KIRUOGIK 12 - BUKUIT NE TILIIL Sireet ne Dutero Kanon

Kobortos Ephraim ak Jephta

¹ Ki iyumgei piigap Ephraim ak koba kotokyigei murot kaataam. Ki mwachi `icheek Jephta koleenji, “Amu nee si ilande obargei ak lagogap Ammon, ama imwaiwech keebe tugul? Kibeeldoin koong'ung'.”

² Ak ki wolji `Jephta icheek koleenji, “Ki kitinye anee ak piikyuk pooryeet ne oo ak lagogap Ammon, ak ye ki aguurok koma osarwo eng' eunnywa.

³ Ak ye ki ageer ale ma osarwo, ande saboondanyu ng'oiyondit, alande kebargei ak lagogap Ammon, ak ki inde `Kamuktaindet ne Toroor icheek eunnyu. Ara amu nee anyun si obwanjo rani, oboryena?”

⁴ Yeityo koyum `Jephta piik tugul che po Gilead ak kobargei ak Ephraim. Ki par piigap Gilead Ephraim, amu ki le, “Okweek Gileadik ko ki omweune Ephraim, che omi kwenutap Ephraim, ak kwenutap Manasseh.”

⁵ Ki nam Gileadik tabarwegap Jordan, koger Ephraimik. Ak ye mwa che kimweune Ephraim, kole, “Chamwo alanda,” koleenji ineendet piigap Gilead, “Ii Ephraimindet?” Ye le, “Achicha,”

⁶ koteebe koleenjin, “Mwaa le ‘Shiboleth’; koleen, ‘Siboleth’; ” amu ki ma komuuchi komwa komyee. Kenamei anyun inee ak kebar sainooto eng' tabarwegap Jordan. Ki pek eng' peetuunooto Ephraimik eliphuusyek artamu ak aeng'.

⁷ Ki irwookyi `Jephta Israel kenyiisyek lo. Yeityo kome Jephta Gileadindet, ak ki kitupchi nganaseet age ne po Gilead.

Kirwoogik Ibsan, Elon ak Abdon

⁸ Kingo pata Jephta korwookyi Ibsan ne po Bethlehem Israel.

⁹ Ki tinyei weeriik sosom ak tiibiik sosom che ki igoito kitunoot eng' komoswek alak, ak ki imutyi weeriikyik tiibiik sosom che po komoswek alak. Ak ki irwookyi Israel kenyiisyek tisap.

¹⁰ Kime Ibsan ak ki kitupchi Bethlehem.

¹¹ Kingo pata ineendet, korwookyi Elon Sebulunindet Israel. Ki irwookyi Israel kenyiisyek taman.

¹² Kime Elon Sebulunindet agine ak ki kitupchi Aijalon eng' emetap Zebulun.

¹³ Kingo pata Elon, korwookyi Abdon weeriitap Hilel Piratonindet Israel.

¹⁴ Ki tinyei weeriik artam ak weeriik sosom che po weeriikyik che ki laanyei moek tamanwogik tisap che po sigiroik. Ki irwookyi Israel kenyiisyek sisiit.

¹⁵ Kime Abdon weeriitap Hilel Piratonindet ak ki kitupchi Piraton eng' emetap Ephraim, eng' emetap tuloonook ne po Amelegik.