KIRUOGIK 17 - BUKUIT NE TILIIL Sireet ne Dutero Kanon

Mikah ak kanamwennyi

¹ Ki mi chiito age ne po emetap tuloonoogap Ephraim, ne ki kiguure kainennyi Mikah.

² Ki leenji kamennyi, “Atinye robiinik eliphuut agenge ak pogol agenge che ki kiibenen ak ki ichubisye agobo chooto agase eng' itiikyuk, keero, atinye anee ne ki aip.” Ak ki le kamennyi, “Iberuurot weeriinnyu eng' Kamuktaindet ne Toroor.”

³ Ki weekyi kamennyi fedhaisyechooto eliphuut agenge ak pogol, ak ki le kamet, “Katabaanji iman Kamuktaindet ne Toroor silingisyechu eng' eunnyu agobo weeriinnyu, si kobiit koyae kanamwet ne kiwaei ak kanamwet ne kitaanyi. Kaweegun anyun amu nooto.”

⁴ Ak ye ki weekyi kamennyi fedhaisyechooto, konam kamet pogol aeng' ak kogoochi kitang'indet ne ki yai kanamwet ne kiwaei ak ne kitaanyi eng' fedhaisyechooto, ak ki tebee tuguuchooto kootap Mikah.

⁵ Ki tinyei chiichito kiguure Mikah kootap kanamonik, ak ki yai ephod ak terapik, ak ki itabaan age eng' weeriikyik, koek tisiindennyi.

⁶ Ki ma komi peetuusyechooto laitoryat eng' Israel. Kiyaei chii tugul ko uu ye keerei eng' konyekyik kole myee.

⁷ Ki mi mureno age ne ki punu Beth-lehem-juda, ne po ooreetap Judah, ne ki Lawindet, ak ki meny olooto koek toondet.

⁸ Ak ki wo chiichooto eng' nganasanooto, eng' Beth-lehem-juda, kwo kotebee ole kanyoorchi oldo koek toondet. Ki it emetap tuloonoogap Ephraim kootap Mikah, eng' pandanyi.

⁹ Ki leenji Mikah, “Ibunu ano?” Kowol kole, “Aa Lawindet ne po Beth-lehem-juda, awendi ko aa toondet acheeng'oti ole amenye.”

¹⁰ Ak ki leenji Mikah ineendet, “Ngemeny tuwai, si iegu kwanda eng' anee ak ko tisiindet, ak agoonin fedhaisyek taman eng' kenyiit, ngoroik ak amitwogiguk.” Kwo ko anyun Lawindet.

¹¹ Ki cham Lawindet anyun komeny ak chiichooto, ak ki igei murenonooto age eng' weeriikyik.

¹² Ki itabaan anyun `Mikah Lawindonooto koek tisiindennyi ak ki tebee kootap Mikah.

¹³ Kole anyun Mikah, “Angen nguno ale yaiywo Kamuktaindet ne Toroor ne myee, amu atinye Lawindet ne tisiindennyu.”