KALEWANAIK 7 - BUKUIT NE TILIIL Sireet ne Dutero Kanon

Kateunet agobo kwonyiik che imasotin

¹ Weeriinnyu, riip ng'aleekyuk, ak igonorchigei kayomisutikyuk.

² Riip kayomisutikyuk si isap; riip kaneetisyennyu ko uu ye iriibe laptetap kondang'ung'.

³ Ratyi moriiguk, sirchi muguleldang'ung'.

⁴ Ileenji utaatyet, “Ii chepkamennyu,” ak iguure naet chepkamennyu ne po ooreet.

⁵ Si kobiit koriibin eng' chepkugoniot, eng' kwony ne imasat ne chemwai kuut.

⁶ Amu ki aiitite eng' tirisyetap koonnyu eng' tirisyennyu ne po segengeisyek,

⁷ ak ki ageer eng' kwenutap che abusanik, ak ki anyit eng' kwenutap neranik, neran ne ma tinyei naet,

⁸ kobunei ooreet ole neegitee luuitap kwonyooto, ak ki isup ooreet ne wendi koonnyi,

⁹ ko karatarat, ko kaimen, eng' imenindap kemout ak mesundeito.

¹⁰ Ki nyo anyun kwony kotuiye ineendet, kolaachigei ko uu chepkugonik, ng'aaliindet.

¹¹ Polin ak ko ngelelyo, ma tononi eng' koonnyi:

¹² mi ooreet ra, komi tuun komoswek che paraen, ak saptoi eng' ole pesiap oor.

¹³ Konam anyun ineendet ak kong'utut, ak komwachi ineendet eng' nyiganateet koleenji,

¹⁴ “Atinye korosegap kagoochinoigap kaalyeet, kaayaakte rani tuguuk che kiga arorte.

¹⁵ Kaanyo anyun atorogun, kaanyo acheeng'in eng' kagiiletapkei, ak kaanyoorun.

¹⁶ Kaaiite ngoroik che po lelesta eng' itogunnyu, kobooto kitambaok che simormor che po usiisyegap Misiri.

¹⁷ Kaande nyamdutik itogunnyu keetiik che kiguure ahalim ak kinamon.

¹⁸ Nyoo kibaibaige kot koeech; ngibaibaige eng' chamyet.

¹⁹ Amu ma mi kaa manong'otyonnyu, kawo panda ne loo.

²⁰ Kaip loletap fedhaisyek ma itu kaa agoi eng' kwenutap arawet.”

²¹ Eng' ng'aleekyik che chaang' che tangus, koterteer ineendet ichuuti `ineendet chiichooto eng' ng'aleekyik che po kagaigaet.

²² Isubi anyun `ineendet kwonyooto eng' yooto, ko uu eito ne ki kwerye kwo eng'seet, anan ko uu mugurek che kitigone ne perber,

²³ kot kotoor kipchabet koennyi kosore. Uu toriityon ne choktoi kowendi mesteet, ma naei kole parei saboondanyi.

²⁴ Ara anyun, werchu, ogasa, ak oepchi iit ng'aleek che amwae.

²⁵ Amengotokyigei muguleldang'ung' ortinwekyik, amebet isup ortinwekyik.

²⁶ Amu ki koluul che chaang' che ki kiguoten; ak chaang' kot piik tugul che ki kobar ineendet.

²⁷ Koonnyi ko ooreet ne wendi ye mi che ki kobek, ne choorchingei kooriigap meet.