KIRUOGIK 11 - BUKUIT NE TILIIL Sireet ne Dutero Kanon

Koterteeri `Jephta Ammonik

¹ Ki nyiganeet ne kiim ak ko po lugeet Jephta Gileadindet. Ki sich `Gilead Jephta ago kamennyi ko ki chepkugoniot.

² Ki sich `osotyotap Gilead weeriik, ak kingo kagoeegitu weeriichooto, koon Jephta kwo komanda, koleenji ineendet, “Mesiche kiy eng' kootap abba, amu ii weeriitap kwondo age.”

³ Komwei anyun Jephta eng' ole mi tupchosyekyik, ak kwo komeny emetap Tob. Eng' peetuusyek che matya ko ki iyumjigei Jephta piik che njaamik, ak ki isubot kobendat kobooto ineendet.

⁴ Kingo pata peetuusyek alak, koyai lugeet lagogap Ammon ak Israel.

⁵ Kingo yai lugeet lagogap Ammon ak Israel, koba poisyegap Gilead komut Jephta eng' emetap Tob.

⁶ Ki leenji `icheek Jephta, “Nyoo egu kiptaiyandennyo, si kobiit kebarge ak lagogap Ammon.”

⁷ Ago ki leenji `Jephta poisyegap Gilead, “Tos ki ma owecha, ak oona eng' kootap abba? Amu nee anyun si obwanjo ye otinye nyalilda?”

⁸ Ki leenji `poisyegap Gilead Jephta, “Kagiweekyinge kogeny amu nooto, si kobiit keebe tugul kobooten, kebarge ak lagogap Ammon, si iegu pounindennyo ne ibou piik tugul che menyei Gilead.”

⁹ Ki leenji `Jephta poisyegap Gilead, “Ngot omuta kaa kogeny kebarge ak lagogap Ammon, ak ngot kogoon Kamuktaindet ne Toroor katerteerisyet agobo icheek eng' tainnyu, aegu pounindeng'wong'?”

¹⁰ Ak ki leenji poisyegap Gilead Jephta, “Egu Kamuktaindet ne Toroor paoryat eng' kwenunnyo, kiyae iman ko uu ng'olyoondeng'ung'.”

¹¹ Ki wo Jephta anyun kobooto poisyegap Gilead, ak ki yai `piik ineendet koek pounindet ak kiptaiyat ne pou icheek. Ki mwa Jephta ng'aleekyik tugul eng' taitap Kamuktaindet ne Toroor eng' Mispa.

¹² Ki iyookto `Jephta piik koba kaplaitoryatap lagogap Ammon, koleenji, “Iting'ena nee, kot inyoonjo iyai lugeet ak emennyu?”

¹³ Ki wolji laitoryatap lagogap Ammon piik che kiga iyookto Jephta, koleenji, “Amu ki ip Israel emennyu, ye kitogosu kobunu Misiri, kobooch Arnon agoi Jabbok, kot koit Jordan, ara weekwa anyun emotinwechooto eng' kaalyeet.”

¹⁴ Ak ki iyookto `Jephta piik kogeny koba kaplaitoryatap lagogap Ammon:

¹⁵ ak ki pa komwa pichooto kole, Kamwa Jephta kole: “Ma ip Israel emetap Moab, anan ko emetap lagogap Ammon.

¹⁶ Ye kitogosu Israel eng' Misiri, kobwa kobun surkwen agoi Araraita ne Piriir ak ki pwa agoi Kadesh,

¹⁷ koyookto anyun `Israel piik koba kaplaitoryatap Edom koleenji, ‘Kaigai chamwo abun emeng'ung', ago ma cham laitoryatap Edom.’ Ak ki iyookto piik ko uu nooto koba kaplaitoryatap Moab, ago ma cham; ak ki meny Israel Kadesh.

¹⁸ Yeityo kobun surkwen, koyiem icheek emetap Edom ak emetap Moab. Ki pun icheek kong'asiis ne po emetap Moab ak koteech Arnon pitoniin. Ago ma siir icheek kiwotetap Moab, amu aineetap Arnon ko ki kiwotetap Moab.

¹⁹ Ki iyookto Israel piik koba kap Sihon laitoryatap Amorik, ne ki pou Hesbon. Ki leenji `Israel ineendet: Kaigai, ichamwech kebun emeng'ung', keebe oldanyo.

²⁰ Ago ma iyan Laitoryat Sihon kobun Israel kiwotennyi. Ki iyum Sihon piikyik tugul ak koteech Jahas, ak kobargei ak Israel.

²¹ Ki inde Kamuktaindet ne Toroor, Kamuktaindetap Israel, Sihon ak piikyik tugul eutap Israel, ak ki par icheek. Konam anyun Israel emet tugul ne po Amorik kobunji, icheeget che ki menyei emonooto.

