KIRUOGIK 19 - BUKUIT NE TILIIL Sireet ne Dutero Kanon

Nereegek che ki piitune Gibea

¹ Ak eng' peetuusyechooto, ye ki ma komi laitoryat Israel, ki mi Lawindet age ne ki menyei komosin eng' emetap tuloonook ne po Ephraim, ne ki imutyigei chebaigeiyat eng' Beth-lehem-juda.

² Ki yai kugoinatet chebaigeiyandennyi kosas ineendet, ak ki pagaakta ineendet kwo kootap kwandanyi eng' Beth-lehem-juda, ak ki tebee olooto arawek ang'wan.

³ Ki ng'eet manong'otyondennyi koosup ineendet, kwo kong'alaalji ineendet eng' chamyet, komut ineendet kogeny, komi ineendet ak otwogindennyi, ak sigiroik aeng'. Ki imut ineendet kwo kootap kwandanyi. Kingo keer kwandap kwonyooto chiichooto, kobaibait amu katuiyo ak ineendet.

⁴ Kimach kapyugoinnyi, ne kwandap kwonyooto, kota kobeni, ak ki tebi kobooto ineendet egosyek somok. Ki amis anyun ak koeeiso ak koruiyo yooto.

⁵ Ak eng' peetuutap ang'wan, kong'eetyo karon inne, ak king'eet kole kwo. Ki mwachi kwandap kwonyooto sandennyi, koleenji, “Igaigai muguleldang'ung' eng' magatyat kitigin, yeityo obe.”

⁶ Ki tebi ng'wony ak ki amis ak koeeiso icheek tuwai. Ak ki leenji kwandap kwonyooto chiichooto, “Asoomin ale, cham itebi kemout komugul, ak ingobaibait muguleldang'ung'.”

⁷ Kingo ng'eet chiichooto kole kwo, ko ki igaigai kapyugoinnyi, ak ki ru yooto kogeny.

⁸ Ki ng'eet karon miising' eng' peetuut ne po muut kole kwo, ak ki le kwandap kwonyooto, “Asoomin ale, igaigai muguleldang'ung', ak otebi agoi koskoleny.” Ak ki amis icheek tuwai.

⁹ Kingo ng'eet chiichooto kole kwo, ineendet ak chebaigeiyandennyi ak otwogindennyi, koleenji ineendet kapyugoinnyi kwandap kwonyooto, “Keero, amu machei koimen, asoomin ale tebi kemout komugul. Machei kogeskei peetuut, ru yuto, si kobaibait muguleldang'ung', si imuste karon miising', iwe kaa.”

¹⁰ Ago ma cham chiichooto kotebi kemounooto, ago king'eet ak kwo, agoi koit ole tokyingei Jebus (nooto ko Jerusalem). Ki tinyei sigiroik aeng' che kiga kiito, ki mi agine chebaigeiyandennyi kobooto ineendet.

¹¹ Kingo mi ye neegitee Jebus, koimen, ak ki leenji otwogindet kiptaiyandennyi, “Asoomin ale nyoo kemaste keebe nganaseetap Jebusik, ak keruiye yooto.”

¹² Ago ki leenji kiptaiyandennyi, “Ma kimastoi kebendi nganaseetap toondet, ne ma po piigap Israel, ago kisiirtoi kebendi Gibea.”

¹³ Ki leenji otwogindennyi, “Nyoo keriikyi yeto age eng' chu, si keruiye Gibea anan ko Ramah.”

¹⁴ Kisiirto anyun koba pandanywa ak kirorokta asiista kota kobendi ko neegit koit Gibea, ne po Benjamin.

¹⁵ Ki masta icheek koba olooto, koba koruiyo Gibea. Ki wo oriit, ak kotebi ng'wony eng' ooreetap nganaseet, amu ma piit chii ne ki imut icheek koba koonnyi koruiyo.

¹⁶ Ki nyo poiyot age ne ki punu poisyennyi eng' mbar koskoleny. Ki po chiichooto emetap tuloonoogap Ephraim, ak ki meny Gibea koek toondet. Ki piik che ki menyei Gibea ko Benjaminik.

¹⁷ Ye kitabendo inee kogeer kiprutoiyot eng' ooreetap nganaseet, ak ki le poiyondonooto, “Iwendi ano ak ibunu ano?”

¹⁸ Ki wol ineendet kole, “Kibunu Beth-lehem-juda ak kesiirtoi kebendi emetap tuloonoogap Ephraim komosin. Aa po olooto, ak awendi nguno kootap Kamuktaindet ne Toroor; ama mi chii ne imuta koonnyi.

¹⁹ Ago ki tinyei mobeek ak amitwogik che ki kigonor che po sigirokyok. Atinye magatyat ak divaik, che yamech anee, otwogindet ne chepto ak murenoni mi kobooton. Ma mi kiy age tugul ne rartaat.”

²⁰ Ki le poiyondonooto, “Ingotep kaalyeet kobooten! Ingobunjo tuguuk tugul che imache, koek kityo, mat iru ooreet.”

²¹ Komut anyun kwo koonnyi ak kogoochi sigiroik amitwogik. Ki iun keelyekwak, ak ki amis ak koeeiso.

²² Ye kita koboiboi mugulelwekwak, ogeero, ki pwa murenigap nganasanooto, weeriigap Belial, koyiem koot ak kobir kurgeet. Ki ng'alaalji `icheek poiyondonooto, chiitap ko po koot, koleenji, “Imoong'u chiichi kanyo koong'ung', si kobiit kesuup.”

²³ Ki manda anyun chiichooto po koot, kwo ole mi icheek ak koleenji, “Achicha, tupchosyekyuk, asoomok ale, amoyai tengekto ne tee ni. Amu kanyo chiichi koonnyu, amoyai sogornatani.

²⁴ Ogeero, mi yu cheptonyu ne pergeiya ak chebaigeiyatap chiichi. Ochamwon amutwok icheek kobwa saang' nguno, si omut ak oyachi icheek ko uu ye ogeere ole myee, ago amat oyachi chiichi sogornatani uu ni.”

²⁵ Ago ma cham pichooto kogasyi ineendet ng'aleek. Ki nam anyun chiichooto chebaigeiyandennyi ak komutyi icheek eng' saang'. Kisuup kwonyooto ak koteweer ineendet agoi koeech. Kingo machei koeech, kobagaakta kwo.

²⁶ Ki nyo anyun kwonyooto ko kairir emet, ak kobutyi kurgeetap kootap chiichooto ole ki mi kiptaiyandennyi, kot koeech.

²⁷ Ki ng'eet kiptaiyandennyi karon, koyaat kurgotigap koot, komanda koleen kwo pandanyi. Ogeero, kogobutyi kurgeetap koot chebaigeiyandennyi, komi eunekyik tugatuk.

²⁸ Ki leenji ineendet, “Ng'eet keebe.” Ago ma wol kiy. Kiganapchi anyun sigiryet ak king'eet kwo oldanyi.

²⁹ Kingo kakwo koonnyi oriit, konem rotweet, ak konam chebaigeiyandennyi ak kopcheapchei koek kebeberwek taman ak aeng'. Yeityo koyookto kebeberwechooto koba komoswek tugul che po Israel.

³⁰ Ki mwa tugul che ki keer kole, “Kitom kobiitu poisyet ne uu ni kobooch ngap komong' piigap Israel, eng' emetap Misiri agoi ra. Obwaat, orwooch agobo kiito, ak omwa ne kaotil.”