KIRUOGIK 10 - BUKUIT NE TILIIL Sireet ne Dutero Kanon

Koegu Tola laitoryat eng' Israel

¹ Kingo pata peetuusyegap Abimelek kong'eet Tola weeriitap Pua, weeriitap Dodo, chiitap Issakar, kosar Israel. Ki menyei ineendet Samir eng' emetap tuloonook ne po Ephraim.

² Ki irwookyi Israel kenyiisyek tiptem ak somok, kime anyun ineendet ak ki kitupchi Samir.

Koegu Jair laitoryat eng' Israel

³ Kingo pata peetuusyegap Tola, kong'eet Jair, Gileadindet. Ki irwookyi Israel kenyiisyek tiptem ak aeng'.

⁴ Ki tinyei weeriik sosom che ki laanyei moek sosom che po sigiroik, ak ki tinyei nganasook sosom che kiguure Habot-jair agoi ra, che mi emetap Gilead.

⁵ Kime anyun Jair ak ki kitupchi Kamon.

Konyalili `Amonik Israel

⁶ Ki yai piigap Israel yaityet kogeny eng' taitap Kamuktaindet ne Toroor. Ki oot `icheek Baalik ak Astarot, ak kanamonigap Syria ak che po Sidonik, kanamonigap Moab ak che po Amonik ak che po Philistiik. Ki meto `icheek Kamuktaindet ne Toroor ak mata koot ineendet.

⁷ Ki nereech kot anyun Kamuktaindet ne Toroor agobo Israel ak ki aldochi `icheek eunegap Philistiik ak eunegap lagogap Ammon.

⁸ Ki iim ak konyaliil piigap Israel kenyinooto. Ak ki inyaliil piigap Israel, chooto tugul che ki mi Jordan pitoniin eng' emetap Amorik, ne mi Gilead, eng' kenyiisyek taman ak sisiit.

⁹ Kilandae Jordan lagogap Ammon koba kobargei ak Judah, Benjamin ak kootap Ephraim. Ki kinyaliil anyun Israel miising'.

¹⁰ Ki riirchi `piigap Israel Kamuktaindet ne Toroor, koleenji, “Ki keyaun tengekto, amu kigemete Kamuktaindennyo ak kigeot Baalik.”

¹¹ Ak ki mwachi Kamuktaindet ne Toroor piigap Israel, koleenji, “Tos ki ma asarwok eng' Misiriik, Amorik, Amonik ak eng' Philistiik?

¹² Ye ki inyaliilak ak icheek Sidonik, Amelegik ak Maonik, ko ki oriircho ak asarwok eng' eunekwak.

¹³ Ago ki ometa ak oot kanamonik. Nooto anyun, ma asarwok kogeny.

¹⁴ Oba oriirchi kamuktaik che ki olewen! Ingosarwok icheek eng' peetuutap nyalildang'wong'.”

¹⁵ Ki leenji `piigap Israel Kamuktaindet ne Toroor, “Kigeyai tengekto. Yaiywech kiit age tugul ne igeere ile nyolu, ago kisaain kityo keele isarwech peetuuni.”

¹⁶ Ki isto anyun kanamonik che too eng' kwenunnywa ak koot Kamuktaindet ne Toroor. Ak ki iimak saboondanyi amu nyalildap Israel.

¹⁷ Ki iyumgei anyun lagogap Ammon ak koba koteech Gilead. Ki iyumgei piigap Israel ak icheek ak koteech Mispa.

¹⁸ Kimwachigei piik, pounigap Gilead, kole, “Ng'oo ne tau kobaregei ak lagogap Ammon? Egu ineendet ne oo eng' tugul che menyei Gilead.”