KIRUOGIK 3 - BUKUIT NE TILIIL Sireet ne Dutero Kanon

¹ Chu pororyosyek che ki pagaakta Kamuktaindet ne Toroor si kobiit kotyeme Israel tugul chooto ki ma nai agobo lugosyegap Kanaan,

² (si kobiit konai agobo lugeet ibinwegap piigap Israel, che ki tomo konai agobo lugeet eng' tai):

³ icheek ko ki kiptainik muut che po Philistiik, Kanaanik tugul, Sidonik ak Hibik che ki menyei tulweetap Lebanon, kobooch tulweetap Baal-hermon agoi Lebo-Hamath.

⁴ Ki kibagaakta icheek si kobiit ketyeme Israel, si kobiit konai ngo kase iit ng'atuutigap Kamuktaindet ne Toroor, che ki ng'at kwanisyekwak eng' eutap Musa.

⁵ Ara ki meny piigap Israel kwenutap Kanaanik, Hitik, Amorik, Perisik, Hibik ak Jebusik.

⁶ Ki imut tiibiikwak koek osotikwak, ak ki igoochi tiibiikwak kotun weeriikwak ak ki oot kamuktaikwak.

Othniel

⁷ Ki yai ne ya piigap Israel eng' taitap Kamuktaindet ne Toroor, koutye ineendet kamuktaindennywa ak koot Baalik ak Aserot.

⁸ Nooto anyun kinereech kot Kamuktaindet ne Toroor agobo Israel, ak ki alda icheek koba eunegap Kusan-risataim laitoryatap Mesopotamia. Ki oot anyun piigap Israel Kusan-risataim kenyiisyek sisiit.

⁹ Ye kingo riirchi `piigap Israel Kamuktaindet ne Toroor, kong'eetyi icheek yetindet, ne ki sar icheek, nooto ko Othniel weeriitap Kenas ng'eetap kamet ne ming'in ne po Kaleb.

¹⁰ Ki nyoonji ineendet Kabuuusetap Kamuktaindet ne Toroor, ak ki irwookyi Israel ak ki wo lugeet. Ki inde Kamuktaindet ne Toroor eunnyi Kusan-risataim laitoryatap Mesopotamia ak ki iterteer Othniel ineendet.

¹¹ Ak ki imuuny emet kenyiisyek artam. Ak ki me Othniel weeriitap Kenas.

Ehud

¹² Ki yai ne ya piigap Israel kogeny eng' taitap Kamuktaindet ne Toroor, ak ki igimit Kamuktaindet ne Toroor Eglon laitoryatap Moab kobargei ak Israel, amu ki yai ne ya eng' taitap Kamuktaindet ne Toroor.

¹³ Ki iyum Elgon lagogap Ammon ak Amelek kobwa kobar Israel, kiluul icheek ak konam nganaseetap sosik.

¹⁴ Ki oot piigap Israel Eglon laitoryatap Moabik kenyiisyek taman ak sisiit.

¹⁵ Ago ye kingo riirchi piigap Israel Kamuktaindet ne Toroor, kong'eetyi `ineendet icheek yetindet, nooto ko Ehud weeriitap Gera, Benjaminindet, chiito ne ki po kaataam. Ki iyooktoe ineendet piigap Israel kagoochinet koyookyi Eglon laitoryatap Moab.

¹⁶ Ki itang'jigei Ehud rotwetap chok ne ng'atiben komoswek tuwai, ne aechin ak kakwautyet agenge ne po euut. Kiratyi kubestanyi ne po tai kotabon ngoryennyi oriit.

¹⁷ Ki ipchi `ineendet kagoochinonooto Eglon laitoryatap Moab. Ki chiito ne neraat miising' Eglon.

¹⁸ Ye kingo kagogoito kagoochinonooto, koleenji pichooto che ki ibu kagoochinet koba.

¹⁹ Ago ki week ineendet eng' ole ki mi kanamonik eng' ole neegitee Gilgal, ak komwa kole, “Atinye ng'olyootap ung'oot ne kagiyogunena, ee laitoryat.” Ak ki le, “Osisye!” Ak kimanda piik tugul che ki mi tainnyi.

²⁰ Ki nyo Ehud ole mi ineendet; ye kitebyei ineegei eng' koonnyi ne ki uuree. Ak ki le Ehud, “Atinye ng'aleek che aibun kobun Kamuktaindet.” Kong'eet anyun eng' ng'echerennyi.

²¹ Ki iyogoito eunnyi ne po kaataam Ehud ak konem rotwetap chok eng' kubestanyi ne po tai ak kotoor moennyi.

²² Ki wo rotweet oriit kobooto kungit; ak ki tuch sundet rotwonooto, amu ma ng'us rotweet eng' moennyi ak kimandae patai.

²³ Ki manda anyun Ehud kwo serem ak koger kurgotik, kogerchi ineendet ko ak kotemel.

²⁴ Ye kingo kagomanda, kobwa otwogikyik ak kogeer kurgotigap koot ko temelotin. Ki ibwaat kole, “Imuuch kogawo kotoretkei eng' koonnyi ne kiuure.”

²⁵ Ki igenis anyun kot kolilaanso. Kingo keer icheek kole ma yaat ineendet kurgotigap koot, ko ki inem anyun yaateiwot ak koyaat. Ogeero, kiga kobutyi ng'wony kiptaiyannywa kome.

²⁶ Ki chilil Ehud ye kita koogenisyei icheek ak kwo kosiirtoe kanamonik, ak komwechi Seira.

²⁷ Kingo it Ehud emennyi, koguut igoondit, kochoortagei piigap Israel kobooto ineendet eng' emetap tuloonook, komi ineendet kondoe.

²⁸ Ki leenji icheek, “Osubwo! Amu kagonde Kamuktaindet ne Toroor eunekwok puunikwok Moabik.” Ki choortagei koosup ineendet koba konam tabarwegap Jordan korebe Moabik, ama chamji chii kolanda.

²⁹ Ki par icheek eng' peetuunooto murenik olo po eliphuusyek taman che po Moab, tugul che ki kiimeen ak che ki nyigoonen, ama chilil agot agenge.

³⁰ Ki kiterteer Moab peetuunooto eng' eutap Israel. Ak ki imuuny emet eng' kenyiisyek tamanwogik sisiit.

Shamgar

³¹ Kingo pata ineendet kobiit Shamgar weeriitap Anat ne ki par murenik pogol lo che po Philistiik eng' kiplitwet. Ki sar ineendet agine Israel.