KALEWANAIK 5 - BUKUIT NE TILIIL Sireet ne Dutero Kanon

Kateechinet agobo riibetap poorwek

¹ Weeriinnyu, kas utaatyennyu; epchi iit kaguiyennyu,

² si kobiit iriip naet ne myee, si koriip `kuting'ung' naet.

³ Amu kutitap chepkugoniot kosaune kumyat, ak ng'aleekyik ko tangusen kosiir mwai;

⁴ ago ng'waan kagesunennyi ko uu ng'wonet, ng'atip ko uu rotwetap chok ne ng'atiben komoswek tuwai.

⁵ Choorchingei keelyekyik meet; namegei kakwautikyik ak ye mi che ki kobek,

⁶ Ma nyooru ineendet ooreet ne litit ne po saboondo; ma tononiotiin ortinwekyik, ama naei.

⁷ Ogasa anyun, werchu, amoistoegei ng'aleek che amwae.

⁸ Iste oreng'ung' kolooit eng' korgonooto, ameriikyi kurgeetap koonnyi,

⁹ si megoochi teegistang'ung' piik alak, ak igoochi kenyisyeguk piik che kolgol;

¹⁰ si ma nyoor kobaibaegei toek kimnateng'ung'; si ma tebee poisyoniguk che kiimeen kootap toondet;

¹¹ si iriir let, ye kang'emak panyeeguk ak poortang'ung',

¹² ak imwa ile, “Tya weget ne ki awech kergong'yet, ak saset ne ki sas muguleldanyu kateunet!

¹³ Ama agas iit kaneetikyuk, ama epchi iit piik che ki ineeta.

¹⁴ Nguno ko kaariikyi yaityet tugul eng' kwenutap tuiyet ak kayumetapkei.”

¹⁵ Ee peek che mi tereeng'ung', peek che rootei eng' keriingeng'ung',

¹⁶ Tos kanyool koseergei kondametusyeguk po peek eng' olo tugul, ainoosyeguk po peek eng' ortinwek?

¹⁷ Ingobunjin inyee inyegei, amat kobunji toek che mi kobooten.

¹⁸ Ingoberuurok kondametung'ung' po peek, ak paibaitune osotyotap ming'inateng'ung',

¹⁹ uu kenyeleet ne karaaran ak sitwet ne tala. Ingoyamin kinaikyik kotugul, ak paibaitune chamyennyi kotugul.

²⁰ Weeriinnyu, amu nee si ibaibaegei chepkugoniot, ak isuup tegetap chepkugoniot?

²¹ Amu ortinwegap chii ko keerei Kamuktaindet ne Toroor ak koriibei mitainik tugul che po chiichooto.

²² Namei `kiptengekyot yaitwogikyik, ak keratee ineendet poroonigap tengektanyi.

²³ Meei ama tinyei atep ne myee, ak petei amu ooindap perberyennyi.