po kootap Elberit.

⁴⁷ Ki kimwachi Abimelek keleenji, kagoyumgei piik tugul che po teekseet ne kooi ne po Shekem.

⁴⁸ Ki togosta anyun Abimelek tulweetap Salmon, kobooto piikyik tugul, ak ki nam Abimelek aiywet koebe temetap keetit ak konam kotiiny kaat. Ki mwachi piik che ki mi kobooto ineendet koleenji, “Kiit ne kogeer ayai, oyai ochokyi ko uu ye kayai.”

⁴⁹ Ara ki ep chii tugul temennyi ne po keetit ak koosup Abimelek, ak konde temenichooto irimeet, ak kobeel irimonooto komi piik oriit. Ki pek anyun ak icheek piik tugul che po teeksonooto kooi ne po Shekem, che itei eliphuut agenge murenik ak kwonyiik.

⁵⁰ Yeityo kwo Abimelek Tebes, ak koteech kotoorchi Tebes, ak konam.

⁵¹ Ago ki miitei irimeet ne kiim eng' nganasanooto, ak kimwechi olooto murenik tugul ak kwonyiik kobooto icheek tugul che po nganaseet. Kigerchigei icheek koot oriit ak kotogosta kwo koot parak.

⁵² Ki nyo Abimelek teeksonooto kooi ak kobargei ak pichooto, ak ki wo koriikyi kurgeetap teeksonooto kooi kole kobeel.

⁵³ Kitururchi kobogoryot age metitap Abimelek isyet ak kitui metinnyi.

⁵⁴ Ki kuur kochokyi Abimelek muren age ne ki ipchin kariik, koleenji, “Ng'usu rotweet ak ibara, si male piik, ‘Kabar anee, kobogoryondo.’ ” Ak kitoor ineendet murenonooto, ak kime.

⁵⁵ Kingo keer piigap Israel kole kagome Abimelek, kwo chii tugul oldanyi.

⁵⁶ Ki yaakta mugetuut anyun Kamuktaindet agobo tengektap Abimelek ne ki yachi kwandanyi, ye ki par tupchosyekyik tamanwogik tisap.

⁵⁷ Ki yaaktechi Kamuktaindet mugetuut piigap Shekem agobo tengekto tugul ne ki yai. Ki nyoonji anyun icheek chubetap Jotham weeriitap Jerubaal.