KALEWANAIK 31 - BUKUIT NE TILIIL Sireet ne Dutero Kanon

Kaneetisyetap Laitoryat Lemuel

¹ Ng'aleegap Laitoryat Lemuel; maonatet ne ki ineet kamet ineendet.

² Nee, weeriinnyu? Ee, nee weeriitap moennyu? Ee, nee weeriitap kayasyoutikyuk?

³ Amegoochi karusyek kimnateng'ung', amegoochi ortinweguk icheek che ng'emei laitorinik.

⁴ Ma nyooljin laitorinik, ee Lemuel, ma nyooljin divaik; ma nyooljin pounik koe maiyek,

⁵ si ye kagoee, koutye ng'atuutik, ak komaas kirwoogetap age tugul ne kinyaliili.

⁶ Inage maiyek ineendet ne machei kolus, ak inage divaik piik che tinyei ng'wanindo eng' saboonwekwak;

⁷ ingoee ak koutye panandanyi, si mata kobwaat nyalildanyi.

⁸ Ng'alaal agobo ne namaat kuut, agobo tugul che kagilakta kotebi icheegei.

⁹ Ng'alaal, irwooch eng' imanda, ak irwooch agobo kibananook ak che ma tinyei kiy.

Kwondo ne nyolunot

¹⁰ Ng'oo ne imuuchi konyoor kwondo ne nyolunot? Amu siirei miising' kamanuutyennyi, ne po koik che kiguure peninim.

¹¹ Imang'u manong'otyondennyi ineendet, ma rarchin kiy ne nyooru.

¹² Yachin ne myee osotyonnyi ineendet, ma yachin ne ya eng' peetuusyek tugul che po osotyondonooto.

¹³ Cheeng'ei osotyondonooto koroorigap keechiirek ak katanit, poisyei eng' chamyet.

¹⁴ Uu ineendet melisyegap che ibooti tuguuk che ki aldoi; amu ibu amitwogikyik eng' ole loo.

¹⁵ Ng'eetei kogeny kota ko kemoi, ak kobai piigap koonnyi. ak kogochi tiibiikyik poisyennywa.

¹⁶ Ibwaati agobo mbareet, ak koal; minei mbareetap sabibuk eng' keljinet ne konyoor.

¹⁷ Kermenegei kimnateet, ak kogimit eunekyik.

¹⁸ Keerei kole tinyei keljinet mung'arennyi; ma meei tainnyi kemoi.

¹⁹ Namei keetit ne kitae koroorik, ak konamei keetit ne kinabisye.

²⁰ Aiyeep ineendet eng' kibananiat; ee, toreti ne ma tinyei kiy.

²¹ Ma iywei kole tos nyoor piikyik kaitityetap teluji; amu ilaachi piik tugul che po koonnyi ngoroik che piriireen.

²² Napchingei kitambaok che po lelesta; po ngoroikyik katanit ne karaaran ak ko po tuguuk che arusen ne piriir.

²³ Naat manong'otyondennyi eng' ormariichok, ye tebyei ineendet ak poisyegap emet.

²⁴ Nabei osotyondonooto ngoroigap katanit si koalda; igoochin chemung'arainik mosibisyek.

²⁵ Kimnateet ak teegisto ko ngoroikyik, rorechin peetuusyek che pwoonei.

²⁶ Twegu eng' utaatyet, mi kutinnyi kaneetisyetap talasyet.

²⁷ Riibei komyee atebosyegap piigap koonnyi, ama amei che po chorirnatet.

²⁸ Ng'eetos lagokyik ak koguuree ineendet ne iberuurot; ilasu kogeny manong'otyondennyi ineendet kole,

²⁹ “Ki koyai ne nyolunot tiibiik che chaang', ago ii nyolunot kosiir chooto tugul.”

³⁰ Iberberisyei myeeindo, ak ko puch korooronindo, ago kilasu kwondo ne iywei Kamuktaindet ne Toroor.

³¹ Ogoochi logoegap eunekyik; ak ingolas poisyonikyik ineendet eng' ormariichok.