KIRUOGIK 13 - BUKUIT NE TILIIL Sireet ne Dutero Kanon

Sigeetap Samson

¹ Ki yai piigap Israel yaityet kogeny eng' taitap Kamuktaindet ne Toroor, ak ki inde `Kamuktaindet ne Toroor icheek eutap Philistiik kenyiisyek artam.

² Ak ki miitei chiito age ne po Sora, ne po pororyetap Dan, ne ki kiguure kainennyi Manoa. Kisoon osotyonnyi, ma sigis.

³ Kimong'ji malaikaiyatap Kamuktaindet ne Toroor kwonyooto ak koleenji, “Keero, ii soon, ma isigisye, ago imanachi ak isich weeriit.

⁴ Nooto anyun, asoomin ale iriipkei, amee divaik anan ko maiyek, ameam kiy age tugul ne murwoon.

⁵ Amu imanachi iman ak isich weeriit. Ma kicheru suumeekyik, amu egu lakwanooto Nasiritindet ne po Kamuktaindet kobooch komi moo. Ak kotoi ineendet kosar Israel eng' eunegap Philistiik.”

⁶ Ki wo anyun kwonyooto ak komwachi manong'otyondennyi koleenji, “Kanyoonjo chiitap Kamuktaindet ak ka uu itoondanyi itoondap malaikaiyatap Kamuktaindet, ne imuisei miising'. Ma ateebee ole kabunu, ama mwaiwo agine kainennyi.

⁷ Ago kaleenjo ineendet, ‘Imanachi ak isich weeriit. Amee divaik anan ko maiyek, anan iam kiy age tugul ne murwoon amu egu lakwanooto Nasiritindet ne po Kamuktaindet kobooch komi moo agoi peetuutap meennyi.’ ”

⁸ Ki sa anyun `Manoa Kamuktaindet ne Toroor kole, “Asaain, ee Kamuktaindet, ingonyo kogeny chiichooto po Kamuktaindet ne kogeyogu konyo ole ki mi koneetech kiit ne kiyachin lakwanooto kisichei.”

⁹ Ki kas Kamuktaindet kutitap Manoa, ak ki nyoonji malaikaiyatap Kamuktaindet ole ki mi kwondo kogeny ye kitebyei eng' mbar. Ago ki ma komi Manoa manong'otyondennyi kobooto ineendet.

¹⁰ Kichaakta anyun kwonyooto, kolabat ak komwachi manong'otyondennyi, koleenji, “Keero! Kagomong'ja kogeny chiichi kinyonjino yuginye.”

¹¹ Ki ng'eet anyun Manoa ak koosup osotyonnyi koit ole mi chiichooto ak koleenji ineendet, “Inyee chiichi ki ng'alaaljin kwonyi?” Ak ki le, “Aa ineendet.”

¹² Ak ki le Manoa, “Ingosulda ng'aleeguk. Tuun teptoi ano lakwanooto ak egu nee poisyennyi?”

¹³ Koleenji `malaikaiyatap Kamuktaindet ne Toroor Manoa, Ingoriipkei kwondo eng' tugul che ki amwachi.

¹⁴ Matkoam kiy age tugul ne punu keetitap sabibuk, amechamji koe divaik anan ko maiyek, amat koam kiy age tugul ne murwoon. Ingoriibegei ineendet chooto tugul che ki amwachi.

¹⁵ Ki mwachi `Manoa malaikaiyatap Kamuktaindet ne Toroor koleenji, “Asoomin ichamwech kota keraanyin, si kobiit kechobuun aarwetap ng'oroor.”

¹⁶ Koleenji `malaikaiyatap Kamuktaindet ne Toroor Manoa, “Matiny keraanya, koma ame amitwogiguk. Ngot imache ichop kagoochinet ne kibeelei, ko nyolu igoochi Kamuktaindet ne Toroor.” Amu ki ma nai Manoa kole ki malaikaiyatap Kamuktaindet ne Toroor,

¹⁷ koleenji `Manoa malaikaiyatap Kamuktaindet ne Toroor, “Kiguurenen ng'oo si kobiit kegonyitin ye isulda ng'aleeguk?”

¹⁸ Kowolji malaikaiyatap Kamuktaindet ne Toroor kole, “Kalya si iteebena kainennyu, ago kainaniito ko po kwang'ut?”

¹⁹ Ki ip anyun Manoa arwanooto kobooto kagoochinetap peek, ak kogoito eng' koita parak kogoochi Kamuktaindet ne Toroor ak ki yai malaikaiyandanooto kwang'ut kogerei Manoa kobooto osotyonnyi,

²⁰ amu ye ki togostoi liplibenetap maat kotokyigei kipsengwet eng' kaptisisyet, kotogostae malaikaiyatap Kamuktaindet ne Toroor liplibenonooto po maat ne po kaptisisyet. Ye kingo keer niito Manoa kobooto osotyonnyi, ko ki ing'uruukso icheek kot kotiiny ng'wony togoochikwak.

²¹ Kingo pata niito ko ki mata komong'ji kogeny `malaikaiyatap Kamuktaindet ne Toroor Manoa anan ko osotyonnyi. Konai anyun Manoa kole ineendet ko ki malaikaiyatap Kamuktaindet ne Toroor.

²² Koleenji `Manoa osotyonnyi, “Kibegu iman, amu kagegeer Kamuktaindet.”

²³ Ago ki leenji osotyonnyi, “Nda kamachei Kamuktaindet ne Toroor kobarech, ta kama kotaachei kagoochinet ne kibeelei ak kagoochinetap peek eng' eunekyok. Ta kama koboorwech tuguuchu tugul ak ta kama komwaiwech tuguuk che uu chuuto.”

²⁴ Ki sich kwonyooto weeriit ak koguuree kainennyi Samson. Ki eet lakweet ak ki iberuur `Kamuktaindet ne Toroor ineendet.

²⁵ Ki toi Kabuusetap Kamuktaindet ne Toroor kobois eng' ineendet eng' Maane-dan, kwenutap Sora ak Estaol.