²² Ki nam kiwoteet tugul ne po Amorik kobunji, kobooch aineetap Arnon agoi aineetap Jabbok, ak kobooch surkwen agoi Jordan.

²³ Ki oon anyun Kamuktaindet ne Toroor, Kamuktaindetap Israel Amorik koba eng' taitap piikyik Israel. Imuuchi anyun inyee inam kobunjiin?

²⁴ Tos meibe kobunjiin ne kigoonin Kemos kamuktaindeng'ung'? Nooto anyun, age tugul ne oonei Kamuktaindet ne Toroor, Kamuktaindennyo eng' tainnyo, kename chooto kobunjech.

²⁵ Tos ii kaigai inyee eng' kiy age tugul isiir Balak weeriitap Sipor, laitoryatap Moab? Tos kiboryo ak Israel? Tos ki yachi `inee icheek lugeet?

²⁶ Ye kita komenyei Israel Hesbon ak nganasookyik, Aroer ak nganasookyik ak eng' nganasook tugul che mi tabandap Aineetap Arnon eng' kenyiisyek pogol somok, kolya si moip eng' peetuusyechooto?

²⁷ Tom ayaun anee tengek, ago keyai ne ya iyaiywo lugeet. Ingoek Kamuktaindet ne Toroor kirwoogindet, ne koonu kirwooget rani eng' kwenutap piigap Israel ak lagogap Ammon.”

²⁸ Ago ma kas laitoryatap lagogap Ammon ng'aleek che ki iyookyi Jephta ineendet.

²⁹ Ki nyoonji anyun `Kabuuusetap Kamuktaindet ne Toroor Jephta, ak kilandae Gilead ak Manasseh, kilandae Mispa ne po Gilead, ak kong'etee Mispa ne po Gilead kwo kolanda kot koit ole mi lagogap Ammon.

³⁰ Ak ki yai Jephta kaarortaet koarorchi Kamuktaindet ne Toroor kole, “Ngot inde iman eunekyuk lagogap Ammon,

³¹ ko kiy age tugul ne torookwo eng' kurgennyu, ye tuun aweeksei eng' kaalyeet, abunu ole mi lagogap Ammon, kobunjin kiyooto Kamuktaindet ne Toroor, si agoito koek kagoochinet ne kibeelei.”

³² Ki landa anyun Jephta kwo ole mi lagogap Ammon, kobargei ak icheek; ak ki inde `Kamuktaindet ne Toroor icheek eunekyik.

³³ Ak ki par icheek, kong'etee Aroer kot koit Minit, nganasook tiptem, kot koit Abel-keramim, ki par eng' pareet ne oo kot. Ki kiterteer anyun lagogap Ammon eng' taitap piigap Israel.

³⁴ Ye ki nyo koweeksei Jephta koonnyi eng' Mispa, ogeero, ki mong' cheptonyi kotorook ineendet kotinyei sugutisyek che mengeechen kotyenonu. Ki lakweennyi nooto ne ineegei, amu ki ma kotinyei weeriit anan chepto age.

³⁵ Kingo keer ineendet, kobet ngoroikyik ak kole, “Pwo! Cheptonyu! Kegoono anyeratit, ak ii age eng' che inyalila amu koang'aang'ji Kamuktaindet ne Toroor kutinnyu, ama aweechigei let.”

³⁶ Koleenji `lakwanooto ineendet, “Abba, koing'aang'ji kuting'ung' Kamuktaindet ne Toroor, ara yaiywo ko uu kiit ne kobun kuting'ung', amu kogoyaaktaun Kamuktaindet ne Toroor mugetuut eng' puuniguk, eng' lagogap Ammon.”

³⁷ Kotestai koleenji kwandanyi, “Ingeyaiywo ng'olyoondoni: chamwo atebi aneege arawek aeng', si kobiit awo anee ak choronokyuk tuloonook parak ak ariirchi pergeinatennyu.”

³⁸ Ak ki wol kole, “Ui.” Ak ki leenji kwo arawek aeng'. Ki wo anyun, ineendet ak choronokyik, ak koriirchi pergeinatennyi eng' tuloonook.

³⁹ Kingo keskei arawek aeng'u, koweektagei ole mi kwandanyi, ak ki yachi ineendet ko uu kaarortaennyi ne kiga koaror. Ak ki tomo kotuiyo ak muren. Ara ki ek niito piteet eng' Israel,

⁴⁰ keele, pendi tiibiigap Israel kenyiit age tugul koyaei kabwaatet agobo cheptap Jephta Gileadindet eng' peetuusyek ang'wan eng' kenyiit age tugul.